مەن ءارقاشان اۆتوكولىكتەرگە جاقىن بولدىم - قارقارالىدا تۇراتىن كولىك بوياۋشى ايەل
كولىك جوندەيتىن ايەلگە اۋداننىڭ تۇپكىر- تۇكپىرىنەن 100 دەن استام تۇراقتى كليەنتتەرى ءوز تەمىر تۇلپارلارىن سەنىپ تاپسىرادى، دەپ حابارلايدى قازاقپارات ءتىلشىسى.
مارجان وسپانوۆا - 51 جاستا. قارقارالى اۋدانىنىڭ كوپتەگەن تۇرعىندارى ونى اۆتوكولىك بوياۋشى رەتىندە بىلەدى. 17 جىلدان استام ۋاقىت بويى ول كولىكتەردى قالپىنا كەلتىرۋمەن اينالىسادى. باستاپقىدا اۋداندا ەڭ جاقسى اۆتوموبيل شەبەرى سانالاتىن جۇبايىنا كومەكتەسىپ، كەيىننەن بۇل ىسكە ءوزى دە كىرىسىپ كەتكەن.
«باستاپقىدا كۇيەۋىمدە تاپسىرىستار كوبەيىپ كەتىپ، قولى تيمەي قالعان كەزدەرىندە كومەكشى رەتىندە شەبەرحاناسىندا جۇرەتىنمىن. مەن وعان قۇرال- سايماندارىن بەرىپ تۇراتىنمىن. قازىر مەن ونىمەن بىرگە كولىكتى قالپىنا كەلتىرۋمەن اينالىسامىن. ول دانەكەرلەيدى جانە كولىكتىڭ مايىسىپ قالعان جەرلەرىن تۇزەتەدى، ال مەن ونى بويايمىن جانە تەگىستەيمىن. جۇمىسىم كەرەمەت اۋىر دەپ ايتپاس ەدىم. ءيا، كەيدە اۋىر بولشەكتەردى كوتەرۋگە تۋرا كەلەدى. ءبىراق بۇل سونشالىقتى قيىن ەمەس»، - دەيدى مارجان.
مارجان ۇلكەن وتباسىندا وسكەن، ولار 8 اعايىندى. ول ورتانشى قىزى بولعاندىقتان، نەگىزىنەن ەكى ۇلكەن اعاسى مەن ىنىسىنە كومەكتەسكەن ەكەن. بالا كەزىنەن كولىكتەرگە جاقىن بولعانىن ايتادى.
«اكەم شوپان بولدى. ءبىزدىڭ ۇيدە ءوز كولىگىمىز بولدى. مەن بالا كەزىمنەن ونىڭ ماشيناسىن اينالىپ، جانىنان شىقپايتىنمىن. كولىك جۇرگىزۋدى ەرتە ۇيرەندىم. مەن ءارقاشان كولىكتىڭ بولشەكتەرىنە، وعان قاتىستى بارلىق نارسەگە قىزىعۋشىلىق تانىتاتىنمىن»، - دەپ ەسكە الادى مارجان.
اۆتوكولىكتەرگە دەگەن قۇشتارلىعىنا قاراماستان، مارجان ەسەيە كەلە تىگىنشى ماماندىعىن وقىعان. ۇزاق جىلدار بويى قاراقارالى اۋدانىنىڭ كيروۆ تىگىن فابريكاسىندا جۇمىس ىستەگەن. سودان كەيىن زاۋىت جابىلعان كەزدە ول اۋرۋحاناعا شارۋاشىلىق مەدبيكەسى بولىپ جۇمىسقا ورنالاسقان. ءبىراق ءارقاشان جۇرەگىم كولىككە بۇرىپ تۇراتىن دەيدى.
«مەنىڭ جۇبايىم تالعاتبەك ءومىر بويى ماشينالاردى جوندەۋمەن اينالىپ كەلەدى. قيىن كەزدەردە وعان كومەكتەسۋگە تۋرا كەلدى. قالاي بولعاندا دا، بۇل جۇمىسقا بىرتىندەپ ۇيرەندىم. سودان كەيىن اۋرۋحانادا جۇمىسىمنان كەتىپ، كۇيەۋىمنىڭ اۆتوكولىك شەبەرحاناسىندا جۇمىس ىستەي باستادىم. قازىر ول ەكەۋمىز ءبىر- بىرىمىزگە، جۇمىسىمىزعا توسەلىپ العانىمىز سونشالىق، كەيدە وعان ايتقىزاي- اق قاجەتتى بولشەكتەر مەن سايماندارىن بەرىپ تۇرامىن. ول كولىكتىڭ مايىسقان جەرلەرىن ورنىنا كەلتىرۋىن اياقتاعاننان كەيىن مەن بوياۋعا، سودان كەيىن تەگىستەۋگە كىرىسەمىن»، - دەيدى مارجان.
ءبىر كولىكتى جوندەۋگە ەرلى-زايىپتى شەبەرلەر 2-3 كۇننەن ءبىر اپتاعا دەيىن ۋاقىت جۇمسايدى. مارجان جاڭا كليەنتتەر الدىمەن سەنىمسىزدىكپەن قارايدى، ءبىراق سودان كەيىن جۇمىسىما تاڭدانادى دەيدى. ولاردىڭ جۇبايىمەن بىرگە بۇكىل اۋدان بويىنشا 100 دەن استام تۇراقتى كليەنتتەرى بار.
«باسىندا ەر ادامدار ماعان تەمىر تۇلپارلارىن سەنىپ تاستاعىلارى كەلمەيدى. ءبىراق سودان كەيىن ولار ءارقاشان ورالادى. كەلەسى جولى ولار كىلتتەرىن تاستاپ، ەش ۋايىمسىز بارا بەرەدى. ويتكەنى ءبىز ءبارىن تياناقتى جانە ۇقىپتى جاسايتىنىمىزدى بىلەدى»، - دەيدى مارجان وسپانوۆا.
مارجان جۇبايىمەن بىرگە 4 بالا تىربيەلەگەن. ءۇش قىزى بوي جەتىپ، تۇرمىس قۇرعان، ۇلى ءالى ۇيلەنبەگەن. قازىر ولار نەمەرەلەرىن تاربيەلەپ جاتىر. انا رەتىندە دە، وشاق يەسى رەتىندە دە مارجان ءوز مىندەتىن ورىنداۋدى اۆتوكولىك شەبەرحاناسىنداعى جۇمىسىمەن بىرگە الىپ ءجۇرىپ كەلەدى. ول ءوزى ايتقانداي، كوز - قورقاق، قول - باتىر. ەڭ باستىسى - جۇمىستان تايىنباۋ كەرەك. ەگەر قالاساق، بارلىق جۇمىستى ىستەي الامىز دەيدى مارجان.