الماتىدا كۇشتى ءارى جويقىن جەر سىلكىنىسى كۇتىلمەيدى - سەيسمولوگ

الماتى. قازاقپارات - بيىل الماتىدى بولجامدىق پوليگوننىڭ اۋماعىندا كۇشتى ءارى جويقىن جەر سىلكىنىسى كۇتىلمەيدى.

بۇل تۋرالى بريفينگ بارىسىندا سەيسمولوگيا ينستيتۋتىنىڭ ديرەكتورى داۋلەت سارسەنبايەۆ ايتتى، دەپ حابارلايدى قازاقپارات ءتىلشىسى.

«2023-جىلى الماتى بولجامدىق پوليگونىنىڭ اۋماعىندا 0,7 ىقتيمالدىعىمەن Мѕ 5,6 ماگنيتۋداسى، MSK-64 شكالاسى بويىنشا 7 جانە ودان جوعارى قارقىندىلىعى بار كۇشتى جەر سىلكىنىسى كۇتىلمەيدى»، - دەدى سپيكەر.

ول سونداي-اق قالا تۇرعىندارىن ۇرەيگە بوي الدىرماۋعا شاقىردى.

«تۇركيا مەن سيرياداعى جويقىن جەر سىلكىنىستەرىنەن سوڭ، تاجىكستان، يتاليا مەن باسقا دا ەلدەردە تىركەلگەن سەيسميكالىق وقيعالاردان سوڭ، ەل ازاماتتارىن سابىرعا شاقىرىپ، ب ا ق- تا ايتىلىپ جاتاتىن دۇربەلەڭ مەن ارانداتۋشىلىق شابۋىلعا بوي الدىرماۋعا شاقىرعىم كەلەدى. قالا تۇرعىندارىنا بيىل الماتى بولجامدىق پوليگونىنىڭ اۋماعىندا كۇشتى جانە جويقىن جەر سىلكىنىسى كۇتىلمەيدى.

بۇگىن بىزدە بولجامدىق كوميسسيانىڭ وتىرىسى ءوتتى. جيىننىڭ قورىتىندىسى بويىنشا الماتى قالاسى مەن الماتى وبلىسى اۋماعىندا كۇشتى ءارى جويقىن جەر سىلكىنىسى بولمايدى دەگەن پايىمعا توقتادىق. الداعى اپتادا ءبىزدىڭ ءوڭىر ءۇشىن قالىپتى جاعداي بولىپ سانالاتىن 3 بالعا دەيىنگى شامالى تەربەلىستەر بولۋى مۇمكىن»، - دەدى داۋلەت سارسەنبايەۆ.

بۇگىندە الماتى قالاسى، الماتى جانە جەتىسۋ وبلىستارى كىرەتىن بولجامدىق پوليگوننىڭ اۋماعىندا 47 ستانتسيا جۇمىس ىستەيدى.

سپيكەردىڭ مالىمەتىنشە، سەيسمولوگيا ينستيتۋتىنىڭ بازاسىندا تۇراقتى بولجامدى كوميسسيا ەڭبەك ەتەدى. ونىڭ قۇرامىنا ءتورت عىلىمي زەرتحانا مەن سەيسمولوگيالىق تاجىريبەلىك- ادىستەمەلىك ەكسپەديتسياسىنىڭ (س ت ءا ە) قىزمەتكەرلەرى كىرەدى.