اۋەكەمەسىندە قىزمەت ەتىپ، گيننەستىڭ رەكوردتار كىتابىنا ەنگەن گۇلسىم ابىكەنوۆا

None
استانا. قازاقپارات - ەلىمىزدىڭ تۇكپىر-تۇكپىرىندە ەستىگەن ادامعا تاعدىرلارى تاڭداي قاقتىراتىن قازاقتىڭ نازىك جاندى ارۋلارى جەتەرلىك.

سولاردىڭ قاتارىندا تۇتاس 46 جىل عۇمىرىن اۋەكەمەسىنىڭ بورتسەرىگى بولىپ جۇمىس ىستەگەن گۇلسىم اسقار قىزى بىلتىر كۇز ايىندا عانا زەينەتكە شىققان.

ءبىر كەزدەرى ۇلكەن ارماندى ارقالاعان قارشاداي قازاق قىزى گۇلسىمنىڭ العاشقى ەڭبەك جولى وتكەن ⅩⅩ عاسىردىڭ 1976 -جىلى ناۋرىز ايىندا باستالىپتى. دالىرەك ايتساق، كەيىپكەرىمىز العاش رەت بورتسەرىك اتانىپ اۋە كەڭىستىگىنە كوتەرىلگەن. سودان بەرى قىزمەتىن ادال اتقارعان ول تالاي جاننىڭ باتاسىن الىپ، العىسىنا بولەنىپتى.

ەلىمىزدىڭ ۇلتتىق اۆياتسياسىنىڭ داڭقتى قىزمەتكەرىمەن جولىعىپ، ءبىراز سىرعا قانىقتىق. سولاردىڭ ءبىرى، ءوزى ۇزاق جىل ەڭبەك ەتكەن ماماندىعىن كەزدەيسوق تاڭداعانىن ايتقاندا ەرىكسىز تاڭقالدىق. گۇلسىم اسقار قىزى سول 1976 -جىلى اۋەكەمەسىنىڭ بورتسەرىگىنە جۇمىسقا تۇرۋ ءۇشىن ارنايى بايقاۋ بولىپ جاتقانىن ويلاماعان جەردەن ەستىپ قالادى. كىشكەنتايىنان جانى بيىكتىكتى قالايتىن ول تاۋەكەل ەتىپ، ۇمىتكەرلەردىڭ قاتارىندا ەمتيحان تاپسىرادى. وسىلايشا، ەمتيحان تاپسىرعان 40 ادام اراسىنان ۇزدىك ون ەكىنىڭ بىرەۋى رەتىندە گۇلسىم سىننان سۇرىنبەي ءوتتى. ارتىنان ءبىلىمىن جەتىلدىرىپ، ارنايى وقۋ كۋرستارىن دا ويداعىداي اياقتادى.

تالاي سىناقتان سۇرىنبەي وتكەن گۇلسىمنىڭ ەڭبەك جولى ءوزىنىڭ تۋعان قالاسىنداعى قوستاناي اۋەتاسىمالىمەن اينالىساتىن مەكەمەدە باستالىپ كەتەدى. وسىلايشا، نەگىزگى ماماندىعى كىتاپحاناشى بولعان ءور مىنەزدى قازاق قىزى اسپان الەمىندە تالاي قيىندىقتارعا تاپ بولسا دا، ءبىر ءسات تە سىنىپ قالعان جوق. قايتا نامىسقا تىرىسىپ، قانعا بىتكەن قايسارلىعىنىڭ ارقاسىندا وسى سالادا 46 جىل قىزمەت ەتكەنىن بىلمەي دە قالادى.

«مەن ءوزىم كىتاپحاناشىمىن. بۇل وقۋعا اكەمنىڭ جان قالاۋىمەن ءتۇستىم. كەيىن اكەم سىناقتان ءوتىپ، ەمتيحان تاپسىرىپ، اۋەكەمەسىنىڭ بورتسەرىگى اتانىپ، قىزمەتكە كىرىسكەنىمدە بەتىمنەن قاقپاي باتاسىن بەردى. بۇل ماعان وتە كۇشتى قولداۋ بولدى. وسىلاي جۇرگەندە 1986 -جىلى قۇداي قوسقان سەرىگىمدى جولىقتىرىپ، تۇرمىس قۇردىم. ارقا سۇيەر كۇيەۋىم دە قوستاناي جەرىنە تانىمال قايىرجان ابىكەنوۆ ەسىمدى ازامات. شاڭىراق كوتەرگەن سوڭ 1 جىلدان كەيىن قايىرجان ەكەۋمىزدىڭ تۇڭعىشىمىز ءىلياسىمىز دۇنيەگە كەلدى. وسى كەزدە 5 جىل بالا كۇتىمىنە بايلانىستى نەگىزگى ماماندىعىم - كىتاپحاناشى بولىپ جۇمىس ىستەدىم. 1992 -جىلى بۇرىنعى باسشىلاردىڭ شاقىرۋىمەن قىزمەتىمە قايتا ورالدىم. جان جارىم قايىرجان دا اۋەكەمەسىندەگى جۇمىسىمدى ساعىنعانىمدى بايقاپ ءجۇر ەكەن. ول دا جانىڭ قالايتىن جۇمىسىڭنان قول ۇزبە دەپ تىلەك ءبىلدىردى. كىشكەنتاي ءىلياسقا دا مەنىمەن بىرگە ۇشاقتا ۇشىپ ءجۇرۋ قاتتى ۇنادى.

