ەلوردالىق ۆيرۋسولوگ ىشەك باكتەريالارىنان ويۋلار قۇراستىردى

None
استانا. قازاقپارات - استانالىق بيولوگ ءارى ۆيرۋسولوگ دينارا ۋسپانوۆا عىلىمدى ۇلتتىق ونەرمەن بايلانىستىرىپ ەرەكشە دۇنيە جاساپ شىعاردى.

ول كىشىگىرىم زەرتتەۋ جۇرگىزۋ ارقىلى ىشەك ۆيرۋستارىنان ۇلتتىق ويۋلار قۇراستىرعان.

قازاقپارات ءتىلشىسى 8-ناۋرىز - حالىقارالىق ايەلدەر كۇنى مەرەكەسىنە وراي جاس زەرتتەۋشىمەن اڭگىمەلەسكەن ەدى.

28 جاستاعى دينارا ۋسپانوۆا بيولوگيا ماماندىعى بويىنشا باكالاۆريات، ماگيستراتۋرا جانە اسپيرانتۋرانى ءتامامداعان.

«ەڭبەك جولىمدى ۆيرۋسولوگيالىق زەرتحانادا لابورانت بولىپ باستادىم. قوسىمشا ماگيستراتۋرادا وقىپ ءجۇردىم. اسىرەسە مەنىڭ ۆيرۋسولوگ رەتىندەگى جۇمىسىم پاندەميا كەزىندە قىزا ءتۇستى. پاندەميا كەزىندە مەن استاناعا كوشىپ كەلىپ جۇمىس ىستەي باستادىم. قازىر ەلورداداعى زەرتحانالاردىڭ بىرىندە باكتەريولوگ دارىگەر بولىپ ەڭبەك ەتۋدەمىن. سونىمەن قاتار بيولوگيا عىلىمىنىڭ كانديداتى اتانۋ ءۇشىن ديسسەرتاتسيا قورعاعالى جاتىرمىن»، - دەدى دينارا ۋسپانوۆا.

ودان بولەك، دينارا ماماندىعى بويىنشا 8-ناۋرىز مەيرامىنا ارنالعان بايقاۋعا قاتىسىپ جاتىر.

«8-ناۋرىز حالىقارالىق ايەلدەر مەيرامى قارساڭىندا جۇمىستا قىز- كەلىنشەكتەر اراسىندا بايقاۋ ءوتىپ جاتىر. وسى ورايدا باكتەريالاردان ۇلتتىق ويۋلار جاساۋ يدەياسى كەلدى. ءوزىڭىز بىلەتىندەي، قازاقتا ءار ويۋدىڭ وزىندىك ماعىناسى بار. ونىڭ ۇستىنە ويۋ قولونەر تۇرىنە جاتادى، ال قولونەرمەن كوبىنە ايەل زاتى اينالىسادى. قولونەرشى نازىك جاندار ءار ويۋدى ورنىمەن قولدانا بىلگەن. سول سياقتى باكتەريالاردان ويۋلار جاساۋدا ەتنوگراف، پسيحولوگ مامانمەن اقىلداسىپ، ويۋلاردىڭ تاريحىنا قاتىستى ءبىراز اقپارات جينادىم. باكتەريالاردان ويۋلار جاساۋ ءادىسى قيىن ەمەس. ميكروبيولوگيا عىلىمىنىڭ كلاسسيكالىق ءادىسى قولدانىلادى»، - دەيدى بيولوگ.

زەرتتەۋشىنىڭ ايتۋىنشا، ويۋلار زەرتحانالىق جاعدايدا قاۋىپسىزدىك ەرەجەلەرى ساقتالا وتىرىپ جاساپ شىعارىلدى. كەيىن باكتەريالاردى قاۋىپسىزدەندىرۋ جويۋ تالاپتارىنا سايكەس جۇرگىزىلەدى.

«شىعارماشىلىق جۇمىسقا ىشەك باكتەريالارى قولدانىلدى. ولار قورشاعان ورتادا كەزدەسەدى، سۋ قويمالارىندا دا بولادى. سونىمەن قاتار ىشەك باكتەريالارى ادام اعزاسى مەن جانۋارلاردا دا بار. جالپى مەن بۇعان دەيىن دە ءتۇرلى دەڭگەيدەگى بايقاۋلار مەن عىلىمي جوبالارعا قاتىسىپ كەلەمىن»، - دەدى جاس عالىم.

سونداي- اق، مامان باكتەريالاردان ويۋلار جاساۋ كوپشىلىكتىڭ قىزىعۋشىلىعىن تۋدىرعانىن ايتتى.

«عىلىمنان بولەك، ەلىمىزدىڭ تاريحى، مادەنيەتى مەن ۇلتتىق ادەپ تۋرالى قىزىعىپ وقيمىن. ءار ادام ءوزىنىڭ شىققان تاريحى مەن مادەنيەتىن ءبىلۋ كەرەك دەپ سانايمىن. مەن قازاق دەگەن ۇلى حالىقتان شىققانىما ماقتانامىن. بوس ۋاقىتىمدا كوركەم ادەبي تۋىندىلاردى وقىعاندى جانە تازا اۋادا سەرۋەندەۋدى ۇناتامىن. قولونەر جانە سپورتپەن شۇعىلدانامىن»، - دەپ تولىقتىردى د. ۋسپانوۆا.

سوڭعى جاڭالىقتار