ماڭعىستاۋدا امال مەرەكەسى قالاي تويلانادى
13-ناۋرىز كۇنى ءابىش كەكىلباي ۇلى اتىنداعى وبلىستىق تاريحي- ولكەتانۋ مۋزەيى الاڭىندا «امال - الاشقا ورتاق مەرەكە» مادەني كوپشىلىك شاراسى، ماڭعىستاۋ اۋدانىنداعى «قاراشاڭىراق» الاڭىندا «استانا سازى» فولكلورلىق ءانسامبلىنىڭ كونسەرتى مەن قاراقالپاقستاننىڭ حالىق جىراۋى جەڭىسبەك پيازوۆتىڭ كەشى وتەدى.
سونىمەن قاتار 13-ناۋرىزدا وتپانتاۋ تاريحي مادەني كەشەنىندە سپورتتىق ءىس- شارالار دا ۇيىمداستىرىلادى.
ونىڭ ىشىندە ات شەرۋى، «وشاق بايگە»، «قازاق كۇرەسى»، «كوكپار»، «اۋدارىسپاق» جارىستارى بار.
ال، 14-ناۋرىز كۇنى تازى جۇگىرتۋ، بۇركىت سالۋ، تاي جارىس، قۇنان بايگە مەن الامان بايگەسى وتەدى.
«جوسپارلانعان ءىس- شارالار اياسىندا تۇساۋ كەسۋ ءراسىمى، تەاترلاندىرعان قويىلىمدار، «سالەم - ءسوزدىڭ اتاسى» مەرەكەلىك شاراسى مەن «قارا قازاننان ءدام تاتۋ» مادەني- كوپشىلىك شاراسى بولادى. بۇل ءىس- شارالاردىڭ ءبارى «قاراشاڭىراق» الاڭىندا وتەدى»، - دەدى ماڭعىستاۋ وبلىستىق مادەنيەت، ارحيۆتەر جانە قۇجاتتاما باسقارماسىنىڭ ءبولىم باسشىسى اسەم ءاشىروۆا.
سونداي- اق، مەرەكە اياسىندا وبلىستا اداي اتا رۋحىنا قۇران باعىشتالىپ، اس بەرىلىپ، قۇراندى جاتقا وقۋدان قاريلار اراسىندا وبلىستىق دەڭگەيدەگى جارىس وتكىزۋ كوزدەلىپ وتىر.
«امال مەرەكەسىن تويلاۋ تەك كونسەرتتىك باعدارلامامەن شەكتەلمەيدى. 13-ناۋرىزدا قوناق رەتىندە ارنايى تۇركيا، ازەربايجان عالىمدارىن شاقىرتتىق. ونىڭ ىشىندە ەلىمىزدىڭ دە بەلگىلى عالىمدارى بار. قوناقتاردى وتپانتاۋ تاريحي- مادەني كەشەنىندە قارسى الىپ، «ۇلىستىڭ ۇلى كۇنى: تاريح تاعىلىمى مەن جاڭا كوزقاراستار» دوڭگەلەك ۇستەلىن وتكىزۋ مەن «بىرلىك وتىن» جاعۋ جوسپارلانىپ وتىر»، - دەدى اسەم ءاشىروۆا.