ۇلىتاۋ وبلىسىندا سالىناتىن مەديتسينالىق نىساندارعا ءبىر اپتادا جەر ۋچاسكەسى ءبولىنۋى ءتيىس - پرەمەر
بۇل تۋرالى پرەمەر-مينيستر ءاليحان سمايىلوۆتىڭ توراعالىعىمەن وتكەن پرەزيدەنت ق. توقايەۆتىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتابتىڭ وتىرىسىندا ايتىلدى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.
دەنساۋلىق ساقتاۋ ءمينيسترى اجار عينيات وتكەن جىلدىڭ قاراشا ايىندا اۋىلداعى مەديتسينالىق كومەكتىڭ ساپاسىن ارتتىرۋ ماقساتىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى بەكىتىلگەنىن باياندادى. ونىڭ اياسىندا وڭىرلەردە 655 العاشقى مەديتسينالىق-سانيتارلىق كومەك نىسانىن، ونىڭ ىشىندە 253 مەديتسينالىق پۋنكت، 242 فەلدشەرلىك-اكۋشەرلىك پۋنكت جانە 160 دارىگەرلىك امبۋلاتوريا سالۋ كوزدەلىپ وتىر.
بۇدان باسقا 32 كوپبەيىندى ورتالىق اۋداندىق اۋرۋحانانى (2024-جىلى – 7، 2025-جىلى - 25) جاڭارتۋ جوسپارلانعان. وندا ينسۋلت ورتالىقتارى، كارديولوگيا، جان ساقتاۋ جانە وڭالتۋ بولىمشەلەرى اشىلىپ، ولار ك ت، م ر ت، ۋ د ز، ءو ج ج اپپاراتتارىمەن جاراقتاندىرىلماق. سونىمەن قاتار، اۋىلدىق دەنساۋلىق ساقتاۋ وبەكتىلەرى ءۇشىن 1100 مەديتسينا قىزمەتكەرى دايارلانادى.
جۇرگىزىلىپ جاتقان جۇمىستار تۋرالى اباي وبلىسىنىڭ اكىمى نۇرلان ۇرانحايەۆ، قاراعاندى وبلىسىنىڭ اكىمى ەرماعانبەت بولەكپايەۆ جانە ۇلىتاۋ وبلىسى اكىمىنىڭ ورىنباسارى ۇلانتاي ۇسەنوۆ بايانداما جاسادى.
پرەمەر-مينيستر بيىل قۇرىلىسى باستالاتىن مەديتسينالىق نىسانداردىڭ بارلىعىنا دەرلىك جەر بولىنگەنىن اتاپ ءوتتى. تەك، ۇلىتاۋ وبلىسىندا عانا اتالعان جۇمىستار جالعاسىپ جاتىر.
«اكىمدىك جەر ۋچاسكەسىن ءبولۋ جۇمىستارىن ءبىر اپتا ىشىندە اياقتاۋى ءتيىس»، - دەدى ءاليحان سمايىلوۆ.
سونىمەن قاتار، ۇكىمەت باسشىسى 1- ساۋىرگە قاراي العاشقى كومەك كورسەتۋ وبەكتىلەرىن سالۋ بويىنشا جوبالاۋ-سمەتالىق قۇجاتتامانى ازىرلەۋدى اياقتاۋ، 1- مامىرعا دەيىن كوپبەيىندى اۋداندىق اۋرۋحانالاردى كۇردەلى جوندەۋ جانە قايتا جاڭارتۋ ءۇشىن قۇجاتتامانى ازىرلەۋ قاجەتتىگىن ايتتى. قۇرىلىس ماۋسىمى باستالعاننان كەيىن بارلىق ءوڭىر جوبالاردى ىسكە اسىرۋعا كىرىسۋى كەرەك.
وعان قوسا، پرەمەر-مينيستر جوسپارلانعان شارالاردى ۋاقتىلى ىسكە اسىرۋ ءۇشىن قۇرىلىس ۋچاسكەلەرىنە دەيىن ينجەنەرلىك كوممۋنيكاتسيالار مەن جولداردى جەدەل جۇرگىزۋ، مەردىگەرلەرمەن شارتتار جاساسۋ كەرەكتىگىن ايتتى.
ءاليحان سمايىلوۆتىڭ ايتۋىنشا، جاڭا مەديتسينالىق نىسانداردى كادرلارمەن قامتاماسىز ەتۋدى الدىن الا قاراستىرىپ، ولارعا الەۋمەتتىك قولداۋ شارالارىنىڭ تولىق پاكەتىن ۇسىنۋ قاجەت.
«تاعى دا اتاپ وتەمىن، ۇلتتىق جوبانى ىسكە اسىرۋدىڭ ءاربىر كەزەڭىن جوبالىق باسقارۋ جۇيەسى شەڭبەرىندە تۇراقتى باقىلاۋعا الامىز»، - دەدى ۇكىمەت باسشىسى.