بۇگىن تۇركيادا قاتارىنان ءۇش مارتە جەر سىلكىندى

انكارا. انادولى- قازاقپارات - بۇگىن تۇركيادا ءۇش جەر سىلكىنىسى تىركەلدى، دەپ حابارلايدى قازاقپارات انادولى اگەنتتىگىنە سىلتەمە جاساپ.

تۇركيانىڭ شىعىسىنداعى مالاتيا پروۆينتسياسىندا 4,5 بالدىق جەر سىلكىنىسى بولدى.

بۇل تۋرالى تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە زارداپتارىن جويۋ باسقارماسىنىڭ (AFAD) سايتىندا حابارلاندى.

جەر استى دۇمپۋلەرى 05:13 كەزىندە 8 ك م تەرەڭدىكتە تىركەلگەن.

بۇعان دەيىن ساعات 04:34 تە ماگنيتۋداسى 4,7 بالدىق 10 ك م تەرەڭدىكتەگى جەر سىلكىنىسى تىركەلگەن.

ەكى جاعدايدا دا جەر سىلكىنىسىنىڭ وشاعى پيۋتۋرگە اۋدانىندا بولدى.

بۇعان قوسا تۇركيانىڭ وڭتۇستىگىندەگى حاتاي پروۆينسياسىندا دا ماگنيتۋداسى 4,4 بولاتىن جەر سىلكىنىسى تىركەلدى.

تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە زارداپتارىن جويۋ باسقارماسىنىڭ (AFAD) حابارلاۋىنشا، جەر سىلكىنىسىنىڭ وشاعى حاسسا ايماعىندا بولعان.

6-اقپاندا تۇركيانىڭ كاحرامانماراش پروۆينتسياسىندا ماگنيتۋداسى 7 بالدان اساتىن ەكى جەر سىلكىنىسى بولدى. جەر سىلكىنىسى ەلدىڭ 10 پروۆينتسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا دا سەزىلدى.

ماماندار ايماقتا جەراستى دۇمپۋلەرى ءالى دە جارتى جىل بويى جالعاسادى دەگەن بولجام جاسادى. تۇركيادا كۇشتى جەر سىلكىنىسى بولاتىنىن بولجاعان نيدەرلاند زەرتتەۋشىسى فرانك حۋگەربيتس ناۋرىز ايىنىڭ باسىندا جاڭا اپاتتار بولۋى مۇمكىن ەكەنىن ەسكەرتتى.

7-ناۋرىزدا تۇركيانىڭ حاتاي، كاحرامانماراش جانە كايسەري پروۆينتسيالارىندا ءۇش جەر سىلكىنىسى بولدى.

اقپان ايىندا بولعان جەر سىلكىنىستەرىنىڭ تۇركياعا كەلتىرگەن شىعىنى 100 ميلليارد دوللاردان اسۋى مۇمكىن.

تۇرىك پوليتسياسى عيماراتتارى جەر سىلكىنىسىنە ءتوزىمدى بولۋى ءتيىس قۇرىلىس مەردىگەرلەرىن تەرگەۋ اياسىندا 269 كۇدىكتىنى ۇستادى.

سوڭعى رەسمي دەرەكتەرگە سايكەس، تابيعي اپات 48 مىڭعا جۋىق ادامنىڭ ءومىرىن قيدى.