اقتوبە وبلىسىندا سيىر ەكى باستى بۇزاۋ تۋدى

اقتوبە. قازاقپارات - اقتوبە وبلىسى ىرعىز اۋدانى نۇرا اۋىلىندا سيىر ەكى باستى بۇزاۋ تۋدى. كوپ ۇزاماي ونى يەسى باۋىزداپ تاستاعان، دەپ حابارلايدى قازاقپارات ءتىلشىسى.

اقتوبە وبلىسى ىرعىز اۋدانىنداعى ەكى باستى بۇزاۋدى وسى اۋداننىڭ تۋماسى نۇربولات تۋىسباي ۇلى الەۋمەتتىك جەلىگە سالدى.

«بالالىق شاعىم وتكەن اۋىلدا ەكى باستى بۇزاۋ دۇنيەگە كەلىپتى. اقتوبە وبلىسى، ىرعىز اۋدانى، نۇرا سوۆحوزى. كلاستاستارىمنىڭ چاتىنان ۇققانىم، اۋىل حالقىندا ۇرەي بار سياقتى. ەكولوگيانىڭ بەلگىسى مە ەكەن؟..»، - دەپ الاڭداۋشىلىق ءبىلدىردى ول.

نۇرا اۋىلىنداعى بۇزاۋ يەسى قانداي دا ءبىر اقپارات بەرۋگە قارسى. ال مال دارىگەرى باۋىزداپ تاستاۋعا كەڭەس بەرگەن.

«بۇل 2-3 كۇندىكتە بولدى. سيىر 10- ناۋرىز كۇنى تۇندە تۋعان. مال يەسى ونى 11- ناۋرىز كۇنى تاڭدا كوردى. سيىردىڭ ونى قالاي تۋعانى بارىمىزگە تۇسىنىكسىز بولىپ تۇر. يەسى سول كۇنى ماعان مەسسەندجەر ارقىلى جىبەرىپ، جاعدايدى حابارلادى. ءوزىم سول كەزدە اۋداندا جيىندا ەدىم. باۋىزداپ تاستاۋعا كەڭەس بەردىم. ويتكەنى بۇزاۋ باسىن كوتەرە الماعان. بۇزاۋدى باۋىزداعان سوڭ كومىپ تاستادى. زەرتتەۋدىڭ قاجەتى جوق»، - دەيدى نۇرا اۋىلدىق وكرۋگى ۆەتەرينارلىق پۋنكت مەڭگەرۋشىسى ءامىر وتەگەن.

ەسكە سالساق، 2019 -جىلى اقتوبەنىڭ ايتەكە بي اۋدانى كومسومول اۋىلىندا سيىر ەكىباستى بۇزاۋ تۋعان ەدى. ول كەزدە مال يەسى تۋىستىق بۋدانداستىرۋ بولعانىن ايتقان.

اۆتور

التىناي ساعىندىقوۆا