اسكەري قىزمەتتە جۇمىس ىستەيتىن جەتى بالانىڭ اناسى تۋرالى نە بىلەمىز

استانا. قازاقپارات - ۇلتتىق ۇلاندا قىزمەتكە دە، وتباسىنا دا كوڭىل بولۋگە ۇلگەرىپ جۇرگەن اق جاۋلىقتى كوپبالالى انا - تۇرسىناي كەريمبەكوۆا بار.

ول جەتى ءبۇلدىرشىننىڭ اناسى. 8-ناۋرىز - حالىقارالىق ايەلدەر كۇنى قارساڭىندا Polisia.kz سايتىنىڭ ءتىلشىسى پوگون تاققان ارۋمەن سۇحباتتاستى.

تۇرسىناي كەريمبەكوۆا پەتروپاۆل قالاسى ۇلتتىق ۇلان اكادەمياسى اسكەري- عىلىمي ورتالىعىنىڭ تيپوگرافيا قىزمەتىندە اعا مامان لاۋازىمىندا قىزمەت ەتەدى.

8-ناۋرىز - حالىقارالىق ايەلدەر مەرەكەسى قارساڭىندا ق ر ىشكى ىستەر ءمينيسترى مارات احمەتجانوۆ اسىل جار، اياۋلى انا، ىسكەر قىزمەتكەر تۇرسىناي كەريمبەكوۆانى «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن ماراپاتتاپ، گۇل شوقتارىن ۇسىندى.

كەيىپكەرىمىز ءومىرىنىڭ تەڭ جارتىسىن ىشكى ىستەر ورگاندارىنا ارناعانىمەن، ۇيدە بالا- شاعاعا كوڭىل اۋدارۋدى ۇمىتقان ەمەس. ولاردىڭ تاربيەسى مەن بىلىمگە دەگەن ىنتاسىن، قىزىعۋشىلىعىن ارتتىرۋعا ارنايى ۋاقىت بولەدى. بۇگىندە 42 جاستاعى ارۋ جولداسىمەن بىرگە ءتورت ەر بالا مەن ءۇش قىزدى تاربيەلەپ وتىر. 7 بالانىڭ اناسى ءبىر قولىمەن بەسىكتى تەربەتسە، ءبىر قولىمەن ەل بەيبىتشىلىگى جولىندا ادال قىزمەت ەتىپ كەلەدى.

سوزىنشە، وعان قىزىعىپ تا، تاڭدانىپ تا قارايتىندار كوپ.

- مەنەن بارلىعى»قالاي بارىنە ۇلگەرەسىڭ؟» دەپ سۇرايدى. جۇمىس پەن ۇيدەگى مىندەتتى قالتقىسىز اتقارۋدا ماعان قولداۋ كورسەتەتىن جولداسىم، اتا-انامىز بەن بالالارىمىز. ۇل-قىزدارىم ءاردايىم كومەكتەسەدى. قىزىم تاماق ءپىسىرىپ، ءۇي جيناپ قويادى. كىشكەنتايلارىم بالاباقشاعا، مەكتەپكە بارادى. ولاردىڭ ساباعىن، ۇيىرمەلەرىن قاداعالاپ، رەتتەپ وتىرۋ كەرەك. بۇل دا مەنىڭ پارىزىم، - دەيدى كوپبالالى انا.

كەيىپكەرىمىزدىڭ جۇبايى دا ۇلتتىق ۇلاندا وفيتسەر. وسى ۋاقىتقا دەيىن وتباسى قىزمەت بابىمەن قالادان قالاعا كوشىپ، ەل ارالاعان. قازىر ولار پەتروپاۆل قالاسىندا تۇرىپ جاتىر.

- قازاقستاننىڭ كوپ قالاسىندا قىزمەت اتقاردىق. ماسكەۋدە دە تۇرعان كەزدەرىمىز بار. بالالار دا، مەن دە ۇيرەنىپ قالدىق. ءوزىم وڭتۇستىكتىڭ تۋماسىمىن، ال بالالارىم بولسا ءارتۇرلى قالالاردا دۇنيەگە كەلدى. قازىر ۇلكەندەرىم الماتىدا وقيدى، كىشى بالالارىم جانىمىزدا، - دەپ جالعاستىردى ول. تۇرسىناي كەريمبەكوۆامەن بىرگە قىزمەت ىستەپ، ارالاس-قۇرالاس بولىپ جۇرگەن ارىپتەستەرى ونى ءوز ءىسىنىڭ مامانى، ىسكەر قىزمەتكەر رەتىندە جاقسى بىلەدى.

- ارىپتەسىمىز وتە جاۋاپتى. ۇيدە دە، جۇمىستا دا ۇلگەرىپ جۇرەدى. تۇرسىناي قۇدىرەت قىزى قويىلعان بارلىق مىندەتتەردى ساپالى، ءدال جانە مەرزىمدە ورىندايدى. اكادەميانىڭ قوعامدىق ومىرىندە دە بەلسەندى. جۇبايىن دا جاقسى تانيمىن. ول كىسى دە وفيتسەر، - دەپ ءبولىستى ق ر ۇلتتىق ۇلانى اكادەمياسى اسكەري-عىلىمي ورتالىعىنىڭ باستىعى جومارت اتىعايەۆ.

ايتا كەتۋ كەرەك، ق ر ۇلتتىق ۇلان قىزمەتكەرلەرىنىڭ ىشىندە ءبىر مىڭنان استام كوپبالالى وتباسى بار. ال ءبىزدىڭ كەيىپكەرىمىز - تۇرسىناي كەريمبەكوۆا «التىن القا» مەدالىمەن ماراپاتتالعان جالعىز شەندى ارۋ.