موڭعوليادا سۋرەتكە ءتۇسىپ قالعان «جۇمباق» ءىلبىستى تابا الاسىز با - شەتەلدەگى قازاق تىلىندەگى ب ا ق شولۋ
قىتاي مەن قازاقستان كاسىبي جانە تەحنيكالىق كادرلاردى بىرلەسىپ دايىندايتىن بولدى - «حالىق» گازەتى
2023-جىلعى 2- ناۋرىزدا قىتايدىڭ تيانتسزين قالاسىندا تيانتسزين كاسىپتىك ۋنيۆەرسيتەتى مەن د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى قازاقستاندا ليۋبان شەبەرحاناسىن قۇرۋداعى ىنتىماقتاستىق بويىنشا ءوزارا تۇسىنىستىك تۋرالى مەموراندۋمعا قول قويدى، دەپ حابارلايدى قىتايدىڭ «حالىق» گازەتى اقپاراتتىق پورتالى.
اتالعان باسىلىمنىڭ كەلتىرگەن مالىمەتىنە سۇيەنسەك، ۋنيۆەرسيتەتتەر ماشينا جاساۋ سالاسىندا تەحنيكالىق كادرلاردى بىرلەسىپ دايارلاۋ ءۇشىن قىتايدىڭ وزىق تەحنولوگيالارى مەن جابدىقتارىن پايدالانۋ جونىندەگى جوبانى ءىس جۇزىندە ىسكە اسىرۋعا ۋاعدالاسقان. سونداي-اق، بولاشاقتا شەبەرحانا «ەلەكتروموبيلدەر»، «3D باسىپ شىعارۋ»، «ءوندىرىستى اۆتوماتتاندىرۋ» جانە باسقا دا سالالاردى قوسا العاندا، ىنتىماقتاستىقتى كەڭەيتۋدى جوسپارلاپ وتىر.
ايتا كەتەيىك، ليۋبان شەبەرحاناسى - قىتايداعى كاسىپتىك ءبىلىم بەرۋ سالاسىنداعى حالىقارالىق ىنتىماقتاستىق جوباسى. بۇل جوبا 2500-جىل بۇرىن ءومىر سۇرگەن ايگىلى قىتايلىق شەبەر جانە ونەرتاپقىش ليۋباننىڭ ەسىمىمەن اتالادى.
«جوبانىڭ ماقساتى - شەتەلدىك تەحنيكالىق كوللەدجدەر مەن ۋنيۆەرسيتەتتەرگە كاسىپتىك- تەحنيكالىق ءبىلىم بەرۋ ورتالىقتارىن بىرلەسىپ قۇرۋ ارقىلى كاسىپتىك جانە تەحنيكالىق كادرلاردى دايارلاۋعا كومەك كورسەتۋ. بۇگىنگى تاڭدا الەمنىڭ 21 ەلىندە 26 ليۋبان شەبەرحاناسى اشىلدى»، دەپ جازادى قىتايلىق ب ا ق.
سونداي-اق، «حالىق» گازەتىندە «قىتايدىڭ سيان قالاسىنان قازاقستاننىڭ سولتۇستىگىنە العاشقى مادەني پويىز اتتاندى» دەگەن تاقىرىپتاعى اقپارات جارىق كوردى.
قىتايلىق باسىلىمنىڭ دەرەگىنشە، بۇل پويىز سيان ايەلدەر فەدەراتسياسى سولتۇستىك قازاقستانداعى ايەلدەر مەن بالالارعا ارناپ دايىنداعان قىتايدىڭ ءداستۇرلى قولدان جاسالعان جىبەك ورامالدارى، كولەڭكەلى قۋىرشاقتار، قاعازدان جاسالعان حالىق قولونەرى جانە قولدان جاسالعان سابان كارتينالارى سياقتى ماتەريالدىق ەمەس مادەني مۇرالاردى تاسىمالدايدى.
موڭعوليادا سۋرەتكە ءتۇسىپ قالعان «جۇمباق» ءىلبىستى تابا الاسىز با - «Kaznews»
تابا الاسىز با؟ موڭعوليادا ءىلبىس سۋرەتكە ءتۇسىپ قالدى.
