ەلوردادا ءماجىلىس دەپۋتاتتاعىنا ەڭ تانىمال كانديدات كىم

استانا. قازاقپارات - «دەموكراتيا ينستيتۋتى» عىلىمي-زەرتتەۋ قاۋىمداستىعى ناۋرىزدىڭ 3-6 كۇندەرى ارالىعىندا ەلوردالىق سايلاۋشىلاردىڭ سايلاۋ بەلسەندىلىگىنە الەۋمەتتىك زەرتتەۋ جۇرگىزدى.

تەلەفون ارقىلى جۇرگىزىلگەن ساۋالناماعا جاسى 18 دەن اسقان 1600 رەسپوندەنت قاتىستى، دەپ حابارلايدى قازاقپارات ءتىلشىسى.

ەلوردالىقتاردىڭ سايلاۋ بەلسەندىلىگى قانداي؟

ەڭ الدىمەن استانا تۇرعىندارىنا «2023-جىلدىڭ 19- ناۋرىزىندا سايلاۋ وتەدى. ءسىز داۋىس بەرۋگە قاتىساسىز با؟» دەگەن ساۋال قويىلدى. بۇل ساۋالعا «ءيا» دەپ جاۋاپ بەرگەندەردىڭ ۇلەسى 44,8 پايىزدى قۇرايدى. بۇل رەتتە جاستاردىڭ بەلسەندىلىگىنىڭ تومەندىگى بايقالادى. نە ءبارى - 17,1 پايىز. ال ساۋالناماعا قاتىسقان جاسى 60 تان استان قالا تۇرعىندارىنىڭ 59,2 پايىزى داۋىس بەرۋگە باراتىندىعىن ايتقان. جالپى اۋداندار بويىنشا سايلاۋ كۇنىندە داۋىس بەرۋگە دايىن سايلاۋشىلاردىڭ ۇلەسى مىناداي: ەسىل اۋدانى - 48,6، سارىارقا اۋدانى - 37,2، الماتى اۋدانى - 42,2، بايقوڭىر اۋدانى - 46,6 پايىز.

1№ سايلاۋ وكرۋگى. ءبىرمانداتتى وكرۋگ بويىنشا كانديداتتار قانشالىقتى تانىمال

قوعامدىق پىكىرگە جۇرگىزىلگەن ساۋالناما ناتيجەلەرىن سالىستىرا ساراپتاما جاساۋ بارىسىندا 1№ وكرۋگتەن كانديداتتار اراسىندا داۋلەت تۇرلىحانوۆتىڭ كوش باستاپ تۇرعانىن بايقاۋعا بولادى. ونىڭ تانىمالدىق ۇلەسى الماتى اۋدانىندا 84,4، ال بايقوڭىر اۋدانىندا 87,6 پايىزدى قۇرايدى. تۇرعىندار كانديدات جايلى ەڭ الدىمەن تەلەارنالار مەن الەۋمەتتىك جەلىلەر ارقىلى ءبىلىپ وتىر. ودان كەيىنگى ورىندا تاراتىلاتىن ۇگىت ماتەريالدارى مەن بيلبوردتار تۇر.

تانىمالدىعى بويىنشا ەكىنشى ورىندا تۇرعان كانديدات - تاڭىربەرگەن بەردوڭعاروۆ. ونى الماتى اۋدانى تۇرعىندارىنىڭ 22,6، ال بايقوڭىر اۋدانىنىڭ 20 پايىزى بىلەدى. ەلوردالىقتار كانديداتتى الەۋمەتتىك جەلىلەر ارقىلى تانيدى. ءۇشىنشى ورىندا - ءۋاليحان قايساروۆ. كانديداتتى الماتى اۋدانى سايلاۋشىلارىنىڭ 10,4، بايقوڭىر اۋدانىنىڭ 14,2 پايىزى الەۋمەتتىك جەلى ارقىلى بىلەدى.

گۇلجامال بايمەنوۆا، سۇلتانحان ءجۇسىپ، ۆەرونيكا كيم، مارات جىلانبايەۆتاردىڭ تانىمالدىعى 5-10 پايىز ارالىعىندا. قالعان 30 كانديداتتى ەلوردالىقتار تانىمايدى دەسەك تە بولادى.

