كۇندەلىكتى سەرۋەندەۋ ەرتە ءولىمنىڭ الدىن الادى - زەرتتەۋ
كۇنىنە 11 مينۋت سپورتپەن اينالىسۋ 10 مەزگىلسىز ءولىمنىڭ بىرەۋىنىڭ الدىن الاتىنى بەلگىلى بولدى.
بۇل تۋرالى قازاقپارات bbc-گە سىلتەمە جاساپ حابارلايدى.
زەرتتەۋدە جاتتىعۋدى اپتاسىنا كەم دەگەندە 150 مينۋت ۋاقىت ورىنداۋ ۇسىنىلعان. الايدا، ادامداردىڭ كوپشىلىگى بۇل ۇسىنىستاردى ورىندامايدى. ال ۇلتتىق دەنساۋلىق ساقتاۋ قىزمەتى (National Health Service, NHS) ەرەسەكتەرگە اپتاسىنا 150-300 مينۋت قارقىندىلىعى ورتاشا نەمەسە اپتاسىنا 75-150 مينۋت قارقىندى بەلسەندىلىكتى ۇسىنادى.
دەنە قىزمەتىنىڭ بەلسەندىلىگىنىڭ پايداسى تۋرالى زەرتتەۋلەردى تالداۋ ناتيجەسىندە اپتاسىنا 75 مينۋتقا نەمەسە كۇنىنە 11 مينۋتقا سايكەس كەلەتىن فيزيكالىق بەلسەندىلىكتىڭ ۇسىنىلعان كولەمىنىڭ جارتىسىن جاساۋدىڭ ءوزى جۇرەك- قان تامىرلارى اۋرۋلارىنا شالدىعۋدىڭ 20 جاعدايىنىڭ ءبىرىن جانە قاتەرلى ىسىك اۋرۋىنا شالدىعۋ 30 جاعدايدىڭ ءبىرىن الدىن الۋعا بولاتىنىن كورسەتتى. كۇندەلىكتى ءومىر سالتىنا ۆەلوسيپەد ايداۋ، جىلدام ءجۇرۋ، سەرۋەندەۋ نەمەسە بي بيلەۋدى قوسۋعا بولادى.
ناتيجەلەر كورسەتكەندەي، بۇل فيزيكالىق بەلسەندىلىك جۇرەك اۋرۋى مەن ينسۋلت قاۋپىن %17 جانە قاتەرلى ىسىك اۋرۋىن %7 تومەندەتۋگە جەتكىلىكتى. تۇراقتى جاتتىعۋلار دەنەدەگى مايدى ازايتىپ، قان قىسىمىن تومەندەتەدى، سونىمەن قاتار ۇيقىنى جانە جۇرەك جۇمىسىن جاقسارتادى. جاتتىعۋ جاساۋ قاتەرلى ىسىك اۋرۋىن ەمدەۋدە دە وتە ءتيىمدى ەكەنى اتاپ وتىلگەن. عالىمداردىڭ ايتۋىنشا، اپتاسىنا كەمىندە 150 مينۋت جاتتىعۋ جاساۋ ەرتە ءولىمنىڭ ءاربىر التىنشىسىنىڭ الدىن الادى.
جۇيەلى تۇردە جاتتىعۋ جاساۋ ءۇشىن ادامدارعا كەيبىر ادەتتەرىن وزگەرتۋ كەرەك. مىسالى، ماماندار جۇمىسقا نەمەسە دۇكەنگە جاياۋ نەمەسە ۆەلوسيپەدپەن جۇرۋگە، بالالار نەمەسە نەمەرەلەرمەن بەلسەندى ويىن ويناۋعا كەڭەس بەرەدى. ۇلتتىق دەنساۋلىق ساقتاۋ قىزمەتى ەرەسەكتەرگە بۇلشىقەتتى نىعايتۋ ءۇشىن اپتاسىنا ەكى رەت جاتتىعۋ ورىنداۋدى ۇسىنادى. يوگا، پيلاتەس، كىر تاسىن كوتەرۋ، باۋ-باقشا، ازىق- تۇلىك دۇكەنىنە جاياۋ بارۋ دا ادام دەنساۋلىعىنا جاقسى اسەر ەتەدى.