تۇركيا مەن سيرياداعى تابيعي اپاتتار اسىرەسە الماتى ءۇشىن ۇلكەن ساباق بولۋى ءتيىس - ۇكىمەت باسشىسى
ۇكىمەتتىڭ باسپا ءسوز قىزمەتى تاراتقان مالىمەتتەرگە قاراعاندا، جالاقىنىڭ ءوسۋ قارقىنى بويىنشا الماتى سوڭعى 10 جىلدا رەسپۋبليكالىق ورتاشا دەڭگەيدەن تومەن بولىپ كەلەدى.
«الماتىلىقتاردىڭ ناقتى اقشالاي كىرىستەرىنىڭ جىل سايىنعى ءوسۋىن قامتاماسىز ەتۋ قاجەت. بۇل - كەشەندى جۇمىس. ەڭ الدىمەن، جالاقىسى جوعارى جاڭا جۇمىس ورىندارىن قۇرۋعا جانە ينۆەستيتسيالار تارتۋدىڭ جوعارى قارقىنىن ساقتاپ قالۋعا كوڭىل ءبولۋ كەرەك»، - دەدى ءاليحان سمايىلوۆ.
ونىڭ ايتۋىنشا، حالىقتىڭ تابىسىن ارتتىرۋ جۇمىستارى ينفلياتسيانى تەجەۋ شارالارىن جۇزەگە اسىرۋمەن تىكەلەي بايلانىستى. سوندىقتان جەرگىلىكتى الىپساتارلاردىڭ ارەكەتى تەك قالادا عانا ەمەس، بۇكىل رەسپۋبليكا بويىنشا ازىق- تۇلىك پەن باسقا دا تاۋارلاردىڭ قۇنىنا اسەر ەتەتىندىكتەن، بازارلارداعى، ونىڭ ىشىندە «التىن ورداداعى» باعا بەلگىلەۋدى ءجىتى قاداعالاۋ قاجەت.
پرەمەر-مينيستر سونىمەن قاتار باسەكەلەستىكتى دامىتۋ ءۇشىن الماتى اگلومەراتسياسىنىڭ شىعىس جانە سولتۇستىك بولىكتەرىندە قوسىمشا ساۋدا الاڭدارىن قۇرۋ ماسەلەسىن پىسىقتاۋ، سونداي-اق دەلدالدىق سحەمالاردى انىقتاۋ بويىنشا وڭىرلىك كوميسسيانىڭ ءتيىمدى جۇمىسىن قامتاماسىز ەتۋ قاجەتتىگىن ايتتى.
پرەمەر-مينيستر سەيسميكالىق قاۋىپسىزدىك ماسەلەلەرىنە ەرەكشە نازار اۋداردى. ونىڭ ايتۋىنشا، تۇركيا مەن سيريادا بولعان تابيعي اپاتتار ءبىزدىڭ ەلىمىز ءۇشىن، اسىرەسە الماتى ءۇشىن ۇلكەن ساباق بولۋى ءتيىس.
ول سوڭعى رەت قالاداعى نىسانداردى پاسپورتتاۋ 2017 جانە 2018-جىلدارى جۇرگىزىلگەنىن اتاپ ءوتتى. وسىعان بايلانىستى توتەنشە جاعدايلار مينيسترلىگى مەن قالا اكىمدىگى بىرلەسىپ، قىسقا مەرزىمدە اۋديت جۇرگىزىپ، سەيسميكالىق قاۋىپسىزدىكتى كۇشەيتۋ جونىندەگى پارمەندى شارالاردى ىسكە اسىرۋى ءتيىس.
«بۇل ماسەلەلەردە الەمدىك تاجىريبەنى تەك الماتىدا عانا ەمەس، ەلىمىزدىڭ جەر سىلكىنىسىنە ۇشىراۋى ىقتيمال باسقا دا وڭىرلەرىندە پايدالانۋ قاجەت. ۋاكىلەتتى مەملەكەتتىك ورگاندار بۇعان دەيىن الىنىپ تاستالعان جوبالاۋ، قۇرىلىس جانە باقىلاۋ پروتسەستەرىن زاڭنامالىق تۇرعىدا قاتاڭداتۋ ماسەلەسىن شۇعىل تۇردە قاراستىرۋى كەرەك»، - دەدى ءاليحان سمايىلوۆ.