وسىلايشا، اراعا بىرنەشە جىل سالىپ، سانكت- پەتەربۋرگ قالاسىنداعى ازاماتتىق اۆياتسيا اكادەمياسى جانىندا شەتەلدەرگە شىعۋعا رۇقسات بەرەتىن ارنايى كۋرستى ويداعىداي اياقتادىم. ەندى مەن «تۋ-154» اۋەكەمەسىمەن الىس-جاقىن شەت ەلدەرگە شىعا باستادىم. سونىڭ ارقاسىندا ءبىزدىڭ وتباسى الەمنىڭ ءبىراز جەرىن شارلادى»، - دەپ ەسكە الادى گۇلسىم اپامىز.

ال ەلىمىز تاۋەلسىزدىك العان جىلدارى ءبىزدىڭ كەيىپكەرىمىز ۋاقىتشا قيىندىقتارعا توتەپ بەرىپ، ەلدىڭ ەرتەڭىنە ۇمىتپەن قارادى. ويتكەنى، سول جىلدارى قوس وكپەدەن قىسقان نارىقتىڭ قاتال شەڭگەلىنەن بۇل سالاداعى تالاي مامانداردىڭ جۇمىسىن تاستاپ كەتكەندەرىن كوزىمەن كورگەن. ونى كەيىپكەرىمىز بىلاي دەپ ەسكە الادى.

«تاۋەلسىزدىكتىڭ العاشقى جىلدارىندا وتە قيىن بولدى. ارتىنشا، قوستانايداعى ۇزاق جىلعى تاجىريبەسى بار مامانداردى الماتى قالاسىنداعى اۋەكومپانياسى جۇمىسقا شاقىردى. سولاردىڭ قاتارىندا مەن دە بولدىم. 2001 -جىلى قوستانايدا «اۆيا-جاينار» دەپ اۋەكومپانياسىنىڭ ەنشىلەس مەكەمەسى اشىلدى. بۇرىنعى ارىپتەستەرىمنىڭ ءوتىنىشىن اياقسىز قالدىرمايىن دەپ جاي بارىپ، بايقاۋعا قاتىستىم. ول جەردە مەنەن وتكەن تالاي ءتىلدى جەتىك بىلەتىن جاس ماماندار بولدى. ءبىراق، نەگە ەكەنىن بىلمەيمىن كوميسسيانىڭ تاڭداۋى ماعان توقتالىپتى. ارتىنان بەلگىلى بولعانداي، ولارعا مەن سەكىلدى تاجىريبەلى ماماندار كەرەك ەكەن. سونى ءبىلىپ، ارىپتەستەرىم ماعان قولقا سالىپتى عوي» - دەيدى گۇلسىم اسقار قىزى.

گۇلسىم اپامىزدىڭ شىققان جەرى - تەكتىنىڭ ۇرپاعى. اكەسى اسقار وتەپبەرگەنوۆ - وبلىستىڭ قاۋىپسىزدىگى مەن قۇقىق قورعاۋ ورگاندارىندا ابىرويلى قىزمەت اتقارعان تۇلعا. ال اناسى - جاس ۇرپاقتى تاربيەلەۋدە سۇبەلى ۇلەس قوسقان ۇلاعاتتى ۇستاز. ولار - بەس قىز، ءبىر ۇل ءوسىرىپ-تاربيەلەگەن اتا-انا.

گۇلسىمنىڭ كەلىن بولىپ تابالدىرىق اتتاعان اۋلەتى - اتاقتى مولداحان ابىكەنوۆتىڭ شاڭىراعى. اتاسى ەكى بىردەي مايدان وتىندا ەرلىك كورسەتكەن قايسار جان ەدى.

بۇل كۇندە وزدەرى اتا-اجە اتانىپ وتىرعان گۇلسىم قىز بەن سول كەزدەگى جالىنداعان قايىرجاندى دا تاعدىر ۇشاقتا جولىقتىرىپتى. ناقتىراق ايتقاندا، 1986 -جىلى قايىرجان قوستانايداعى اۋەجايدان الماتىعا جەتە الماي قالادى. وسىلايشا، اۋەجايدىڭ قۇرمەت تاقتاسىنان بولاشاق جارى گۇلسىمنىڭ سۋرەتى كوزىنە وتتاي باسىلادى. قايىرجان قاراپ قالماي سۇلۋ قىزدىڭ ءۇيىنىڭ تەلەفونىن تاۋىپ الىپ، بيلەت تاۋىپ بەرۋىن وتىنەدى. وسىلايشا، بۇل تانىستىقتىڭ ارتى ۇلكەن ماحابباتقا ۇلاسىپ وتىر.

گۇلسىم ابىكەنوۆا ماراپاتقا كەندە ەمەس. سونىڭ جارقىن ءبىر دالەلى بىلتىرعى رەسپۋبليكا كۇنىندە «قۇرمەت» وردەنىمەن ماراپاتتالعان. بيىل ۇلتتىق ازاماتتىق اۆياتسيانىڭ 100 جىلدىعىندا ارنايى مەدالىندىڭ يەگەرى.

مەشىت عازيز ۇلى

Massaget.kz


سوڭعى جاڭالىقتار