ۇگىت ناۋقانىنىڭ تيىمدىلىگى

«جالپى قاي كانديداتتىڭ ۇگىت ماتەريالدارىن اتاپ وتەر ەدىڭىز؟» دەگەن ساۋالعا دا رەسپوندەنتتەردىڭ باسىم بولىگى داۋلەت تۇرلىحانوۆتىڭ بەلسەندىلىگىنە كوڭىلى تولاتىندىعىن اتاپ وتكەن. الماتى (73,8 پايىز) مەن بايقوڭىر (71,2) پايىز تۇرعىندارى كانديداتتىڭ باعدارلاماسىمەن تانىس. ال الماتى اۋدانى تۇرعىندارىنىڭ 25,5، بايقوڭىر اۋدانىنىڭ 13 پايىزى تاڭىربەرگەن بەردوڭعاروۆتىڭ سايلاۋ ناۋقانىن بىلەدى. ءۇشىنشى ورىندا ءۋاليحان قايساروۆ تۇر: بايقوڭىر اۋدانى بويىنشا - 8,8، الماتى اۋدانى بويىنشا 9,2 پايىز.

كانديداتتار رەيتينگى

كانديداتتاردىڭ سايلاۋعا قاتىستى رەيتينگى «ەگەر ءسىز پارلامەنت ءماجىلىسى سايلاۋىنا بارساڭىز، وندا وكۋرگىڭىز بويىنشا ءماجىلىس دەپۋتاتتاعىنا قاي قانديداتقا داۋىس بەرەسىز؟» دەگەن ساۋال ارقىلى باعالاندى.

ساۋالناما قورىتىندىسىندا 1№ وكرۋگى مانداتىنا داۋلەت تۇرلىحانوۆ تەڭدەسسىز ۇمىتكەر بولىپ وتىر. ەكى اۋداندا دا سايلاۋعا قاتىساتىن سايلاۋشىلاردىڭ باسىم بولىگى، ناقتىراق ايتقاندا الماتى اۋدانى تۇرعىندارىنىڭ 77,2، ال بايقوڭىر اۋدانىنىڭ 70,8 پايىزى داۋلەت تۇرلىحانوۆقا داۋىس بەرۋگە دايىن. ودان كەيىنگى ورىندا كەلە جاتقان تاڭىربەرگەن بەردوڭعاروۆقا الماتى اۋدانى تۇرعىندارىنىڭ 11,8, ال بايقوڭىر اۋدانى تۇرعىندارىنىڭ 13,2 پايىزى داۋىس بەرەتىندىكتەرىن ايتقان. ال الماتى اۋدانى سايلاۋشىلارىنىڭ 5,5، بايقوڭىر اۋدانى سايلاۋشىلارىنىڭ 4,8 پايىزى ءۋاليحان قايسارعا داۋىس بەرمەك.

2№ سايلاۋ وكرۋگى. ءبىرمانداتتى وكرۋگ بويىنشا كانديداتتار قانشالىقتى تانىمال

2№ سايلاۋ وكرۋگى بويىنشا كانديداتتار اراسىندا داۋلەت مۇقايەۆتىڭ تانىمالدىعى وتە جوعارى ەكەندىگىن بايقاۋعا بولادى. ونى ەسىل اۋدانى سايلاۋشىلارىنىڭ 68,4، سارىارقا اۋدانى تۇرعىندارىنىڭ 77,2 پايىزى جاقسى بىلەدى. تۇرعىنداردىڭ باسىم بولىگى كانديداتپەن الەۋمەتتىك جەلى ارقىلى تانىس. ەكىنشى جانە ءۇشىنشى ورىندا تاراتىلاتىن ۇگىت ماتەريالدارى مەن بيلبوردتار تۇر. تانىمالدىعى بويىنشا ەكىنشى ورىندا ەرىك جولجاقسىنوۆ تۇر. كانديداتتىڭ ەسىل اۋدانىنداعى تانىمالدىعى 26، ال سارىارقا بويىنشا 17 پايىزدى قۇرايدى. تۇرعىندار ونى تەلەارنالار مەن الەۋمەتتىك جەلىلەر ارقىلى بىلەدى. ءۇشىنشى ورىندا - باقىتبەك سماعۇل. كانديداتتى ەسىل اۋدانى تۇرعىندارىنىڭ 20، سارىارقا اۋدانى تۇرعىندارىنىڭ 14 پايىزى بىلەدى. كانديدات تۋرالى اقپاراتتاردىڭ نەگىزگى كوزى - الەۋمەتتىك جەلىلەر، تانىستار مەن تۋعان-تۋىستار بەرگەن اقپارات.

