دۇنگەندەردىڭ اۋىلىنان جەر بەرىلگەن. ءشامشىنىڭ قىزدارعا ارنالعان اتاقتى اندەرىنىڭ تاريحى

استانا. قازاقپارات - اتى اڭىزعا اينالعان كومپوزيتور ءشامشى قالداياقوۆتىڭ قىزدار قاۋىمىنا ارنالعان اندەرى كوپ.

سونىڭ ىشىندە «دۇنگەن قىزى»، «سىعان سەرەناداسى» سەكىلدى اندەرى ءالى كۇنگە حالىق جادىندا. «استارلى اقيقات» باعدارلاماسىندا وسى اندەردىڭ شىعۋ تاريحى ايتىلدى، - دەپ حابارلايدى Massaget.kz.

ءشامشى قالداياقوۆ ءبىر جىلدارى جامبىل وبلىسىنداعى دۇنگەن اۋىلىندا تۇرعان كەزى بولعان. سول ۋاقىتتا دۇنگەن قىزىنا ارناپتى.

«ءشامشى قالداياقوۆقا دۇنگەندەردىڭ اۋىلىنان جەر بەرىلگەن، ول كىسى سول جەردە تۇرعان. سوندىقتان شىققان بولۋى كەرەك. ءبىر جينالىستا ءبىر جىگىت «اعا، ءان شىعارتساڭىز، قادىر مىرزاالىگە شىعارتىڭىزشى» دەپتى. «تامدى ارۋىنىڭ» ءسوزىن قادىر مىرزاالىگە شىعارتقان»، - دەيدى مادەنيەتتانۋشى بەردالى وسپان.

كۇنى بۇگىنگە دەيىن ءبىراز ءانشىنىڭ رەپەرتۋارىنداعى ەڭ تانىمال انگە اينالعان «سىعان سەرەناداسى» تۋىندىسى دا كومپوزيتوردىڭ عاشىق بولعان قىزىنا ارنالىپتى.

«سىعان سەرەناداسى» دەگەن ءانى بار عوي. ول ۇلى ادام بولعان. ونەر ادامى بولعان سوڭ ىزدەنەدى عوي. ءشامشى اعامىز - ءبىر كەزدەرى سىعان تابورىمەن (توبىمەن - ەسك.) كەتىپ قالعان كىسى. سول جەردە ءبىراز ءومىر سۇرگەن. سول كەزدە يزولدا دەگەن قىزعا عاشىق بولعان. يزولدا دا اعامىزعا عاشىق بولعان. يزولدا «قوسىلايىق» دەگەندە، ءشامشى اعامىز «قوسىلۋعا بولادى عوي، ءبىراق جۇرت ءبىزدى تۇسىنبەيدى» دەپتى. سودان كەيىن وسى ءان شىعىپ، ونىڭ دا ءسوزىن قادىر مىرزاالىگە جازدىرتقان»، - دەيدى مادەنيەتتانۋشى.