انتاركتيكا مۇزىنىڭ كولەمى كىشىرەيىپ، رەكوردتىق دەڭگەيدە تومەندەدى

استانا. قازاقپارات - انتاركتيكاداعى تەڭىز مۇزىنىڭ كولەمى تاريحتاعى مينيمۋم دەڭگەيگە جەتتى، دەپ حابارلايدى قازاقپارات ب ۇ ۇ جاڭالىقتار ورتالىعىنا سىلتەمە جاساپ.

دۇنيەجۇزىلىك مەتەورولوگيالىق ۇيىمنىڭ (د م ۇ) حابارلاۋىنشا، جاھاندىق دەڭگەيدە وسىمەن بەسىنشى جىل قاتارىنان اقپان ايى وتە جىلى بولدى. ەكسترەمالدى تەمپەراتۋرا جانە جاۋىن-شاشىن كوپ بولدى، ال ەۋروپادا ەكىنشى ەڭ جىلى قىس تىركەلدى.

تەڭىز مۇزى جاھاندىق، ايماقتىق جانە جەرگىلىكتى اۋا رايىنا ۇلكەن اسەر ەتەدى. بۇل دۇنيەجۇزىلىك مەتەورولوگيالىق ۇيىمنىڭ جاھاندىق كليماتتىڭ جاي-كۇيى تۋرالى ەسەبىندەگى نەگىزگى كليماتتىق كورسەتكىش. تەڭىز مۇز ايماعىنىڭ وزگەرۋى ەكوجۇيەلەر مەن قوعام ءۇشىن اۋىر زارداپقا اكەلۋى مۇمكىن.

اركتيكانىڭ جىلىنۋى ورتاشا جاھاندىق جىلىنۋدان ەكى ەسە جىلدام جۇرۋدە. ناتيجەسىندە اركتيكالىق تەڭىز مۇزى 45 جىلدىق سپۋتنيكتىك باقىلاۋ بارىسىندا كۇرت تومەندەدى. باقىلاۋ تاريحىندا اقپانداعى قىستىڭ سوڭعى ايازىندا تەڭىز مۇزىنىڭ اۋدانى رەكوردتىق دەڭگەيدە تومەندەدى.

قاڭتار مەن اقپاندا انتاركتيكالىق تەڭىز مۇزى كولەمىنىڭ تومەندەۋى رەكوردتىق دەڭگەيگە جەتتى. اقپاننىڭ اياعىندا مۇز 1,83 ميلليون شارشى شاقىرىمدى قۇرادى. بۇل 2022-جىلدىڭ اقپانىندا تىركەلگەن رەكوردتىق ەڭ تومەنگى دەڭگەيدەن 93000 شارشى شاقىرىمعا تومەن.

وتكەن جىلى انتاركتيداداعى تەڭىز مۇزىنىڭ اۋدانى جالپى العاندا تومەن بولدى. ال جاڭا مۇز ادەتتەگىدەن جۇقا ءارى سىنعىش كەلدى. سونىمەن قاتار، انتاركتيكا تۇبەگى (وڭتۇستىك امەريكاعا جاقىن سولتۇستىك-باتىس شەتى) پلانەتانىڭ ەڭ جىلدام جىلىناتىن ايماقتارىنىڭ ءبىرى - سوڭعى 50 جىل ىشىندە شامامەن 3 گرادۋس.

ەسكە سالساق، بۇعان دەيىن انتاركتيداداعى برانت شەلفتىك مۇزدىعىنان كولەمى ۇلكەن لوندونمەن بىردەي ايسبەرگ بولىنگەنى تۋرالى حابارلاعان ەدىك.