بالا تۋۋعا ارنالعان ءبىرجولعى جاردەماقى مولشەرى ءوستى

استانا. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا انا مەن بالانى جانە كوپبالالى انالاردى قولداۋ بويىنشا اتقارىلىپ جاتقان مەملەكەتتىك شارالار تۋرالى ايتىپ بەردى، دەپ حابارلايدى قازاقپارات ءتىلشىسى.

«بيىل انا مەن بالانى قولداۋ جونىندەگى شارالارمەن 2,1 ميلليون وتباسى قامتىلادى. اتالعان وتباسىلارعا مەملەكەتتىك بيۋجەت جانە مەملەكەتتىك الەۋمەتتىك ساقتاندىرۋ قورى ەسەبىنەن 1,2 تريلليون تەڭگە باعىتتالادى. سونىمەن قاتار، بيىل مەملەكەتتىك الەۋمەتتىك ساقتاندىرۋ قورىنان 258 مىڭنان استام جۇكتى جانە بوسانعان ايەلدەر الەۋمەتتىك تولەم الادى. 1- قاڭتاردان باستاپ بالا تۋۋعا ارنالعان ءبىرجولعى جاردەماقى مولشەرى ۇلعايتىلدى. سول سياقتى بيىل ءبىرىنشى، ەكىنشى جانە ءۇشىنشى بالا تۋىلعان كەزدە وتباسى 131 مىڭ تەڭگە الادى، ال ءتورتىنشى بالا ءۇشىن 217 مىڭ تەڭگەدەن استام جاردەماقى بەرىلەدى»، - دەدى تامارا دۇيسەنوۆا ۇكىمەت وتىرىسىندا.

ودان ءارى مينيستر كوپ بالالى انالاردى قولداۋ شارالارىنا توقتالدى.

«ءتورت بالاسى بار وتباسىعا تولەنەتىن اي سايىنعى جاردەماقىنىڭ ەڭ تومەنگى مولشەرى 55 مىڭ تەڭگەدەن ءسال اسادى. ال 8 جانە ودان دا كوپ بالالى وتباسىلارعا ەڭ جوعارى مولشەرى 110 مىڭ تەڭگەنى قۇرايدى. بيىل اتالعان جاردەماقىنى قارجىلاندىرۋ كولەمى 410 ميلليارد تەڭگەگە 544 مىڭ وتباسىنا تولەۋ جوسپارلانىپ وتىر. «التىن القا» جانە «كۇمىس القامەن» ماراپاتتالعان انالارعا تاعى ءبىر جاردەماقى بار. ول ءومىر بويى تاعايىندالادى جانە اي سايىن تولەنەدى. بۇگىندە اتالعان جاردەماقىنى 230 مىڭ انا الىپ وتىر. ول ءۇشىن رەسپۋبليكالىق بيۋجەتتەن 61 ميلليارد تەڭگە قاراستىرىلعان»، - دەيدى ۆەدومستۆو باسشىسى.