مۋزىكانى حارام ساناپ، كۇيدى تاستاپ، دومبىراسىن ساتىپ جىبەرگەن جىگىتتىڭ حيكاياسى

استانا. قازاقپارات - رومان بۇرقاش قىزىلوردانىڭ قازالى قالاسىنىڭ تۋماسى. مۋزىكانت. اتاسى باباسىنا تارتقان اتاقتى كۇيشى بولسىن دەپ، جاس كەزىنەن دومبىرا تارتىپ ۇيرەتكەن.

وسى ارمانمەن ول شىمكەنتتە مۋزىكا كوللەجىندە ءتالىم العان. اكەسى بۇل وقىپ جۇرگەندە ىرىمداپ، ارنايى شەبەرگە تاپسىرىسپەن دومبىرا جاساتىپ بەرگەن. ءبىراق كەيىپكەرىمىز جىلدار وتە كەلە سول كەزدە ءدىندار جاستار اراسىندا كەڭ تاراعان دۇرىس ەمەس ءدىني ۋاعىزدارعا ۇرىنىپ، مۋزىكانى «حارام» دەپ ساناي باستاعان. سونىڭ سالدارىنان اتا اماناتى - دومبىراسىن ساتىپ جىبەرگەن. 10 جىلدان كەيىن بۇل ءىسىنىڭ قاتە بولعانىن تۇسىنگەن ول دومبىراسىن قايتادان ىزدەگەن.

ارعى بابام سىر وڭىرىنە بەلگىلى كۇيشى بولعان

قازالىدا اتا- اجەمنىڭ قولىندا ءوستىم. اتامىزدىڭ قولىنان دومبىرا ۇيرەندىم. وتباسىمىزدىڭ بارلىعى دومبىرا تارتادى. اتامىزدىڭ اتاسى سىر وڭىرىنە بەلگىلى قاراتوس ايماعانبەت دەگەن كۇيشى بولعان. كۇيشىلىك وتباسىمىزدا اتادان بالاعا جالعاسىپ كەلە جاتقان ونەر ەدى. اتامنىڭ باستى ارمانى مەنى كۇيشى قىلۋ ەدى. مەندە كۇيشى بولۋدان باسقا وي بولمادى. سول ماقساتپەن 2005 -جىلى شىمكەنتتەگى ساز كوللەجىنە دومبىرا كلاسىنا وقۋعا ءتۇستىم. 2007 -جىلى اكەم ازات دەگەن شەبەرگە تاپسىرىسپەن پوليساندرا اعاشىنان 400 دوللارعا دومبىرا جاساتىپ، سىيلادى. 17 جاسار بالامىن عوي، قاتتى قۋاندىم. ول كەزدە كوللەدجدە وقيتىن دومبىراشىلاردىڭ بارىندە بىردەي ساپالى دومبىرا بولا بەرمەيتىنىن ەسكەرسەك اكەمنىڭ سىيلىعى شىنىمەن قۇندى بولاتىن.

اتامنىڭ الدىندا كۇي تارتۋ مەن ءۇشىن ۇلكەن ماقتانىش ەدى

تەك شەرتپە كۇيلەرگە يكەمىم بولعاسىن دومبىرامنىڭ بۇراۋىن وركەستردە جانە كونسەرتمەيستەرمەن قوسىلىپ وينايتىن كەزدە عانا سولعا كەلتىرەتىنمىن. باسقا ۋاقىتتاردا تەك رەدە تۇراتىن. سودان بولار دومبىرامنىڭ باۋىرى جۇمساق، داۋسى قوڭىر ەدى. ءتىپتى فيلارمونيادا ىستەيتىن ۇستازدارىمىزدىڭ ءوزى سولو وينايتىن كەزدەرى وسى دومبىرامدى سۇراپ الاتىن. داۋسىنا قىزىعىپ ساتىپ الامىن دەپ كوپ اقشا ۇسىنعاندار دا بولدى. ەشقايسىنا ساتقان جوقپىن.

اۋىلعا از ۋاقىتقا بارسام دا اتاما كۇي تارتىپ بەرۋ ءۇشىن دومبىرامدى ارنايى الىپ باراتىنمىن. سول ءۇشىن ونىڭ الدىندا كۇي تارتۋ مەن ءۇشىن ۇلكەن ماقتانىش ەدى.

كونسەرۆاتوريادا وقيتىنداردىڭ باستى سۇراعى «مۋزىكا حارام با، حالال ما؟» بولاتىن

كوللەدج بىتىرگەسىن الماتىداعى قۇرمانعازى اتىنداعى كونسەرۆاتورياعا وقۋعا ءتۇستىم. دومبىرادا باسەكە كوپ بولعاسىن سىبىزعىنى تاڭدادىم. تالعات مۇقىشيەۆ كلاسىندا ءتالىم الدىم. ول كەزدەرى ستۋدەنت جاستار اراسىندا ناماز وقۋ ۇلكەن تەندەنتسياعا اينالدى. دارىننىڭ ۋاعىزدارى تاراپ جاتتى. كوسەرۆاتوريادا وقيتىنداردىڭ باستى سۇراعى «مۋزىكا حارام با، حالال ما؟» ەدى.

