تۇركياعا قۇتقارۋشىلار مەن گۋمانيتارلىق جۇك جەتكىزگەن ۇشقىشتار ماراپاتتالدى

None
استانا. قازاقپارات - بۇگىن «بۇركىت» اۋە كومپانياسىنىڭ تۇركياعا قۇتقارۋشىلار مەن گۋمانيتارلىق جۇك جەتكىزگەن ۇشقىشتارى ماراپاتتالدى، دەپ حابارلايدى قازاقپارات ءتىلشىسى.

سالتاناتتى ءىس-شاراعا پرەزيدەنت ءىس باسقارۋشىسىنىڭ ورىنباسارى سەرگەي حوروشۋن ارنايى قاتىسىپ، ماراپات يەلەرىن قۇتتىقتادى.

«بۇركىت» اۋە كومپانياسىنىڭ قىزمەتكەرلەرى تۇركيادا بولعان جەر سىلكىنىسى سالدارىن جويۋعا بەلسەنە قاتىسىپ، گۋمانيتارلىق جۇكتى، توتەنشە جاعدايلار مينيسترلىگىنىڭ ىزدەۋ-قۇتقارۋ توپتارى مەن تەحنيكالارىن جەتكىزدى»، - دەدى سەرگەي حوروشۋن.

پرەزيدەنت ءىس باسقارۋشىسىنىڭ ورىنباسارى مەملەكەت باسشىسىنىڭ جارلىعىنا سايكەس، ي ل-76 ۇشاعىنىڭ شتۋرمان- نۇسقاۋشىسى نۇرجان وسپانقۇلوۆ پەن شتۋرمان نيكولاي گۋدەيەۆكە «ەرەن ەڭبەگى ءۇشىن» مەدالىن تابىستادى.

سونىمەن قاتار اۋە كومپانياسىنىڭ تاعى 15 قىزمەتكەرى پرەزيدەنتتىڭ العىس حاتىمەن ماراپاتتالدى.

«ي ل-76 ۇشاعىنىڭ كومانديرى مەن ەكيپاجى مەملەكەتىمىزدىڭ، پرەزيدەنتىمىزدىڭ قويعان ماقسات-مىندەتتەرىن، تاپسىرمالارىن تولىقتاي ورىندادى. توتەنشە جاعدايلار مينيسترلىگىنىڭ قۇتقارۋشىلارى مەن ارناۋلى تەحنيكالارىن، گۋمانيتارلىق جۇكتەردى تۇرىك مەملەكەتىنە ۋاقىتىلى جەتكىزدىك. ي ل-76 ۇشاعىنىڭ ەكيپاجى مەملەكەت باسشىسى تاپسىرمالارىن ورىنداۋعا ءار ۋاقىتتا دايىن»، - دەدى ي ل-76 ۇشاعىنىڭ بورتوپەراتور-نۇسقاۋشىسى تالعات مۇراتوۆ.

ال ي ل-76 ۇشاعىنىڭ شتۋرمانى نيكولاي گۋدەيەۆ تۇركياعا 5 رەيس ورىنداعانىن ايتادى. «ەكيپاج جەدەل ارادا جاساقتالدى. جالپى 5 رەت ۇشتىق. ۇكىمەتىمىزگە ۇلكەن راقمەتىمىزدى ايتامىز. ءبارى جەدەل تۇردە ۇيىمداستىرىلدى»، - دەدى نيكولاي گۋدەيەۆ.

ايتا كەتەيىك، ن. وسپانقۇلوۆ پەن ن. گۋدەيەۆ «بۇركىت» اۋە كومپانياسىندا 2004-جىلدان بەرى ەڭبەك ەتەدى. تاجىريبەلى ماماندار وزدەرىنىڭ كاسىبي بىلىكتىلىگىمەن، جاۋاپتىلىعىمەن، ادامي قاسيەتتەرىمەن باسقا ارىپتەستەرىنە ۇلگى بولىپ ءجۇر.

سوڭعى جاڭالىقتار