جايىن مەن كوكسەركە بالىقتارىن ەكسپورتتاۋعا تىيىم سالىنباق

استانا. قازاقپارات - قازاقستان اۋماعىنان مۇزداتىلعان جايىن مەن كوكسەركە بالىقتارىن اكەتۋگە تىيىم سالىنۋى مۇمكىن.

بۇل تۋرالى اشىق تالقىعا شىعارىلعان بالىق شارۋاشىلىعى كوميتەتى ءتوراعاسىنىڭ بۇيرىعىندا جازىلعان، دەپ حابارلايدى قازاقپارات ءتىلشىسى.

«جاڭا مۇزداتىلعان نەمەسە سالقىنداتىلعان جايىن جانە كوكسەركە بالىقتارىن شىعارۋعا 6 اي مەرزىمگە تىيىم سالۋ ەنگىزىلسىن»، - دەلىگەن قۇجاتتا.

بۇيرىققا قوسىمشا تۇسىندىرمەدە بۇل - بالىق شيكىزاتى تاپشىلىعىن بولدىرماۋ ماقساتىندا قابىلدانىپ وتىرعانى جازىلعان.

«ستاتيستيكا دەرەكتەرى بويىنشا وڭدەلمەگەن بالىق ەكسپورتىنىڭ جالپى بالىق ەكسپورتىنداعى ۇلەسى %55. بىلتىر بارلىق وڭدەۋ كاسىپورىندارىنىڭ جالپى وندىرىستىك قۋاتى 31,2 مىڭ توننا بالىقتى وڭدەدى. بۇرىن بۇل مەجە جىلىنا 142 مىڭ تونناعا جۋىق بولاتىن. ياعني، بىلتىر كاسىپورىنداردىڭ جۇكتەمەسى %22 دى قۇرادى. كاسىپورىنداردىڭ جۇمىس ىستەمەۋنىڭ سەبەپتەرىنىڭ ءبىرى بالىق شيكىزاتىنىڭ جەتىسپەۋشىلىگى. وسى ماسەلە بويىنشا ەكولوگيا جانە تابيعي رەسۋرستار مينيسترلىگى بالىق شارۋاشىلىعى سۋبەكتىلەرىمەن، بيزنەس وكىلدەرىمەن جانە بارلىق مۇددەلى تاراپتارمەن شەكتەۋلەر ەنگىزۋ ماسەلەسىن تالقىلاۋ بويىنشا ءبىرقاتار كەڭەس وتكىزدى.

وسىعان بايلانىستى تالقىلاۋ بارىسىندا ايتىلعان كاسىپكەرلەردىڭ پىكىرىن ەسكەرە وتىرىپ، باستاپقى كەزەڭدە 6 اي مەرزىمگە قازاقستان اۋماعىنان ەكسپورتتاعى ۇلەسى %10 دان از جاڭا مۇزداتىلعان بالىقتاردىڭ ەكسپورتىن شەكتەۋ ۇسىنىلادى. بۇل جايىن مەن كوكسەركەگە قاتىستى»، - دەپ تۇسىندىرمە بەرىلگەن بۇيرىققا.

قۇجات 14-ناۋرىزعا دەيىن كوپشىلىك تالقىلاۋدا بولادى.