شارۋالارعا بەرىلەتىن ديزەلدىڭ باعاسى بەلگىلى بولدى
بۇل تۋرالى ق ر اۋىل شارۋاشىلىعى ۆيتسە-ءمينيسترى ءابىلحايىر تامابەك ايتىپ بەردى، دەپ حابارلايدى قازاقپارات ءتىلشىسى.
«ەنەرگەتيكا مينيسترلىگىمەن بىرلەسىپ، وبلىستاردى مۇناي وڭدەۋ زاۋىتتارىنا بەكىتۋ كەستەسى مەن مۇناي وڭدەۋ زاۋىتتارى اقپان ايىنا بەلگىلەنگەن باعا - تونناسىنا 222 مىڭ تەڭگە نەمەسە ليترىنە 184 تەڭگە بولىپ بەكىتىلدى»، - دەدى ءابىلحايىر تامابەك ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
قازىرگى ۋاقىتتا تيەپ-جونەلتۋ كەستەسىنە سايكەس، وڭىرلىك وپەراتورلار اقپان ايىنداعى 79,6 مىڭ تونناعا نەمەسە جوسپاردىڭ 98 پايىزىنا تولىق دەرلىك تولەم جاسادى.
55,6 مىڭ توننا نەمەسە 69 پايىزى تيەپ-جونەلتىلدى.
سونداي-اق، مينيسترلىك وڭىرلەرگە ديزەل وتىننىڭ تيەپ-جونەلتىلۋىنە كۇندەلىكتى مونيتورينگ جۇرگىزەدى.
ايتا كەتەيىك، بيىل جالپى ەگىس الاڭى 23,4 ميلليون گەكتار، بۇل 2022-جىلعى كورسەتكىشتەن 68,6 مىڭ گەكتارعا ارتىق.
ءداندى جانە ءداندى-بۇرشاقتى داقىلداردىڭ ەگىس الاڭدارىن 117 مىڭ گەكتارعا، ازىقتىق داقىلدار الاڭدارىن - 36,5 مىڭ گەكتارعا جانە قانت قىزىلشاسى الاڭدارىن - 6,7 مىڭ گەكتارعا ۇلعايتۋ كوزدەلىپ وتىر.