عىلىم سالاسىندا ەڭبەك ەتىپ جۇرگەن جانداردى قولدايمىن - پرەزيدەنت

استانا. قازاقپارات - مەملەكەت باسشىسى قاسىم- جومارت توقايەۆ باتىس قازاقستان وبلىسىنا جۇمىس ساپارى اياسىندا ءوڭىر بەلسەندىلەرىمەن پىكىر الماستى، دەپ حابارلايدى قازاقپارات ءتىلشىسى.

پرەزيدەنتپەن كەزدەسۋ بارىسىندا جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتىنىڭ پروفەسسورى سارسەنبەك مونتايەۆ وتاندىق عىلىمنىڭ جەتىستىكتەرى تۋرالى ايتتى.

«قازىرگى تاڭدا مەملەكەتىمىز عالىمدارعا، اسىرەسە جاس عالىمدارعا كەڭ كولەمدە قولداۋ كورسەتىپ جاتىر. سونىڭ ناتيجەسىندە مەنىڭ جەتەكشىلىگىممەن 10 يننوۆاتسيالىق جوبا جۇزەگە اسىرىلۋدا. ونىڭ ەكەۋى تولىعىمەن كوممەرتسيالاندىرىلدى. قالعاندارىنىڭ زەرتتەۋلەرى تولىق اياقتالىپ، قازىر وندىرىسكە ەنگىزۋگە دايىن. عىلىمي جوبالارىمىزدىڭ جاڭاشىلدىعى 15 يننوۆاتسيالىق پاتەنتپەن قورعالدى جانە عىلىمي ناتيجەلەرىمىز Web of Science Scopus بازاسىنا كىرەتىن شەت مەملەكەتتەردەگى يندەكساتسياسى جوعارى جۋرنالداردا جاريالاندى. سونىڭ ناتيجەسىندە ا ق ش- تا ستەنفورد ۋنيۆەرسيتەتىنىڭ ساراپشىلارى دايىنداعان الەمدەگى ەڭ بەدەلدى عالىمداردىڭ World Ranking of Top 2% Scientists رەيتينگىنە كىردىم. بۇل ءبىزدىڭ عالىمداردىڭ زەرتتەۋلەرىنىڭ يننوۆاتسيالىق دەڭگەيىن شەتەلدىك عالىمدارىنىڭ مويىنداعانى، باعالاعانى دەپ ەسەپتەيمىن. الداعى ۋاقىتتا دا قازاقستاننىڭ عىلىمي الەۋەتىن الەمدىك دەڭگەيگە كوتەرۋگە جانە عىلىمي جوبالاردىڭ تۇپكى ناتيجەلەرىنىڭ ەل ەكونوميكاسىنا جۇمىس ىستەۋىنە ۇلەس قوسامىز دەپ سەنىم بىلدىرەمىن»، - دەدى عالىم.

وسى ورايدا مەملەكەت باسشىسى جاس عالىمداردى قولدايتىنىن، جاس عالىمدار كەڭەسى قۇرىلعانىن اتاپ ءوتتى.

«جاس عالىمداردى جۇمىسقا شاقىرامىز. وتە كەرەك نارسە. جالپى، ءوزىم عىلىم دەگەندى جاقسى كورەمىن. عىلىم سالاسىندا جۇمىس ىستەپ جۇرگەن ادامداردى قولدايمىن. جاس عالىمداردى دا قولداي بەرەمىن. بۇل ەلىمىز ءۇشىن، قازاقستان ءۇشىن كەرەك نارسە»، - دەدى قاسىم- جومارت توقايەۆ.