ا. امىرتايەۆ، ن. وتەشيەۆ، ا. شورايەۆ، د. لوريا، ت. ءومىرزاقوۆ، ر. جانسەيىتوۆ، يا. فەدوروۆتاردىڭ تانىمالدىعى 5-10 پايىز ارالىعىندا عانا. ال قالعان 33 كانديداتتى ەلوردالىقتار تانىمايدى دەسەك تە بولادى. ولاردىڭ تانىمالدىعى 5 پايىزعا دا جەتپەيدى.

ۇگىت ناۋقانىنىڭ تيىمدىلىگى

قوعامدىق پىكىرگە جۇرگىزىلگەن ساۋالناما داۋلەت مۇقايەۆتىڭ ەكى اۋداندا دا وتە ءتيىمدى ۇگىت-ناسيحات جۇمىسىن جۇرگىزىپ جاتقانىن كورسەتىپ وتىر. ونىڭ شتابى جۇمىسىمەن ەسىل اۋدانى رەسپوندەنتتەرىنىڭ 63، ال سارىارقا اۋدانى سايلاۋشىلارىنىڭ 74 پايىزى تانىس. ەسىل (23 پايىز) مەن سارىارقا (14) اۋداندارى بويىنشا ەكىنشى ورىندا ەرىك جولجاقسىنوۆ تۇر. ەكى اۋداندا ءۇشىنشى ورىنعا شىققان كانديداتتار وزگەرگەن. ماسەلەن، ەسىل اۋدانىندا ا. امىرتايەۆ تۇرعىندار اراسىندا تانىمال. ونى سايلاۋشىلاردىڭ 13 پايىزى بىلەدى. ال سارىارقا اۋدانىندا ءۇشىنشى ورىندا 11 پايىزبەن باقىتبەك سماعۇل تۇر.

كانديداتتار رەيتينگى

داۋلەت مۇقايەۆ ءوز وكرۋگىندەگى ەڭ تانىمال كانديدات سانالادى. ەكى اۋداندا دا ساۋالناماعا قاتىسقان رەسپوندەنتتەردىڭ باسىم بولىگى 19- ناۋرىز كۇنى وعان داۋىس بەرۋگە دايىن. ناقتىراق ايتقاندا، داۋلەت مۇقايەۆتى ەسىل اۋدانى تۇرعىندارىنىڭ 60,4، سارىارقا اۋدانى تۇرعىندارىنىڭ 70,8 پايىزى قولدايدى. ودان كەيىنگى ورىندا ەرىك جولجاقسىنوۆ كەلە جاتىر. ساۋالناماعا قاتىسقان ەسىل اۋدانى تۇرعىندارىنىڭ 21، سارىارقا اۋدانى تۇرعىندارىنىڭ 13 پايىزى داۋىس بەرەتىندىكتەرىن ايتقان. ۇزدىك ۇشتىكتى باقىتبەك سماعۇل اياقتاپ تۇر. وعان ەسىل اۋدانى رەسپوندەنتتەرىنىڭ 6، سارىارقا اۋدانى رەسپوندەنتتەرىنىڭ 8 پايىزى داۋىس بەرۋگە دايىن.

ساۋالناما 13- اقپان كۇنى ورتالىق سايلاۋ كوميسسياسىنا رەسمي حابارلاندىرۋ ارقىلى جۇرگىزىلدى.