موڭعوليانىڭ «Kaznews» اقپاراتتىق پورتالىندا وسىنداي تاقىرىپتاعى اقپارات جارىق كوردى.
اتالعان اقپارات كوزىنىڭ دەرەگىنشە، ۇلىبريتانيالىق DailyMail باسىلىمى امەريكالىق فوتوگراف ماكسا ۆونىڭ سۋرەتىن جاريالاعان. سۋرەتتە التاي تاۋلارىنىڭ تاۋ-تاستى شاتقالىندا سيرەك كەزدەسەتىن ءىلبىس تۇسىرىلگەن.
ەرەكشە ءىلبىستى سۋرەتتەن تابۋ وڭايعا سوقپايدى. جىرتقىش باتىس موڭعوليانىڭ تاۋلى پەيزاجىندا مىقتى جاسىرىنعان.
«جۇمباققا جاسىرىلعان اڭ ءالى كۇنگە دەيىن الەمدەگى ەڭ از زەرتتەلگەن مىسىق تۇقىمداستارىنىڭ ءبىرى بولىپ ەسەپتەلەدى. بارىستى كورۋ - ۇلكەن ساتتىلىك. كوپتەگەن حالىقتار ءۇشىن بۇل جانۋار كۇشتىڭ، تەكتىلىكتىڭ جانە بيلىكتىڭ سيمۆولى»، دەپ جازادى موڭعوليالىق باسىلىم.
ايتا كەتەيىك، دۇنيەجۇزىلىك جابايى تابيعات قورى مالىمەتىنشە، ءىلبىستى حالىقارالىق تابيعاتتى قورعاۋ وداعىنىڭ (IUCN) قىزىل تىزىمىنە ەنگىزىلگەن جانە بۇل تىرشىلىك يەسى سيرەك كەزدەسەتىن نەمەسە جويىلىپ بارا جاتقان ءتۇر مارتەبەسىنە يە.
ءبىزدىڭ زامانىمىزدىڭ I- II عاسىرلارىنا جاتاتىن قۇمىرا تابىلدى - «ءو ز ا» اقپاراتتىق اگەنتتىگى
وزبەكستاننىڭ سۋرحانداريا وبلىسىنىڭ دەنوۆ اۋدانىندا ءبىزدىڭ زامانىمىزدىڭ I- II عاسىرلارىنا جاتاتىن قىش قۇمىرا ىدىس تابىلدى، دەپ حابارلايدى «ءو ز ا» اقپاراتتىق اگەنتتىگى.
كونە قۇمىرا اۋداننىڭ «قاراباق» اۋلىندا تابىلعان. ونى باحرام ابديمۋمينوۆ ەسىمدى ازامات ارىق قازۋ بارىسىندا تاۋىپ العان جانە قۇزىرلى ورگانعا حابارلاعان.
اتالعان اقپاراتتىق اگەنتتىكتىڭ مالىمەتىنشە، كونە زاتتىڭ تاريحي ماڭىزىن زەردەلەۋ ماقساتىندا تەرمەز ارحەولوگيالىق مۇراجايى مەن تەرمەز مەملەكەتتىك ۋنيۆەرسيتەتىنىڭ تاريحشىلارى ونى تولىعىمەن قازىپ الىپ، قالپىنا كەلتىرۋ جانە زەرتتەۋ ءۇشىن تەرمەز ارحەولوگيالىق مۇراجايىنا اكەلدى.
ايتا كەتەيىك، الدىن الا جۇرگىزىلگەن زەرتتەۋ ناتيجەلەرى بويىنشا قۇمىرا ءبىزدىڭ زامانىمىزدىڭ I- II عاسىرلارىنا جاتادى دەگەن بولجام جاسالدى. عالىمدار زەرتتەۋلەردى جالعاستىرۋدا.
