بياتلوننان الەم چەمپيوناتىنا قاتىسۋشىلار كوكشەنىڭ كورىكتى جەرلەرىن ارالادى

بۋراباي. قازاقپارات - «بۋراباي دامۋ» كاسىپورنى شۋچينسك قالاسىندا ءوتىپ جاتقان الەم چەمپيوناتىنىڭ قاتىسۋشىلارىنا ارناپ ۇلتتىق پاركتىڭ كورىكتى جەرلەرىنە ەكسكۋرسيا ۇيىمداستىردى، دەپ حابارلايدى قازاقپارات.

سۇلۋ كوكشەنىڭ ەتەگىندەگى بياتلون جارىسىنا الەمنىڭ 40 ەلىنەن سپورتشىلار قاتىسىپ جاتىر.

ولار جارىس كۇندەرى مەن جاتتىعۋ اراسىندا قازاقستاننىڭ اسەم تابيعاتىن ارالاۋعا قۋانا كەلىستى.

شەتەلدىكتەردى بۋرابايدىڭ كورىكتى تابيعاتى مەن قازاق حالقىنىڭ قوناقجاي پەيىلى تاڭعالدىردى.

- قازاقستانعا كەلەمىن دەپ ەشقاشان ويلاماعان ەدىم. بۇل ەل تۋرالى بىلەتىنىم دە از بولاتىن. كەرەمەت ەل ەكەن. بۋرابايدىڭ ورماندارى مەن كولدەرى كاناداعا قاتتى ۇقسايدى. ءتىلىمىز بولەك بولعاندىقتان جەرگىلىكتى ادامدارمەن قارىم-قاتىناس جاساۋ قيىنداۋ، ءبىراق سوعان قاراماستان كەرەمەت اسەر الدىم. الداعى ۋاقىتتا تاعى وسىندا جولىم تۇسەدى دەپ ۇمىتتەنەمىن، - دەيدى ۆانكۋۆەردەن كەلگەن كانادالىق بياتلونشى تايلەر برينۆۋد.

يتاليا قۇراماسىنىڭ مۇشەسى پەترو دا بۋرابايدىڭ وزدەرى ءۇشىن ەرەكشە مەكەنگە اينالعانىن ايتتى.

- وسى چەمپيوناتتان ازىرگە 2 مەدال الدىق. 12- ناۋرىزدا جارىس اياقتالعانعا دەيىن تاعى دا جۇلدە الامىز دەگەن ءۇمىتىمىز بار. جەرگىلىكتى اسەم تابيعاتتى ارالاپ، كەرەمەت اسەرگە بولەندىك. وتە مەيىرىمدى ءارى قوناقجاي ادامدارمەن تانىستىق. يتالياعا قازاقستان تۋرالى كەرەمەت ەستەلىكتەرمەن قايتاتىن بولدىق، - دەيدى ول.