سەنات: تالداۋ مەكتەبىنىڭ ەكىنشى كەزەڭى اياقتالدى

استانا. قازاقپارات - سەنات جانىنداعى جاس ساراپشىلار كلۋبىنىڭ باستاماسىمەن، پالاتا ءتوراعاسى ماۋلەن اشىمبايەۆتىڭ قولداۋىمەن قۇرىلعان تالداۋ مەكتەبىنىڭ ەكىنشى كەزەڭىندەگى وقىتۋ كۋرسى اياقتالدى.

بۇل تۋرالى قازاقپارات پالاتانىڭ باسپا ءسوز قىزمەتىنە سىلتەمە جاساپ حابارلايدى.

ەكى ايعا جالعاسقان ەكىنشى كەزەڭدە تالداۋ مەكتەبىنىڭ تىڭداۋشىلارى اناليتيكالىق ماتەريالدار دايارلاۋدىڭ ءتۇرلى داعدىلارىن مەڭگەرىپ، قابىلەتتەرىن جەتىلدىردى. بۇگىن وقىتۋ كۋرسىنىڭ سوڭعى دارىسىندە تىڭداۋشىلار كوماندالىق جوبالارىن ۇسىندى.

تالداۋ مەكتەبىنىڭ العاشقى كەزەڭىندەگىدەي بۇل جولى دا 8 اپتالىق كۋرس تەوريالىق جانە پراكتيكالىق بلوكتارعا ءبولىندى. ءدارىس وقۋ ءۇشىن بەلگىلى قازاقستاندىق جانە شەتەلدىك ساراپشىلار شاقىرىلدى. ولار ءتۇرلى اناليتيكالىق ادىستەر مەن تاسىلدەر تۋرالى دارىستەر وقىپ، شەبەرلىك ساباقتارى مەن ترەنينگتەر وتكىزدى. ساباقتار قازاق، ورىس جانە اعىلشىن تىلدەرىندە جۇرگىزىلدى.

ەكىنشى كەزەڭنىڭ سوڭعى كۇنىندە ماۋلەن اشىمبايەۆ اناليتيكالىق تاسىلدەردى كۇشەيتۋدىڭ ماڭىزدى ەكەنىن ايتىپ، كوماندالىق جوبالاردى قورىتىندىلادى. وقىتۋ كۋرسىنىڭ باسىندا ىرىكتەۋدەن وتكەن 60 قاتىسۋشى ون كومانداعا بولىنگەن ەدى. ولاردىڭ ءارقايسىسى ايماقتىق ماسەلەلەردىڭ ءبىر باعىتىنا ارنالعان تاقىرىپتاردى تاڭداپ الدى.

«تالداۋ مەكتەبىنىڭ ەكىنشى كەزەڭى قازاقستاننىڭ وڭىرلىك دامۋ ماسەلەلەرى مەن پەرسپەكتيۆالارىنا ارنالدى. كۋرس اياسىندا 32 ساعاتتى قۇراعان دارىستەر، شەبەرلىك ساباقتارى جانە ترەنينگتەر وتكىزىلدى. تىڭداۋشىلارعا بەلگىلى وتاندىق جانە شەتەلدىك ساراپشىلار، اناليتيكتەر جانە عالىمدار ءدارىس وقىدى. وسى جوبا سىزدەردىڭ كاسىبي مامان جانە تۇلعا رەتىندە قالىپتاسۋلارىڭىزعا ءوزىنىڭ زور سەپتىگىن تيگىزەدى دەپ ۇمىتتەنەمىن. سول جولدا ساتتىلىك تىلەيمىن»، - دەدى سەنات ءتوراعاسى.

سونىمەن قاتار، ماۋلەن اشىمبايەۆ الداعى ۋاقىتتا مەكتەپتىڭ جۇمىسى ءتۇرلى فورماتتا جالعاساتىنىن جانە وعان قاتىسۋشىلار سەناتتىڭ زاڭ شىعارۋ قىزمەتى مەن پالاتا ىسكە اسىراتىن جوبالارعا جۇمىلدىرىلاتىنىن ايتتى.

وقىتۋ كۋرسىنىڭ قورىتىندى كۇنىندە تىڭداۋشىلار ءۇشىن جۋرناليست ەربولات مۇحامەدجان مەن ساياساتتانۋشى عازيز ابىشيەۆ توك-شوۋ فورماتىندا ترەنينگ وتكىزدى. سونىڭ اياسىندا قاتىسۋشىلار تالداۋ بارىسىندا پىكىرتالاس ادىستەرىن جانە كوپشىلىك الدىندا سويلەۋ داعدىلارىن ءىس جۇزىندە قولداندى.

ايتا كەتەيىك، تالداۋ مەكتەبىنىڭ ەكىنشى كەزەڭىندەگى دارىستەر YouTube پلاتفورماسىنداعى رەسمي ارناسىندا جاريالانادى.