جاس ونەرپازدار اراسىندا بايقاۋ وتەدى - «تامدى شارۋاگەرى»
وزبەكستاننىڭ تامدى اۋدانىنداعى بارلىق اۋىل ازاماتتارى جيىنىنداعى تالانتتى جاستار مەن ۇلتتىق اسپاپتاردىڭ قۇلاعىندا وينايتىن بولاشاق ءانشى-جىرشىلار 2023-جىلدىڭ 11- ناۋرىزىندا اۋداندىق مادەنيەت ۇيىندە باس قوسادى، دەپ حابارلايدى «تامدى شارۋاگەرى» گازەتى.
وزبەكستاندىق باسىلىمنىڭ دەرەگىنشە، اتالعان مادەني شارانىڭ ماقساتى - ۇلتىمىزدىڭ مۋزىكا ونەرىندەگى جىر-تەرمە باعىتىنداعى مۇرالارىن ساقتاۋ جانە كەيىنگى ۇرپاق اراسىندا ناسيحاتتاۋ، كاسىبي ءانشى-جىرشىلار مەن جاس ورىنداۋشىلاردىڭ ونەرىن دامىتۋ ەكەن.
حالىقارالىق دونورلار كونفەرەنتسياسى 20- ناۋرىز كۇنى وتەدى - TRT
تۇركيا مەن سيريادا 6- اقپان كۇنى ورتالىعى كاحرامانماراشتا بولعان جەر سىلكىنىسىنەن زارداپ شەككەن حالىق ءۇشىن 20- ناۋرىز كۇنى «حالىقارالىق دونورلار كونفەرەنتسياسى» وتەدى. تۇركيا مەن سيريادا بولعان ءزىلزالا كونفەرەنتسيانىڭ كۇن تارتىبىندە بولادى، دەپ حابارلايدى تۇركيا راديو تەلەۆيزيا پورتالى.
اتالعان باسىلىمنىڭ مالىمەتىنشە، ەۋروكوميسسيا 16- ناۋرىز كۇنى وتەتىنى جاريالانعان كونفەرەنتسيانىڭ 20- ناۋرىزعا قالدىرىلعانى حابارلاندى.
سونىمەن قاتار، تۇرىك مەكەمەلەرىمەن ۇيلەستىرىلەتىنى ايتىلعان كونفەرەنتسيانىڭ قوناقجايلىعىن ەۋروكوميسسياسى ءتورايىمى ۋرسۋلا فون دەر ليايەن مەن ە و- نىڭ كەزەكتى ءتوراعاسى شۆەتسيا پرەمەر-ءمينيسترى ۋلف كريستەرسسون جاسايدى.
ەۋروكوميسسياسىنىڭ مالىمدەمەسىندە كونفەرەنتسيانىڭ ەۋرووداققا مۇشە مەملەكەتتەر، ۇمىتكەر ەلدەر مەن الەۋەتتى ۇمىتكەرلەر، كورشى جانە سەرىكتەس ەلدەر، ۇلكەن جيىرمالىق ەلدەرىنىڭ مۇشەلەرى، پارسى شىعاناعى ىنتىماقتاستىق كەڭەسىنە مۇشە مەملەكەتتەر، بىرىككەن ۇلتتار ۇيىمى، حالىقارالىق ۇيىمدار، گۋمانيتارلىق جاردەم ۇيىمدارى جانە ەۋروپالىق قارجى مەكەمەلەرىنە اشىق ەكەنى جاريالاندى.
«TRT» - نىڭ دەرەگىنە سۇيەنسەك، اتالعان مالىمدەمەدە «ەۋرووداق جانە وعان مۇشە مەملەكەتتەر، تۇركياعا ودان ءارى كومەك كورسەتۋ، تۇركيانىڭ قالپىنا كەلتىرىلۋى جانە قايتا قۇرۋعا كومەكتەسۋ، سيرياعا گۋمانيتارلىق جاردەمدەردى ارتتىرۋ جانە وڭالتۋ ءۇشىن ەلەۋلى مىندەتتەمەلەر الۋعا نيەت بىلدىرەدى.
اۆتور بەيسەن سۇلتان