داۋلەت تۇرلىحانوۆتىڭ ۇلىنا قاتىستى ءىس: كۇتپەگەن دەرەكتەر پايدا بولدى

استانا. قازاقپارات - بەلگىلى زاڭگەر ولەگ چەرنوۆ پەن ونىڭ ايەلىنە داۋلەت تۇرلىحانوۆتىڭ ۇلىمەن توبەلەس بويىنشا سوت-مەديتسينالىق ساراپتامالار تاعايىندالدى.

بۇل تۋرالى باس اسكەري پروكۋراتۋرا حابارلادى.

«سوتالدى تەرگەپ-تەكسەرۋ اياسىندا سوت-مەديتسينالىق ساراپتامالار تاعايىندالدى، قاداعالاۋشى پروكۋرور وقيعانىڭ بارلىق ءمان-جايىن انىقتاۋعا جازباشا نۇسقاۋ بەردى»، - دەلىنگەن Tengrinews.kz ءتىلشىسىنىڭ رەسمي ساۋالىنا بەرگەن باس اسكەري پروكۋراتۋرا جاۋابىندا.

ۆەدومستۆودا داۋلەت تۇرلىحانوۆتىڭ ۇلىنا قاتىستى ءىستىڭ جاي-جاپسارى دا ايتىلدى. اسكەري پروكۋراتۋرا مالىمەتىنشە، 11- اقپانعا قاراعان ءتۇنى الماتىداعى ءال-فارابي داڭعىلىندا ويىن-ساۋىق ورىندارىنىڭ ءبىرىنىڭ ماڭىندا قورعانىس مينيسترلىگىنە قاراستى 30212 اسكەري ءبولىمىنىڭ اسكەري قىزمەتشىسى دەمالىستا جۇرگەن قاتارداعى بولات ن. د. مەن ازامات ولەگ چەرنوۆ اراسىندا جانجال شىققان.

«جانجال كەزىندە بولات چەرنوۆ پەن ونىڭ ايەلى چەرنوۆاعا بىرنەشە سوققى جاساعان. بيىل 11- اقپانىندا وسى فاكت بويىنشا الماتى قالالىق پوليتسيا دەپارتامەنتىنىڭ بوستاندىق اۋداندىق پوليتسيا ءبولىمى بولاتقا قاتىستى قازاقستان رەسپۋبليكاسى قىلمىستىق كودەكسىنىڭ 293-بابى 1-بولىگى («بۇزاقىلىق») بويىنشا سوتالدى تەرگەۋ امالدارىن تىركەدى. كەيىننەن بولات اسكەري قىزمەتكەر بولعاندىقتان، قىلمىستىق ءىس الماتى وبلىستىق گارنيزونى اسكەري پوليتسيا باسقارماسى قاراۋىنا بەرىلدى»، - دەدى باس اسكەري پروكۋراتۋرا وكىلدەرى.

ەسكە سالايىق، بۇعان دەيىن الماتىدا اسكەري قىزمەتكەر بەلگىلى زاڭگەردى سوققىعا جىققانى حابارلانعان بولاتىن.

بۇل وقيعا تۋرالى زاڭگەر ولەگ چەرنوۆتىڭ ايەلى اننا ديميتريەۆيچ Facebook-پاراقشاسىندا جازعان. ولار تاكسيگە وتىرا بەرگەندە ءبىر جىگىت جۇگىرىپ كەلىپ، سوققىعا جىعىلعان قىزعا كومەكتەسۋىن سۇراعان. الماتى پ د بۇل دەرەك ق ر قىلمىستىق كودەكستىڭ 293-بابى «بۇزاقىلىق» بويىنشا سوتالدى تەرگەۋدىڭ ءبىرىڭعاي تىزىلىمىنە تىركەلگەنىن حابارلايدى. قىلمىستىق ءىس بويىنشا العاشقى تەرگەۋ ارەكەتتەرى جۇرگىزىلىپ، ساراپتامالار تاعايىندالعان.

كۇدىكتى اسكەري ادام بولعاندىقتان، قازىر ءىس ماتەريالدارى سوتتىلىعىن انىقتاۋ ءۇشىن قالالىق پروكۋراتۋراعا جىبەرىلگەنى ايتىلدى.