مەملەكەتتىك ورگاندا كەلىسىمشارتپەن جۇمىس ىستەيتىن قىزمەتشىلەر نەمەن اينالىسادى
بۇل تۋرالى سەناتتىڭ جالپى وتىرىسىندا ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ايتتى، دەپ حابارلايدى قازاقپارات ءتىلشىسى.
اتاپ ايتقاندا، بۇگىن پالاتا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى.
كەلىسىمشارتتىق قىزمەتشىلەر ينستيتۋتى تۋرالى نورما وسى زاڭدا قامتىلىپ وتىر.
ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆتىڭ ايتۋىنشا، ۇلتتىق جانە وزگە دە جوبالاردى ىسكە اسىرۋ ءۇشىن مەملەكەتتىك ورگان كەلىسىمشارت بويىنشا تارتاتىن كەلىسىمشارتتىق قىزمەتشىلەر ينستيتۋتىن زاڭنامالىق بەكىتۋ ەسكەرىلگەن.
مەملەكەتتىك باسقارۋدى دامىتۋدىڭ 2030-جىلعا دەيىنگى تۇجىرىمداماسىندا مەملەكەتتىك اپپارات شتاتىن وڭتايلاندىرعاننان كەيىن، كەلىسىمشارتتىق قىزمەتشىلەر ينستيتۋتىن ەنگىزۋ مىندەتى قويىلعان.
«ولار مەملەكەتتىك قىزمەتشى ساناتىنا جاتپايدى. بۇل سالالىق جوبالاردى ىسكە اسىرۋ كەزەڭىنە ارناۋلى ءبىلىمى بار كاسىبي مامانداردى تارتۋعا مۇمكىندىك بەرەدى. كەلىسىمشارت مەرزىمى ءبىر جىلدان اسپايدى. كەلىسىمشارتتىق قىزمەتشىلەرگە قاتىستى ناقتى ەرەجە مەن ءتارتىپ ءتيىستى ۇكىمەت قاۋلىسىندا بەلگىلەنەدى»، - دەدى اگەنتتىك باسشىسى.
ايتا كەتەيىك، بۇعان دەيىن بۇقارالىق اقپارات قۇرالدارىنا بەرگەن سۇحباتىندا دارحان جازىقبايەۆ اتالعان ينستيتۋتقا قاتىستى تۇسىنىك بەرگەن بولاتىن.
مەملەكەتتىك ورگاندارداعى كەلىسىمشارتتىق قىزمەتشىلەر مەملەكەتتىك قىزمەتشىلەر بولىپ سانالمايدى. الايدا كەلىسىمشارتقا سايكەس ولارعا ناقتى مىندەتتەردى شەشۋدە بەلگىلى ءبىر قۇزىرەتتەر بەرىلەدى. كەلىسىمشارتتىق قىزمەتشىلەردىڭ قىزمەتى مەن مىندەتتەرى ءبىر جىلدىق مەرزىمگە جاسالاتىن ەڭبەك شارتىندا ايقىندالادى.
كەلىسىمشارتتىق قىزمەتشىلەردى تارتۋ ءبىرقاتار مىندەتتى شەشۋگە ىقپال ەتەدى دەپ كۇتىلەدى.
اتاپ ايتساق، مەملەكەتتىك باستامالار مەن سالالىق جوبالاردى تابىستى ىسكە اسىرۋدى؛ ناقتى سالادا، ەكونوميكا سەگمەنتىندە، الەۋمەتتىك سالادا بىرەگەي، تابىستى، وزىندىك تاجىريبەنى تاراتۋ جانە ەنگىزۋدى؛ جاڭا تەحنولوگيالار ترانسفەرتىن قامتاماسىز ەتۋدى؛ يننوۆاتسيالىق ويلاۋدى دامىتۋدى؛ مەملەكەتتىك باستامالار مەن سالالىق جوبالاردى ىسكە اسىرۋ كەزىندە پراكتيكالىق ءوزارا ءىس-قيمىل ارقىلى مەملەكەتتىك قىزمەتشىلەردىڭ بىلىكتىلىگىن ارتتىرۋدى؛ مەملەكەتتىك اپپاراتتى باسقارۋدىڭ يكەمدى مودەلىن دامىتۋدى رەتتەي الادى.