قازاقستاندا رەسەيلىك ج و و-لاردىڭ فيليالىن اشۋدى رەتتەيتىن كەلىسىم ازىرلەندى

استانا. قازاقپارات - رەسەيدە قازاقستاننىڭ جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ فيليالدارىن جانە قازاقستاندا رەسەيدىڭ جوعارى ءبىلىم بەرەتىن ۇيىمداردىڭ فيليالدارىن قۇرۋ تۋرالى كەلىسىم جوباسى ازىرلەندى، دەپ حابارلايدى قازاقپارات ءتىلشىسى.

«اشىق» ن ق ا پورتالىندا جاريالانعان كەلىسىم جوباسىندا ەلىمىزدە رەسەيلىك جوعارى وقۋ ورىندارىنىڭ فيليالدارىن اشۋ كەزىندە قازاقستان تاراپىنان ليسەنزيا الۋ شارالارى قامتىلعان.

«قازاقستان فيليالىندا جوعارى ءبىلىم بەرۋ باعدارلامالارىن مەڭگەرگەن جانە قورىتىندى اتتەستاتتاۋدان ويداعىداي وتكەن ءبىلىم الۋشىلارعا ق ر زاڭناماسىنا سايكەس بەلگىلەنگەن ۇلگىدەگى ءبىلىم تۋرالى قۇجاتتار بەرىلەدى. ال رەسەي فيليالىندا جوعارى ءبىلىم بەرۋ باعدارلامالارىن مەڭگەرگەن جانە قورىتىندى اتتەستاتتاۋدان ويداعىداي وتكەن ءبىلىم الۋشىلارعا ر ف زاڭناماسىنا سايكەس بەلگىلەنگەن ۇلگىدەگى ءبىلىم جانە بىلىكتىلىك تۋرالى قۇجاتتار بەرىلەدى»، - دەپ جازىلعان قۇجاتتا.

كەلىسىم شەڭبەرىندە قازاقستاندا قۇرىلاتىن رەسەيدىڭ جوعارى ءبىلىم بەرۋ ۇيىمدارىنىڭ فيليالدارىن ليسەنزيالاۋ كەزىندە ەل ۇكىمەتى وزگە دە تالاپتار بەكىتۋگە قۇقىلى.

«فيليالدا وقىتىلۋى مۇمكىن كاسىپتەردىڭ، ماماندىقتاردىڭ جانە دايارلاۋ باعىتتارىنىڭ تىزبەلەرىن كىشى كوميسسيا ايقىندايدى. فيليالداردا وقىتۋ فيليالدار ورنالاسقان ەلدەگى ءبىلىم بەرۋ تىلىنە قويىلاتىن تالاپتار ەسكەرىلە وتىرىپ، ءبىلىم بەرۋ باعدارلامالارى شەڭبەرىندە فيليالدار ورنالاسقان ەلدىڭ مەملەكەتتىك ءتىلى جانە تاريحى مىندەتتى تۇردە وقىتىلا وتىرىپ، ەكى ەلدىڭ مەملەكەتتىك تىلدەرىندە جۇرگىزىلۋى مۇمكىن»، - دەلىنگەن كەلىسىم جوباسىندا.

كۇشىنە ەنۋى مۇمكىن كەلىسىم 5 جىل بويى قولدانىستا بولادى. ەگەر قازاقستان مەن رەسەي ۇكىمەتتەرى ءتيىستى كەزەڭ اياقتالعانعا دەيىن 1 جىلدان كەشىكتىرمەي كەلىسىمدى توقتاتۋ نيەتى تۋرالى جازباشا حابارلاما جىبەرمەسە، كەلەسى بەسجىلدىق مەرزىمگە اۆتوماتتى تۇردە ۇزارتىلادى.

قۇجات 24- ناۋرىزعا دەيىن كوپشىلىك تالقىلاۋدا بولادى.

اۆتور

ءاليحان اسقار