ەلىمىزدە نەسيەنىڭ جىلدىق پايىزدىق مولشەرلەمەسى تومەندەتىلەدى
10 ناۋرىز, 17:43

ەلىمىزدە نەسيەنىڭ جىلدىق پايىزدىق مولشەرلەمەسى تومەندەتىلەدى

استانا. قازاقپارات - قازاقستاندا تۇتىنۋشىلىق نەسيەنىڭ جىلدىق پايىزدىق مولشەرلەمەسى 8 پايىزعا تومەندەيدى.

قوعامدىق تالقىلاۋعا ۇسىنىلعان بۇل جوبا «اشىق ن ق ا» پورتالىندا جاريالاندى.

بۇل وزگەرىس سىياقىنىڭ شەكتى جىلدىق ءتيىمدى مولشەرلەمەسىن تومەندەتۋ ماقساتىندا قابىلدانباق. بۇيرىققا سايكەس، ەكىنشى دەڭگەيلى بانكتەر، بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار بەرەتىن بانك قارىزدارى بويىنشا كەپىلسىز بانك قارىزدارىن 44 پايىزعا، كەپىلمەن قامتاماسىز ەتىلگەن بانك قارىزدارىن 40 پايىزعا تومەندەتەدى.

سونىمەن قاتار، يپوتەكالىق تۇرعىن ءۇي قارىزدارى بويىنشا 25 پايىز، ميكروقارجىلىق قىزمەتتى جۇزەگە اسىراتىن ۇيىمدار بەرەتىن ميكرونەسيەلەر 44 پايىز بولىپ بەكىتىلمەك.

بانك قارىزى شارتىن، ميكرونەسيە بەرۋ تۋرالى شارتتى جاساۋ، بانك قارىزىن بەرۋمەن جانە قىزمەت كورسەتۋمەن بايلانىستى بانك قارىزى، ميكرونەسيە بويىنشا سىياقى مولشەرلەمەسى وزگەرگەن جانە كوميسسيالار مەن وزگە تولەمدەر وزگەرگەن نەمەسە جاڭادان ەنگىزىلگەن كۇنى سىياقىنىڭ جىلدىق ءتيىمدى مولشەرلەمەسى وسى تارماقتا بەكىتىلگەن شەكتى مولشەردەن اسىپ كەتە المايدى، - دەلىنگەن قۇجاتتا.

ايتا كەتەيىك، بۇعان دەيىن كەپىلسىز بانك قارىزدارى مەن ميكروقارجىلىق قىزمەتتى جۇزەگە اسىراتىن ۇيىمدار بەرەتىن ميكرونەسيەلەردىڭ مولشەرلەمەسى 56 پايىز ەدى.

جوبا 29- ناۋرىزعا دەيىن قوعامدىق تالقىلاۋدا بولادى.

جاڭالىقتار