گەرمانيادا اۋەجاي جۇمىسشىلارى تاعى دا ەرەۋىلگە شىقتى
ەرەۋىلدى گاننوۆەر مەن بەرلين اۋەجايلارى دا جالعاستىرماقشى، دەپ حابارلايدى قازاقپارات DW اگەنتتىگىنە سىلتەمە جاساپ.
جەكسەنبى كۇنى كەشكە گامبۋرگ اۋەجايىندا قىزمەتكەرلەردىڭ نارازىلىق ەرەۋىلدەرى باستالدى.
13- ناۋرىزدا اۋەجايدا جوسپارلانعان 123 رەيستىڭ بارلىعى جانە قونۋعا ءتيىس 121 رەيستىڭ كەم دەگەندە 50 ءى توقتاتىلادى، كوپتەگەن رەيستەر كەيىنگە شەگەرىلۋى مۇمكىن.
Verdi كاسىپوداعى اۋەجايدىڭ 2 مىڭعا جۋىق قىزمەتكەرىن شاقىرعان ەرەۋىل 13- ناۋرىزدىڭ كەشىنە دەيىن جالعاسادى.
گامبۋرگ مەكتەپتەرىندە كوكتەمگى دەمالىس ەكەنىن ەسكەرسەك، ونىڭ سالدارى ونداعان مىڭ اۋە جولاۋشىلارىنا اسەر ەتۋى مۇمكىن.
13- ناۋرىز كۇنى تاڭەرتەڭ گاننوۆەر اۋەجايى مەن بەرلين اۋە ايلاعىنداعى BER قىزمەتكەرلەرى دە گامبۋرگتەگى ارىپتەستەرىنە قوسىلدى.
Ver.di كاسىپوداعى فەدەرالدى جانە كوممۋنالدىق دەڭگەيدەگى مەملەكەتتىك قىزمەتكەرلەردىڭ جالاقىسىن 10,5 پايىزعا جانە ايىنا كەمىندە 500 ەۋروعا كوتەرۋدى تالاپ ەتەدى.
ءوز كەزەگىندە جۇمىس بەرۋشىلەر ەكى كەزەڭ بويىنشا جالاقىنى كەزەڭ-كەزەڭىمەن 5 پايىزعا كوتەرۋدى جانە قىزمەتكەرلەرگە 2500 ەۋرو كولەمىندە ءبىرجولعى تولەم بەرۋدى ۇسىنىپ وتىر.
تاراپتار اراسىنداعى كەلىسسوزدىڭ ءۇشىنشى كەزەڭى پوتسدامدا 27-29- ناۋرىز ارالىعىندا وتەدى.
11- ناۋرىزداعى تاريفتىك كەلىسسوز بارىسىندا تاراپتاردىڭ ىمىراعا كەلە الماۋىنا بايلانىستى Ver.di كاسىپوداعى گەرمانيانىڭ سولتۇستىگىندەگى ءبىرقاتار اۋەجايلاردىڭ قىزمەتكەرلەرىن ەرەۋىلگە شاقىردى.
ەرەۋىل گامبۋرگتەن باسقا بەرلين، گاننوۆەر جانە برەمەن اۋەجايلارىنا دا ىقپال ەتۋى مۇمكىن.
ەسكە سالا كەتەيىك، گەرمانيادا اۋەجاي قىزمەتكەرلەرى اقپان ايىندا دا ەرەۋىلگە شىققان ەدى.