مەندە سولارعا ەرىپ ناماز وقىپ، ءدىني اۋديو ۋاعىزدار تىڭداي باستادىم. جاسپىز عوي، نەنىڭ دۇرىس، نەنىڭ بۇرىس ەكەنىن بىلمەدىك. ۋاعىز دەگەننىڭ بارىنە پايعامبار سوزىندەي يلاندىق، قاتتى اسەرلەندىك. كوپ ۇزاماي مۇرتتى قىرىپ تاستاپ، ساقال قويۋدى شىعاردىق. كورىنگەنگە قورقىنىشتى ۋاعىز ايتىپ كەتە بەرەتىن، قاراپتان قاراپ، الدىمداعى ادامنىڭ جاعدايىن، ءدىني ساۋاتىن ەسكەرمەستەن بىردەن ولىممەن قورقىتىپ، قيت ەتسە بولدى ءبارىن قۇدايدىڭ ازابىمەن ۇركىتەتىن ايار ءدىنپازعا اينالدىق. الدەبىر ءدىني توپتىڭ ىقپالىنا ءتۇسىپ مۋزىكانى مەنسىمبەۋدى شىعاردىق. سودان باستاپ دومبىراممەن ارامىزداعى ىستىق سەزىم سۋي باستادى.

دومبىرامدى 70 مىڭ تەڭگەگە ساتىپ جىبەردىم

سىبىزعى كلاسىندا وقىسام دا دومبىرامدى اۋىق-اۋىق قولعا الىپ تۇرۋشى ەدىم. ۋاقىت وتە كەلە توبەدە ءىلۋلى تۇراتىن دومبىرامدى فۋتليارىنا سالىپ توسەكتىڭ استىنا تاستادىم. ەڭ سوراقىسى كوپ ۇزاماي سول دومبىرامدى بولمەدە بىرگە تۇراتىن جىگىتكە 70 مىڭ تەڭگەگە ساتىپ جىبەردىم. ول اقشاعا قالاعا كەلەردە اكەمنىڭ جۇمسارسىڭ دەپ بەرگەن اقشاسىن قوسىپ نوۋتبۋك ساتىپ الدىم دا ءىشىن اۋديو-ۆيدەو ۋاعىزعا، ءولىم جايلى، توزاق جايلى ۆيدەو روليكتەرگە تولتىرىپ تاستادىم. بۇرىن مەنەن دومبىرامدى سۇراپ كەلەتىن دوستارىم ەندى نوۋتبۋگىمداعى ۋاعىزداردى سۇراپ كەلەتىن بولدى. سول كەزدەرى ءوزىمدى ۇلكەن ساۋاپتى ءىس جاساپ جۇرگەندەي سەزىندىم. دومبىرامنان قۇتىلعانىمدى ايتىپ ناماز وقيتىن دوستارىمنان ءسۇيىنشى سۇرايتىندى دا شىعاردىم.

وقۋدى تاستاپ «يسلام تانۋ» ماماندىعىنا اۋىستىم

كوپ وتپەي 2-كۋرستان سوڭ كونسەرۆاتوريانى تاستاپ، «نۇر-مۇباراك» ۋنيۆەرسيتەتىنە «يسلام تانۋ» ماماندىعىنا وقۋعا ءتۇستىم. بۇل شەشىمىمە ۇيدەگىلەر قاتتى قارسى بولماسا دا، «دومبىرانى، مۋزىكانى بەكەر تاستادىڭ» دەگەن سياقتى سىڭاي تانىتتى. ولارعا عىلىممەن اينالىسقىم كەلەتىنىن ايتىپ، ءتۇسىندىردىم. اينالاداعى دوستارىم دا سيرەپ، ارالاسا الماي قالدىم. 2015 -جىلى «نۇر-مۇباراكتى» اياقتاعاسىن، ءدىني وقۋىمدى جالعاستىرۋ ءۇشىن تۇركياعا كەتتىم. جالپى، ءدىندى 8 جىل وقىپپىن. سوڭىندا قازىرگى ءدىني تۇسىنىكتەردىڭ دۇرىس ەمەس ەكەنى، ۋاحابيستىك، كونسەرۆاتيزم سياقتى نارسەلەردىڭ تەرىس اسەر ەتەتىنىن ءبىلدىم.

