جالاقى بويىنشا اكتىلەر مىندەتتى تۇردە مەملەكەتتىك قىزمەت ىستەرى اگەنتتىگىمەن كەلىسىلەدى

استانا. قازاقپارات – ق ر مەملەكەتتىك ورگانداردا جۇمىس كەستەسىنىڭ دۇرىس ساقتالۋىن باقىلاۋ فۋنكسياسى بەكىتىلەدى.

بۇل تۋرالى سەناتتىڭ جالپى وتىرىسىندا اتالعان ۆەدومستۆونىڭ ءتوراعاسى دارحان جازىقبايەۆ ايتتى، دەپ حابارلايدى قازاقپارات ءتىلشىسى.

بۇگىن پالاتا وتىرىسىندا ءبىرىنشى وقىلىمدا تالقىلانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالىپ، قابىلداندى.

«مەملەكەتتىك ورگانداردا جۇمىس كەستەسىنىڭ دۇرىس ساقتالۋىن باقىلاۋدى جۇزەگە اسىرۋ قاراستىرىلىپ وتىر. اقپان ايىندا «اكىمشىلىك قۇقىق بۇزۋشىلىق تۋرالى» كودەكسكە تۇزەتۋلەر ەنگىزىلىپ، مەملەكەتتىك ورگانداردا جۇمىس كەستەسىن زاڭسىز بۇزۋ تۋرالى اكىمشىلىك ىستەردى قاراۋ اگەنتتىككە بەرىلدى. بۇرىن مۇنداي ىستەردى اكىمدىكتەردىڭ ەڭبەك ينسپەكسياسى قارايتىن. اتالعان تۇزەتۋ 1- ساۋىردەن باستاپ قولدانىسقا ەنگىزىلەدى. وسى ورايدا «مەملەكەتتىك قىزمەت تۋرالى» زاڭدا اگەنتتىكە مەملەكەتتىك ورگانداردا جۇمىس كەستەسىنىڭ دۇرىس ساقتالۋىن باقىلاۋ فۋنكسياسى بەكىتىلەدى»، - دەدى د. جازىقبايەۆ.

سونىمەن قاتار ول مەملەكەتتىك قىزمەتشىلەردىڭ ەڭبەكاقىسى سالاسىنداعى اكتىلەردى اگەنتتىكپەن كەلىسۋگە قاتىستى تۇسىنىك بەردى.

«قولدانىستاعى زاڭعا سايكەس، مەملەكەتتىك قىزمەتشىلەردىڭ ەڭبەكاقىسى جۇيەسىن جانە ولارعا سىياقى تولەۋ ءتارتىبىن ۇكىمەت بەكىتەدى. ونى ازىرلەيتىن - ۇلتتىق ەكونوميكا مينيسترلىگى. مەملەكەتتىك قىزمەتشىلەردى ىنتالاندىرۋ سالاسىندا ءبىرىڭعاي ساياساتتى ۇستانۋ ماقساتىندا، ەڭبەكاقى سالاسىنداعى اكتىلەردى مىندەتتى تۇردە اگەنتتىكپەن كەلىسۋ ۇسىنىلىپ وتىر»، - دەدى ۆەدومستۆو باسشىسى.

بۇدان بۇرىن حابارلانعانداي، اگەنتتىك باسشىسى باسقا وڭىرگە اۋىسقان مەملەكەتتىك قىزمەتشىلەرگە روتاتسيالىق تولەم بەرىلەتىنىن، بۇل قاراجات پاتەر جالداۋعا باعىتتالاتىنىن ايتتى.

سونىمەن قاتار، مەملەكەتتىك قىزمەتتە قاشىقتان جۇمىس ىستەۋ جانە يكەمدى جۇمىس كەستەسىن رەتتەۋ قۇزىرەتىن اگەنتتىككە بەرۋ قاراستىرىلعان.

مەملەكەتتىك باسقارۋ اكادەمياسى تۇلەكتەرىنىڭ مىندەتتى جۇمىس وتەۋ تارتىبىنە وزگەرىستەر ەنگىزىلمەك.

بۇدان بولەك، قر مەملەكەتتىك قىزمەت ىستەرى اگەنتتىگىنە مەملەكەتتىك قىزمەت پەن كادر ساياساتىنىڭ تيىمدىلىگىن ارتتىرۋعا باعىتتالعان ءبىرقاتار وكىلەتتىك بەرىلمەك.