ءۇيدىڭ كەنجەلەرى تەنتەك بولادى. بۇل تۋرالى عالىمدار نە دەيدى؟
كوپبالالى انالاردان دا ءۇيدىڭ كەنجەسىن باسقالارىنا قاراعاندا تەنتەكتەۋ ەكەنىن ايتىپ جاتقانىن ەستۋگە بولادى. بۇل كەزدەيسوقتىق پا الدە ونىڭ عىلىمي دالەلى بار ما؟
امەريكاندىق پسيحولوگ فرەنك ساللوۋەي بالانىڭ دۇنيەگە كەلگەن رەتى ونىڭ تۇلعا رەتىندە قالىپتاسۋىنا جانە ارەكەتىنە اسەر ەتەتىنى جايلى گيپوتەزانى العاش بولىپ ۇسىندى. ول ءۇيدىڭ ۇلكەندەرى جىلدام كەلىسەتىن جانە وزدەرىن اتا-اناسىنىڭ نەمەسە قوعام تالاپتارىنا سايكەس ۇستاعىسى كەلەتىن بولادى دەپ بولجام جاسادى.
ءۇيدىڭ ۇلكەنى، ادەتتە، «وتباسىنىڭ ءۇمىتى» ءرولىن وينايدى، ال ولاردىڭ اتا-اناسىمەن قارىم-قاتىناسى ۇيلەسىمدى بولادى.
ال ءۇيدىڭ كەنجەلەرى تەنتەك، بۇلىكشى جانە ولار وزدەرىنىڭ ەرەكشەلىگىن، اعا-اپكەلەرىنە ۇقسامايتىنىن دالەلدەگىسى كەلەدى، اتا-اناسىمەن جانجالداسۋعا، وتباسىلىق جانە قوعامدىق نورمالاردى بۇزۋعا بەيىم، وزدەرىنە نازار اۋدارتقىش كەلەدى.
زەرتتەۋ
فرەنك ساللوۋەي تەورياسىنىڭ دۇرىستىعىن نەمەسە بۇرىستىعىن دالەلدەۋ ءۇشىن ءارتۇرلى زەرتتەۋلەر جۇرگىزىلىپ كەلدى. بۇل تاقىرىپتا جۇرگىزىلگەن جاڭا زەرتتەۋ بارىسىندا بريتان جانە پولياك پسيحولوگتار ەكى مىڭنان اسا ەرەسەك ادامداردىڭ مالىمەتتەرىنە اناليز جۇرگىزگەن.
عالىمدار ولاردىڭ وتباسىداعى رەتتىلىگىن، تۇلعالىق قاسيەتتەرىن جانە تاتۋيروۆكانىڭ بار-جوعىن سۇرادى.
ولار تاتۋيروۆكانى بۇلىكشى رۋحىنىڭ ءبىر بەلگىسى رەتىندە تاڭدادى. زەرتتەۋشىلەر تاتۋ ءۇيدىڭ ۇلكەندەرىنەن گورى كەنجەلەرىندە كوپ كەزدەسەدى دەپ كۇتتى.
الايدا ناتيجە ولار كۇتكەندەي بولمادى. تاتۋدىڭ بار بولۋى ءۇيدىڭ ۇلكەندەرى مەن كەنجەلەرىندە بىردەي بولىپ شىقتى.
ءۇيدىڭ كەنجەلەرى شىنىمەن دە تاۋەكەلدى ارەكەتكە بەيىم بولىپ شىقتى، ءبىراق ءۇيدىڭ ۇلكەندەرى وزدەرىنىڭ ەرەكشەلىگىن كورسەتۋگە ىنتالى ەكەنى بايقالدى.
زەرتتەۋ ناتيجەسى فرەنك ساللوۋەيدىڭ تەورياسىن دالەلدەگەن جوق. ياعني، بالانىڭ وتباسىدا نەشىنشى بولىپ دۇنيەگە كەلۋىنە قاراپ، ونىڭ تەنتەك نەمەسە زاڭعا باعىناتىن ادام بولىپ شىعاتىنىن بولجاۋ مۇمكىن ەمەس ەكەنىن كورسەتتى.
massaget.kz