پاۆلودار جاستارى كيىز ءۇي تىگۋدى ۇيرەنىپ جاتىر
تاريحي دەرەكتەرگە سۇيەنسەك، كوشپەندىلەردىڭ نەگىزگى باسپاناسى بولعان كيىز ءۇي العاشقى ساۋلەتتىك قۇرىلىسقا جاتادى. كوشىپ- قونۋعا ىڭعايلى. جازدا سالقىن، قىستا جىلى. العاشقى شەبەرلىك ساعاتقا قاتىسقان اسسامبلەيا جاستارىن كيىز ءۇيدىڭ جاسالۋ تاريحى قىزىقتىردى.
ەلدار زاحاروۆ، تاتار- باشقۇرت ەتنومادەني بىرلەستىگىنىڭ جاستار كوشباسشىسى:
- كيىز ءۇيدى جيناۋ قيىن ەمەس ەكەن. ماعان وتە قىزىق بولىپ تۇر. ويتكەنى ءوزىم قۇرىلىس سالاسىندا جۇمىس ىستەيمىن. جالپى، كيىز ءۇيدىڭ شەگەسىز قۇراستىرىلاتىنى تاڭعالدىردى.
كەرەگەنىڭ تۇيىسكەن جەرى قايىسپەن بايلانعان. ال ۋىقتىڭ كەرەگەگە بەكىتىلەتىن جاعىنا ۋىق باۋ وتكىزىلەدى. شاڭىراقتىڭ ءتۇزۋ ءارى بەرىك بولۋى ول ۋىققا بايلانىستى. شەبەر اجىبەك اسەن ۇلى تۇرمىستا ءجيى قولداناتىن كەرەگە، شاڭىراق سوزدەرىن كەيىنگى ۇرپاق بىلە بەرمەيتىنىن ايتادى. سوندىقتان ءاربىر شەبەرلىك ساعاتىندا كيىز ءۇي جابدىقتارى تۋرالى اڭگىمەلەيدى.
اجىبەك اسەن ۇلى، شەبەر:
- اتا- بابامىزدا ەرتەدە تەمىر- تەرسەك بولعان جوق. سوندىقتان تەرى، اعاش قولدا بولدى. سول مىنا كيىز ءۇيدىڭ % 90- ءى كيىز، تەرى، مالدان الىنعان. سودان كەيىن اعاش، انا ۋىعى، كەرەگەسى تالدان جاسالعان. قازىر ءبىزدىڭ كيىز ۇيگە شەتەلدەر دە قىزىعىپ جاتىر.
ازامات اۋەشوۆ، جاستار باستامالارىن دامىتۋ ورتالىعىنىڭ ديرەكتورى:
- «رۋحاني تيمبيلدنينگ» دەسەك بولادى. سەبەبى كيىز ءۇيدى جيناۋ ءۇشىن كەم دەگەندە ءبىر 5-6 ادام قاجەت. بيىل عانا وسىلاي ءبىرىنشى رەت باستاپ جاتىرمىز. بۇنى ەندى ءبىر ءداستۇر رەتىندە جىل سايىن ناۋرىز ايى بويى جاستارعا، امانشىلىق بولسا، ۇيرەتەمىز. 8 قاناتتى كيىز ءۇيدى جاستار 1,5 ساعاتتا جيناپ شىقتى.
ۇيىمداستىرۋشىلار كەلەشەكتە شەبەرلىك ساعاتتى تابيعات اياسىندا وتكىزۋدى جوسپارلاپ وتىر. ەندى ايماقتىڭ بەلسەندى جاستارى مەن ۆولونتەرلەر قاتىسۋعا نيەت ءبىلدىرىپتى. كونەنىڭ كوزى بولعانىمەن، ءالى كۇنگە دەيىن قۇندىلىعىن جويماعان اسىل مۇرامىزدى كەڭىنەن دارىپتەۋ - باستى ماقساتىمىز، - دەيدى ولار.
www.24.kz