باسقا وڭىرگە اۋىسقان مەملەكەتتىك قىزمەتشىلەرگە روتاتسيالىق تولەم بەرىلەدى
بۇل تۋرالى سەناتتىڭ جالپى وتىرىسىندا ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ايتتى، دەپ حابارلايدى قازاقپارات ءتىلشىسى.
اتاپ ايتقاندا، بۇگىن پالاتا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قارالدى.
زاڭ جوباسىنىڭ نەگىزگى ماقساتى - ەلىمىزدە مەملەكەتتىك قىزمەتتى جەتىلدىرۋ بويىنشا اتقارىلاتىن كەشەندى ءىس- شارالاردى جۇزەگە اسىرۋ. قۇجات اياسىندا ءبىر كودەكسكە جانە ءۇش زاڭعا تۇزەتۋ ەنگىزۋ ەسكەرىلگەن.
ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆتىڭ ايتۋىنشا، ۇلتتىق جانە وزگە دە جوبالاردى ىسكە اسىرۋ ءۇشىن مەملەكەتتىك ورگان كەلىسىمشارت بويىنشا تارتاتىن كەلىسىمشارتتىق قىزمەتشىلەر ينستيتۋتىن زاڭنامالىق بەكىتۋ ەسكەرىلگەن. مەملەكەتتىك باسقارۋدى دامىتۋدىڭ 2030 -جىلعا دەيىنگى تۇجىرىمداماسىندا مەملەكەتتىك اپپارات شتاتىن وڭتايلاندىرعاننان كەيىن، كەلىسىمشارتتىق قىزمەتشىلەر ينستيتۋتىن ەنگىزۋ مىندەتى قويىلعان.
«ولار مەملەكەتتىك قىزمەتشى ساناتىنا جاتپايدى. بۇل سالالىق جوبالاردى ىسكە اسىرۋ كەزەڭىنە ارناۋلى ءبىلىمى بار كاسىبي مامانداردى تارتۋعا مۇمكىندىك بەرەدى. كەلىسىمشارت مەرزىمى ءبىر جىلدان اسپايدى. كەلىسىمشارتتىق قىزمەتشىلەرگە قاتىستى ناقتى ەرەجە مەن ءتارتىپ ءتيىستى ۇكىمەت قاۋلىسىندا بەلگىلەنەدى»، - دەدى اگەنتتىك باسشىسى.
سونىمەن قاتار ول اتالعان قۇجاتتا روتاتسيالىق تولەم ەنگىزۋ قاراستىرىلعانىن ايتتى.
«ەلىمىزدە مەملەكەتتىك قىزمەتشىلەردىڭ روتاتسياسى ەنگىزىلگەن. ونىڭ ماقساتى - وڭىرلەر اراسىندا تاجىريبە الماسۋ، قىزمەتشىنىڭ تاجىريبەسىن جان- جاقتى جەتىلدىرۋ، سىبايلاس جەمقورلىققا توقسقاۋىل قويۋ. قولدانىستاعى زاڭناماعا سايكەس، وزگە وڭىرگە روتاتسيالاناتىن قىزمەتشىگە ۋاقىتشا تۇرعىن ءۇي بەرىلۋى ءتيىس. الايدا قىزمەتتىك پاتەرلەر جەتىسپەگەننەن كەيىن، روتاتسيالانعان قىزمەتشىلەر ءوز قاراجاتىنا پاتەر جالداۋعا ءماجبۇر. بۇل كوپتەگەن قىزمەتشىلەردىڭ روتاتسيادان باس تارتۋىنا الىپ كەلەدى. روتاتسيالىق تولەمدى ەنگىزۋ وسى ماسەلەنى شەشۋشە باعىتتالىپ وتىر»، - دەدى د. جازىقبايەۆ.
وسى ورايدا ول اتالعان تولەمدى ەنگىزۋ ءۇشىن رەسپۋبليكالىق بيۋدجەتتىك كوميسسيا 2023-2025 -جىلدارعا قاجەت قاراجاتتى ءبولۋدى ماقۇلداعانىن جەتكىزدى.