قازاقستاندا جاپپاي تارتىپسىزدىككە شاقىرعاندارعا جاۋاپكەرشىلىك كۇشەيتىلەدى

استانا. قازاقپارات – ق ر ىشكى ىستەر ءمينيسترى مارات احمەتجانوۆ ەلىمىزدە جاپپاي تارتىپسىزدىككە شاقىرعان ادامدارعا قاتىستى سانكسيالار كۇشەيتىلەتىنىن ايتتى، دەپ حابارلايدى قازاقپارات ءتىلشىسى.

بۇگىن سەناتتىڭ جالپى وتىرىسىندا «ق ر قىلمىستىق، قىلمىستىق-پروتسەستىك جانە قىلمىستىق- اتقارۋ كودەكستەرىنە قىلمىستىق سوت تورەلىگى، جازانى ورىنداۋ جانە ازاپتاۋ مەن قاتىگەز ارەكەتتەردىڭ الدىن الۋ سالاسىنداعى ادام قۇقىقتارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.

وسى ورايدا مىنالار ءۇشىن سانكسيالاردى كۇشەيتۋ كوزدەلگەن:

- جاپپاي تارتىپسىزدىكتەرگە شاقىرۋ (ق ك 272-بابىنىڭ 1-بولىگى، 3 جىلدان 5 جىلعا دەيىن باس بوستاندىعىنان ايىرۋ)، ونىڭ ىشىندە تەلەكوممۋنيكاتسيا جەلىلەرىن پايدالانا وتىرىپ (ق ك 272-بابىنىڭ 2-بولىگى، قۇقىق بۇزۋشىلىقتىڭ جاڭا قۇرامى-3 جىلدان 7 جىلعا دەيىن باس بوستاندىعىنان ايىرۋ) شاقىرۋ.

- قىلمىستىق توپ قۇرامىندا جاسالعان بۇزاقىلىق (ق ك 293-بابىنىڭ 3-بولىگىنەن 4-بولىگىنە، 5 تەن 7 جىلعا دەيىن باس بوستاندىعىنان ايىرۋ).

«قىلمىستىق توپتىڭ قۇرامىندا جاسالعان كىسى ءولتىرۋ مەن بانديتيزم ءۇشىن سانكسيالار كۇشەيتىلەدى. مۇنداي ادامدارعا شارتتى تۇردە مەرزىمىنەن بۇرىن بوساتۋ مۇمكىندىگىن بولدىرماۋ كوزدەلىپ وتىر»، - دەدى مينيستر.

بۇگىن سەناتتىڭ جالپى وتىرىسىنان كەيىن وتكەن باسپا ءسوز ءماسليحاتىندا تىلشىلەر مينيسترگە «جاپپاي تارتىپسىزدىكتەرگە قاتىستى نورمانى قاتاڭداتۋ ميتينگى تۋرالى زاڭعا قايشى كەلمەي مە» دەگەن سۇراق قويدى.

«بەيبىت جولمەن ءوزىنىڭ پوزيتسياسىن ايتۋعا كەلگەن ازاماتتاردى پوليتسيا جاپپاي تارتىپسىزدىك بويىنشا قاماۋعا الۋى مۇمكىن بە»، - دەپ سۇرادى تىلشىلەر.

ءوز كەزەگىندە م. احمەتجانوۆ زاڭدا جاپپاي تاتىپسىزدىككە شاقىرعان كەزدە عانا جاۋاپكەرشىلىك قاراستىرىلاتىنىن ايتتى.

«قۇجاتتا ميتينگ تۋرالى ءسوز مۇلدەم جوق. ميتينگى مەن جاپپاي تارتىپسىزدىكتى اجىراتا ءبىلۋ كەرەك. نىسانداردى قيراتۋ، ورتەۋگە قاتىستى ينتەرنەت ارقىلى ۇندەۋ تاراتاتىن بولسا، وسى ارەكەتتەرگە جاۋاپكەرشىلىك ەسكەرىلگەن»، - دەدى مينيستر.