گەوساياسي جاعدايعا بايلانىستى ەۋروپالىق كومپانيالار قازاقستانعا كەلۋگە نيەت بىلدىرۋدە

استانا. قازاقپارات - ايماقتاعى گەوساياسي جاعدايعا بايلانىستى كوپتەگەن ەۋروپالىق كومپانيالار ءبىزدىڭ ەلگە كەلۋگە نيەت بىلدىرۋدە.

ورتالىق كوممۋنيكاتسيالار قىزمەتىندە وتكەن بريفينگىدە سىرتقى ىستەر ءمينيسترىنىڭ ورىنباسارى رومان ۆاسيلەنكو وسىلاي ءمالىم ەتتى، دەپ حابارلايدى قازاقپارات ءتىلشىسى.

«ايماقتاعى گەوساياسي جاعدايعا بايلانىستى كوپتەگەن ەۋروپالىق كومپانيالار ءبىزدىڭ ەلگە كەلۋگە اسا زور قىزىعۋشىلىق تانىتۋدا. بۇگىنگى تاڭدا ۇلىبريتانيا، ليتۆا، دانيا جانە چەحيانىڭ ءىرى كومپانيالارىمەن قازاقستاندا جاڭا ءوندىرىس اشۋ، ولاردىڭ ايماقتىق كەڭسەلەرىن اۋىستىرۋ تۋرالى ناقتى كەلىسىمدەر جاسالدى»، - دەدى سىرتقى ىستەر ءمينيسترىنىڭ ورىنباسارى.

رومان ۆاسيلەنكونىڭ ايتۋىنشا، قازىرگى تاڭدا ەلىمىزدە ەۋروپالىق كاپيتالمەن جۇمىس ىستەيتىن 3 مىڭنان استام كومپانيا بار.

سونىمەن بىرگە ءمينيستردىڭ ورىنباسارى بىلتىر قازاقستان مەن ەۋروپالىق وداق اراسىنداعى ءوزارا تاۋار اينالىمى %27,6 عا ءوسىپ، 40 ميلليارد دوللارعا جەتكەنىن اتاپ ءوتتى.