دىنگە كىرگەن ادام، ينتەللەكتۋالدى ونەر مەن بىلىمنەن اجىراپ قالادى

بىزدەگى ءدىن، ءدىني تۇسىنىك داستۇرلىدەن اۋىتقىپ كەتكەن. قولدان جاساپ ەنگىزگەن سياقتى. ءداستۇر، تاريحىمىزبەن قابىسپايدى. دىنگە كىرگەن ادام، ينتەللەكتۋالدى ونەر مەن بىلىمنەن اجىراپ قالادى. ءبىراق قازىر تۇزەلدى، ساۋاتتى ءدىندار جىگىتتەر بار. ءبىزدىڭ كەزىمىزدە دىنگە كەلگەن ادام وقۋىن تاستاپ كەتىپ، باسقا ماماندىققا اۋىسىپ كەتەتىن. ەگەر ءدىن ادامنىڭ اينالىسىپ جۇرگەن كاسىبىنە نەمەسە ونەرىنە كەرى اسەرىن بەرەتىن بولسا، دەمەك ول دىندە ءبىر كىلتيپان بار. مىسالى، اقىن-جازۋشى جىگىتتەردى دە كوردىك دىنگە كەلىپ، تار تۇسىنىكتەرگە ۇرىنىپ كەتكەنىن.

ۋاقىت وتە مۋزىكانىڭ دىنىمىزدە ەشقانداي دا حارام ەمەس ەكەنىنە كوز جەتكىزدىك

ارادا بىرنەشە جىل وتكەن سوڭ ساۋاتتى، پاراساتتى ءدىنتانۋشى ماماندارمەن تانىسىپ دىنگە، مۋزىكاعا دەگەن كوزقاراسىم كۇرت وزگەردى. ىشىمدەگى باياعى ايار ءدىنپاز روماننىڭ بەينەسى ءجايلاپ وشە باستادى. ءدىننىڭ كەزىندە جاستانا تىڭدايتىن اۋديو ۋاعىزداردا ايتىلعانداردان الدەقايدا اۋقىمدى ەكەنىن ۇعىندىق. مۋزىكانىڭ دىنىمىزدە ەشقانداي دا حارام ەمەس ەكەنىنە كوز جەتكىزدىك. ولەڭ - ءسوزدىڭ مايەگى بولسا، مۋزىكا - دىبىستىڭ مايەگى ەكەنىن ۇعىندىق. سودان كەيىن مۋزىكاعا، ادەبيەتكە، كينوعا دەگەن قىزىعۋشىلىعىمىزدى قايتا وياتا باستادى. ال كەزىندە ساتىپ جىبەرگەن دومبىرام سول كۇيى ۇمىتۋلى قالدى. ەشقاشان ەسىمە دە المادىم، ىزدەۋ دە سالمادىم.

دومبىرانى ساتىپ العان جىگىتتى تاپتىم

10 جىل بۇرىن الدەبىرەۋگە ساتىپ جىبەرگەن دومبىرامنىڭ سونشالىقتى قۇندى ەكەنىن ۇعىنا ءتۇستىم. ءوزىمدى ۇلتتىق ونەرگە، اتا اماناتىنا نەمقۇرايلى قاراعانىمدى ويلاپ قاتتى قىزاردىم. سودان دەرەۋ دومبىرامدى، ونى ساتىپ العان جىگىتتى ىزدەۋگە كىرىستىم. تانىس-تامىردان سۇراستىرىپ ءجۇرىپ دومبىرامدى ساتىپ العان جىگىتتى تاۋىپ الدىم. ءبىر ۋنيۆەرسيتەتتە مۇعالىم ەكەن. ينستاگرام پاراقشاسىنا كىرىپ دومبىرامنىڭ ءالى سونىڭ قولىندا ەكەنىنە كوز جەتكىزدىم. ءسويتىپ ۆاتساپ نومەرىنە حابارلاسىپ دومبىرامدى قايتا ساتىپ العىم كەلەتىنىن ايتتىم. وكىنىشكە قاراي تانىسىم دومبىرامدى، ياعني دومبىراسىن ساتپايتىنىن ايتتى. ءبىراق مەن قاتتى قايمىعا قويعان جوقپىن. «باستىسى دومبىرامنىڭ باۋىرى ءبۇتىن، ناعىز ماماننىڭ قولىندا» دەپ ءوزىمدى جۇباتىپ ءجۇردىم.

وسى وقيعادان كوپ ساباق الدىم

ءبىراق جاقىندا سول جىگىت ازاماتتىق جاساپ، دومبىرامدى وزىمە قايتىپ بەردى. ەسەسىنە وسى وقيعادان كوپ ساباق الدىم. تاريحي سانام وياندى. دۇرىس ەمەس ءدىني اعىمداردىڭ ۇلتتىڭ ۇلت بولىپ قالۋىنا قانداي زاقىم كەلتىرەتىنىنە كوزىم جەتتى. بۇدان بىلاي جاساعان قاتەلىگىمدى بالالارىمنىڭ جانە دە وزگە ادامداردىڭ قايتالاماۋىنا ۇلەس قوسىپ وتەمىن.

اقپارات دەرەككوزى: massaget.kz