وقۋ- اعارتۋ مينيسترلىگى وقۋشىلارعا كومەك كورسەتۋدىڭ جاڭا ءتاسىلىن ۇسىندى

None
استانا. قازاقپارات - وقۋ- اعارتۋ مينيسترلىگى وقۋشىلارعا كومەك كورسەتۋدىڭ جاڭا ءتاسىلىن ۇسىندى، دەپ حابارلايدى قازاقپارات.

وقۋ- اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ اقپاراتىشا، ورتا ءبىلىم بەرۋ ۇيىمدارىنا ارنالعان مەكتەپىشىلىك ەسەپكە الۋدى جۇرگىزۋ بويىنشا ادىستەمەلىك ۇسىنىمدار ازىرلەنىپ، بەكىتىلدى. ول ەرەكشە نازار اۋدارۋدى جانە ءبىلىم بەرۋ ۇيىمدارىنىڭ كومەگىن قاجەت ەتەتىن بالالاردى قامتيدى.

مەكتەپىشىلىك ەسەپكە ۇلگەرىمى تومەن، ساباقتان ءجيى قالاتىن، مەكتەپ جارعىسىن جانە ىشكى ءتارتىپ ەرەجەلەرىن بۇزاتىن وقۋشىلار الىنادى.

كوميتەت ءتوراعاسىنىڭ ورىنباسارى يۋليا وۆەچكينانىڭ ايتۋىنشا، مەكتەپىشىلىك ەسەپ ەرەكشە پەداگوگيكالىق نازاردى، كەشەندى قولداۋدى قاجەت ەتەتىن كامەلەتكە تولماعانداردى ۋاقتىلى انىقتاۋعا كومەكتەسەدى.

«بۇگىنگى تاڭدا بارلىق مەكتەپتەر مەكتەپىشىلىك ەسەپ جۇرگىزۋدى باستادى. مەكتەپىشىلىك ەسەپكە الۋدىڭ ءبىرىڭعاي ءتاسىلىن قالىپتاستىرۋ ماقساتىندا ءبىز ءتيىستى ادىستەمەلىك ۇسىنىمدار ازىرلەدىك. ەندى مەكتەپىشىلىك ەسەپتە تۇرعان ءاربىر بالاعا قوسىمشا ساباقتار ۇيىمداستىرىپ، بالانىڭ شىعارماشىلىق، سپورتتىق الەۋەتىن اشۋدى، الەۋمەتتىك جانە پسيحولوگيالىق- پەداگوگيكالىق قولداۋ كورسەتۋدى قامتيتىن جان- جاقتى كومەك كورسەتىلەتىن بولادى. وقۋشىلاردى ەسەپكە الۋ تۋرالى شەشىمدى ءبىلىم بەرۋ ۇيىمىنىڭ الدىن الۋ كەڭەسى قابىلدايدى»، - دەيدى يۋليا وۆەچكينا.

ايتا كەتەيىك، مەكتەپىشىلىك ەسەپكە الۋ ءبىلىم بەرۋ ۇيىمىندا عانا جۇزەگە اسادى. ونىڭ باستى ماقساتى - بالاعا جەكە الەۋمەتتىك جانە پسيحولوگيالىق- پەداگوگيكالىق كومەك كورسەتۋ، سونداي- اق قۇقىق بۇزۋشىلىقتىڭ الدىن الۋ.

سوڭعى جاڭالىقتار