الماتىدا ەسكى عيماراتتار قايتا جاڭارتىلادى

None
الماتى. قازاقپارات - الماتىدا بۇرىنعى تەمىرجول اۋرۋحاناسىنىڭ ورنىنا «قالالىق بالالاردى وڭالتۋ ورتالىعى» اشىلادى.

بۇل تۋرالى قالا اكىمى ەربولات دوسايەۆتىڭ المالى اۋدانى تۇرعىندارىمەن كەزدەسۋىندە بەلگىلى بولدى، دەپ حابارلايدى قازاقپارات ءتىلشىسى.

قالا اكىمىمەن كەزدەسۋگە كەلگەن تۇرعىنداردىڭ ءبىرى بۇرىنعى تەمىرجول ەمحاناسىنا قاتىستى ماسەلەنى كوتەردى.

«مەن ساۋلەتشى رەتىندە بۇرىنعى تەمىرجول ەمحاناسىنىڭ تاعدىرىنا الاڭدايمىن - بۇل ساۋلەت ەسكەرتكىشى. قازىر عيمارات شاتىرسىز تۇر. ونىڭ تاعدىرى نە بولماق؟»، - دەپ سۇرادى المالى اۋدانىنىڭ تۇرعىنى.

الماتى اكىمى ەربولات دوسايەۆ بيىل اتالعان عيماراتتى كۇردەلى جوندەۋدەن وتەتىنىن مالىمدەدى.

«جۇمىستار ساۋلەت ەسكەرتكىشىن قالپىنا كەلتىرۋگە جانە ساقتاۋعا قويىلاتىن بارلىق تالاپتاردى ەسكەرە وتىرىپ جۇرگىزىلەتىن بولادى. ءبىز جوندەيمىز، ءبارىن رەتكە كەلتىرەمىز. بالالارعا ارنالعان زاماناۋي ورتالىق قۇرايىق. بۇل جاعدايدا ءبىز عيماراتتىڭ جالپى كورىنىسىن ساقتايمىز. عيماراتتىڭ جوندەۋ جۇمىستارى IV توقساننان باستالادى»، - دەدى قالا باسشىسى.

بۇدان بولەك، ول جىل سوڭىنا دەيىن ايتەكە بي كوشەسىندەگى ەسكى عيماراتتى بۇزىپ، ريەۆماتولوگيالىق ورتالىقتىڭ ورنىندا 500 كەلۋشىگە ارنالعان جاڭا ەمحانا سالۋ جوباسى ازىرلەنەتىنىن ايتتى. قۇرىلىس 2024 -جىلدىڭ كوكتەمىندە باستالادى.


سوڭعى جاڭالىقتار