استانادا تاكسي جۇرگىزۋشىسىنە شابۋىل جاسالدى
استانادا تاكسي جۇرگىزۋشىسى بولىپ جۇمىس ىستەيتىن ەر ادام ەكى ادامدى كورسەتكەن مەكەنجايعا جەتكىزگەن، ءبىراق ولار جول اقىسىن تولەۋدەن باس تارتىپ، جۇرگىزۋشىگە شابۋىل جاساعان.
وقيعا كورسەتىلگەن ۆيدەو الەۋمەتتىك جەلىدە تارادى. وندا جاس جىگىتتىڭ بەلىنە دەيىن شەشىنىپ، ۆيدەوعا ءتۇسىرىپ جاتقان تاكسي جۇرگىزۋشىسىن قورقىتقانى كورسەتىلگەن.
«مەن تاكسي جۇرگىزۋشىسىمىن. اتالعان ەكى ادامدى كورسەتكەن مەكەنجايعا اپاردىم، ولار ماعان تاكسي اقىسىن تولەۋدەن باس تارتتى. ارى قاراي جانجال باستالىپ، كۇتپەگەن جەردەن ماعان جۇدىرىق جۇمسادى. مەن ءوزىمدى قورعاۋ ءۇشىن كۇرەسۋگە تۋرا كەلدى. جاس جىگىت تاس الىپ، مەنى قورقىتتى دا، جاعالاۋعا قاراي قاشىپ كەتتى. ەكەۋى دە ماس بولعان»، - دەلىنگەن ەر ادامنىڭ Instagram پاراقشاسىندا.
پوليتسيا دەپارتامەنتى وقيعاعا قاتىسى بار ادامداردى ىزدەستىرىپ جاتقانىن ايتتى.
«وسى فاكتى بويىنشا سارىارقا اۋدانىنىڭ پوليتسيا ءبولىمى وقيعاعا قاتىسۋشىلاردى انىقتاۋ ماقساتىندا ىزدەستىرۋ جۇمىستارىن جۇرگىزىپ جاتىر. اتالعان تۇلعالاردىڭ ارەكەتىنە قۇقىقتىق باعا بەرىلىپ، قولدانىستاعى زاڭناماعا سايكەس شارالار قولدانىلاتىن بولادى. قوعامدىق ءتارتىپتى بۇزۋ فاكتىسى بويىنشا پوليتسياعا شاعىم تۇسكەن جوق»، - دەپ ءتۇسىندىردى ەلوردالىق پوليتسيا دەپارتامەنتى.