كۋرچاتوۆقا عىلىم قالاسى مارتەبەسى بەرىلمەك

سەمەي. قازاقپارات - اباي وبلىسىنىڭ اكىمى نۇرلان ۇرانحايەۆ كۋرچاتوۆ قالاسىنىڭ تۇرعىندارىمەن كەزدەستى. كەزدەسۋ بارىسىندا كوتەرىلگەن ماسەلەنىڭ ءبىرى - شاھارعا عىلىم قالاسى مارتەبەسىنىڭ بەرىلۋى بولدى، دەپ حابارلايدى قازاقپارات ءتىلشىسى.

ءوڭىر اكىمدىگىنىڭ مالىمەتىنە سۇيەنسەك، قالا حالقى تاراپىنان كوتەرىلگەن ماسەلەلەر نەگىزىنەن تۇرعىن ءۇي- كوممۋنالدىق شارۋاشىلىعى مەن اباتتاندىرۋعا قاتىستى بولدى.

اباي جانە وليمپييسكايا كوشەلەرىنىڭ تۇرعىندارى جىلۋمەن دۇرىس قامتىلماي وتىرعاندىقتارىن العا تارتتى.

سونداي- اق تۇرعىندار ۇيلەردى تەرموجاڭعىرتۋ باعدارلاماسى جانە باقىلاۋ- ولشەۋ اسپاپتارىمەن جابدىقتاۋ باعدارلاماسى بويىنشا قايتا جاڭعىرتۋ قاجەتتىگىن اتاپ ءوتتى.

كەزدەسۋ بارىسىندا جول جايى دا ايتىلدى.

«جول ماسەلەسىن شەشەمىز. ول ءۇشىن الدىمەن جوبالىق- سمەتالىق قۇجاتتاما جاساۋ قاجەت»، - دەدى ايماق باسشىسى.

ونىڭ ايتۋىنشا، كۋرچاتوۆتى عىلىم قالاسىنا اينالدىرۋ كوزدەلىپ وتىر.

«كۋرچاتوۆ وتە ادەمى، ىقشام شاھار. ونى عىلىم قالاسىنا اينالدىرۋ جوسپارلانۋدا. سونىڭ ناتيجەسىندە، قالا ودان ءارى داميدى دەپ سەنەمىز»، - دەدى نۇرلان ۇرانحايەۆ.

سودان سوڭ نۇرلان ۇرانحايەۆ ازاماتتاردى جەكە ماسەلەلەرى بويىنشا قابىلدادى.

قالا تۇرعىندارى اراسىنان قوعامدىق كولىككە قاتىستى ساۋال قويعاندار بولدى. وبلىس اكىمى كوتەرىلگەن ماسەلەلەردى نازارعا الىپ، ءتيىستى تاپسىرمالار بەردى.

اۆتور

تالعاتجان مۇحامەتبەك ۇلى