تۇركىستان وبلىسىندا ءۇش جاسار ءبۇلدىرشىندى قۇتقارعان ءجاسوسپىرىم ماراپاتتالدى
وبلىس اكىمى دارحان ساتىبالدى باتىر بالانى قابىلداپ، باعالى سىيلىقپەن ماراپاتتادى، دەپ حابارلايدى قازاقپارات ءتىلشىسى.
كۇنى كەشە ماقتاارال اۋدانىنا قاراستى جامبىل اۋىلدىق وكرۋگىندە بولعان وقيعانىڭ ۆيدەوسى الەۋمەتتىك جەلىدە تاراپ كەتتى. كوپشىلىك سەگىزىنشى سىنىپ وقۋشىسى نۇركەلدى نۇرپولاتتىڭ باتىل ءارى جىلدام ارەكەتىنە ءدان ريزا بولىپ، العىسىن جاۋدىرعان ەدى.
كوزسىز ەرلىك كورسەتكەن بالاعا ايماق باسشىسى دا ريزاشىلىعىن جەتكىزدى.
«كىشكەنتاي بالانى سۋدان قۇتقارىپ العانىڭدى اقپارات قۇرالدارى مەن الەۋمەتتىك جەلىدەن كورىپ، سۇيسىندىك. اتتىڭ ۇستىندە ۇلكەن جىگىت سياقتى كورىندىڭ. ءبىراق وقۋشى ەكەنسىڭ. وسى ەرلىگىڭ ءۇشىن ساعان جانە وزىڭدەي پاتريوت ۇلدى تاربيەلەگەن اتا- اناڭا العىسىمدى ايتامىن. جارايسىڭ!»، - دەدى دارحان ساتىبالدى.
وبلىس اكىمى سونداي- اق، نۇركەلدىگە العىس حات پەن نوۋتبۋك سىيعا تارتتى.
ءوز كەزەگىندە وقۋشىنىڭ اكەسى ارنايى كوڭىل ءبولىپ، قۇرمەت كورسەتكەن ءوڭىر باسشىسىنا راحمەت ايتتى.
ەسكە سالا كەتەيىك، نۇركەلدى نۇرپولات 4-ناۋرىز كۇنى ساعات 11:30 شاماسىندا كانالدا اعىپ بارا جاتقان كىشكەنتاي بالانى بايقاپ قالعان ەدى.
ويلانباستان اتىنان سەكىرىپ ءتۇسىپ، بالانى سۋدان الىپ شىعادى. ەس- ءتۇسسىز جاتقان بالاعا تۇرعىندار العاشقى كومەك كورسەتىپ، امان الىپ قالدى.
ونى تەكسەرگەن دارىگەرلەر جاعدايىنىڭ جاقسى ەكەنىن ايتقان بولاتىن.