مەملەكەت باسشىسى ادىلەت ءمينيسترى ازامات ەسقارايەۆتى قابىلدادى

استانا. قازاقپارات - ادىلەت ءمينيسترى ازامات ەسقارايەۆ پرەزيدەنت قاسىم-جومارت توقايەۆقا ادىلەت ورگاندارى قىزمەتىنىڭ ناتيجەلەرى جانە الداعى كەزەڭگە جوسپارلار تۋرالى ەسەپ بەرىپ، رەفورما جۇرگىزىلەتىن باعىتتاردى تانىستىردى، دەپ حابارلايدى قازاقپارات اقورداعا سىلتەمە جاساپ.

مينيستر قىلمىستىق جانە قىلمىستىق-پروتسەستىك كودەكستەردى تەكسەرۋدىڭ اياقتالعانىن مالىمدەدى. وسى رەتتە 1000 نان استام باپ پەن 1200 ۇسىنىسقا تالداۋ جۇرگىزىلدى. ناتيجەسىندە ازاماتتار مەن كاسىپكەرلەر قۇقىقتارىنىڭ قورعالۋىن كۇشەيتۋ ماسەلەلەرىن ەسكەرەتىن جانە بيزنەستى نەگىزسىز قىلمىستىق قۋدالاۋعا جول بەرمەيتىن ءتيىستى زاڭ جوباسى ازىرلەندى.

ازامات ەسقارايەۆتىڭ ايتۋىنشا، زاڭنامانىڭ ساپاسىن ارتتىرۋ ءۇشىن كەشەندى شارالار قابىلدانىپ جاتىر. اتاپ ايتقاندا، زاڭ جوباسى قىزمەتى ماسەلەلەرى جونىندەگى ۆەدومستۆوارالىق كوميسسيانىڭ جۇمىسىن جانداندىرۋ، عالىمداردى كەڭىنەن تارتا وتىرىپ، زاڭنامانىڭ تۇراقتىلىعىن قامتاماسىز ەتۋ، رەفورمالاردى اقپاراتتىق تۇرعىدا قولداۋدى كۇشەيتۋ جونىندەگى ءىس-شارالاردى جۇزەگە اسىرۋ كوزدەلگەن.

سونىمەن قاتار پرەزيدەنت ادىلەت مينيسترلىگىنە قاراستى ماسەلەلەر مەن كورسەتىلەتىن مەملەكەتتىك قىزمەتتەردى اۆتوماتتاندىرۋ جانە سيفرلاندىرۋ شارالارىن قامتيتىن 12 جوبامەن تانىستى.

كەزدەسۋ سوڭىندا قاسىم-جومارت توقايەۆ مينيسترلىككە جۇكتەلگەن مىندەتتەردىڭ ساپالى ىسكە اسىرىلۋىنىڭ ماڭىزدىلىعىنا نازار اۋدارىپ، زاڭنامانى ودان ءارى جەتىلدىرۋگە جانە ازاماتتاردىڭ قۇقىقتارىن قورعاۋدى كۇشەيتۋگە باعىتتالعان ءبىرقاتار تاپسىرما بەردى.