ورتالىق ورگاندارداعى شەشىمدەر وڭىرلەردىڭ مۇددەسىنە وراي قابىلدانۋى كەرەك - سەنات ءتوراعاسى

استانا. قازاقپارات - سەنات ءتوراعاسى ماۋلەن اشىمبايەۆ مەملەكەتتىك ورگانداردا وڭىرلەر مەن ورتالىق اراسىنداعى كادرلىق روتاتسيانى قامتاماسىز ەتۋ كەرەكتىگىن ايتتى، دەپ حابارلايدى قازاقپارات ءتىلشىسى.

«قازىرگى تاڭدا ورتالىق ورگاندارداعى مەملەكەتتىك قىزمەتشىلەردىڭ كوبىنىڭ وڭىرلەردە جۇمىس تاجىريبەسى جوق. سوندىقتان ولار ايماقتارداعى ماسەلەلەردى جاقسى بىلەدى دەپ ايتا المايمىز. جالپى، ۇكىمەتتەگى، مەملەكەتتىك ورگاندارداعى شەشىمدەر وڭىرلەردىڭ مۇددەسىنە وراي قابىلدانۋى كەرەك. بۇگىن قارالىپ جاتقان زاڭ جوباسى وسى ماسەلەنى وڭ شەشۋگە ءوز سەپتىگىن تيگىزەدى دەپ سەنەمىز»، - دەدى ماۋلەن اشىمبايەۆ سەناتتىڭ جالپى وتىرىسىندا.

سونىمەن قاتار پالاتا سپيكەرى وڭىرلەردىڭ اراسىنداعى روتاتسيا ماسەلەسىنە دە نازار اۋداردى.

«بۇل رەتتە وڭىرلەردىڭ اراسىنداعى كادرلىق روتاتسيانى قامتاماسىز ەتۋدىڭ دە ماڭىزى زور. مىسالى، باتىستاعى ازاماتتار شىعىسقا، سولتۇستىكتەگىلەر وڭتۇستىككە بارىپ جۇمىس ىستەيتىندەي مۇمكىندىكتەر بولۋى قاجەت. سوندىقتان ازاماتتارىمىزدىڭ ءار وڭىردە جۇمىس ىستەۋىنە جول اشىپ بەرۋىمىز كەرەك. بۇل ەلىمىزدى ءبىرتۇتاس مەملەكەت رەتىندە دامىتۋعا ءوز ۇلەسىن قوساتىن ماڭىزدى قادام ەكەنى ءسوزسىز»، - دەدى سەنات ءتوراعاسى.

ايتا كەتەيىك، بۇگىن سەنات وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى.

ماۋلەن اشىمبايەۆ زاڭ قابىلدانىپ، مەملەكەت باسشىسى قول قويعاننان كەيىن وندا كورسەتىلگەن نورمالار قاعاز جۇزىندە قالماي، ءتيىستى مەملەكەتتىك ورگان روتاتسيا مەحانيزمدەرىن دايەكتى تۇردە ىسكە اسىرۋى كەرەكتىگىن اتاپ ءوتتى.

بۇدان بۇرىن حابارلانعانداي، اگەنتتىك باسشىسى باسقا وڭىرگە اۋىسقان مەملەكەتتىك قىزمەتشىلەرگە روتاتسيالىق تولەم بەرىلەتىنىن، بۇل قاراجات پاتەر جالداۋعا باعىتتالاتىنىن ايتتى.

سونىمەن قاتار، مەملەكەتتىك قىزمەتتە قاشىقتان جۇمىس ىستەۋ جانە يكەمدى جۇمىس كەستەسىن رەتتەۋ قۇزىرەتىن اگەنتتىككە بەرۋ قاراستىرىلعان.

مەملەكەتتىك باسقارۋ اكادەمياسى تۇلەكتەرىنىڭ مىندەتتى جۇمىس وتەۋ تارتىبىنە وزگەرىستەر ەنگىزىلمەك.

اۆتور

رۋسلان عابباسوۆ