كانديداتتاردىڭ سالىق مالىمەتتەرىندەگى قايشىلىقتار نەگە سايلاۋ كۇنى جاقىنداعان كەزدە عانا انىقتالىپ جاتىر
«كانديداتتاردىڭ سالىق دەكلاراتسياسىنداعى سايكەسسىزدىكتەردى تىركەۋ كەزىندە انىقتاپ، ەسكەرتۋگە نە كەدەرگى؟ نەلىكتەن كانديدات تىركەۋدەن ءوتىپ، ۇگىت- ناسيحات كەزەڭىنە جىبەرىلگەننەن كەيىن عانا سالىق دەرەكتەرى تەكسەرىلىپ، ۇمىتكەرلىكتەن شىعارىلادى؟»، - دەپ سۇرادى ب ا ق وكىلى ورتالىق سايلاۋ كوميسسياسىنىڭ مۇشەلەرىنەن.
اسىلبەك سماعۇلوۆتىڭ ايتۋىنشا، قازىر قوعام تاراپىنان وسى ماندەس سۇراقتار ءجيى ءتۇسىپ جاتقان كورىنەدى.
«بىرەۋ بىلەدى، بىرەۋ بىلمەيدى، ءبىزدىڭ ايتارىمىز مىناۋ. بىزگە كەلىپ تۇسەتىن، وكرۋگتىك سايلاۋ كوميسسياسىنا كەلەتىن مالىمەت - تەك قانا انىقتاما. ءبىز سول انىقتاما بويىنشا شەشىم قابىلدايمىز. ءارى قاراي ولار بەرگەن مالىمەتتىڭ تولىقتىعىن، دۇرىستىعىن تەكسەرەتىن - سالىق ورگاندارى. ياعني سالىق ورگاندارى ول جەردە ازاماتتار دەرەكتەرىن دۇرىس كورسەتپەسە، دۇرىس ەمەس ەكەنى تۋرالى مالىمەت بەرەدى»، - دەدى و س ك مۇشەسى.
ونىڭ ايتۋىنشا، بۇل ماسەلە سايلاۋ تۋرالى كونستيتۋتسيالىق زاڭنىڭ 89-بابىمەن رەتتەلەدى.
«ياعني ول بىزدەگى سايلاۋ تۋرالى كونستيتۋتسيالىق زاڭنىڭ 89-بابى بويىنشا كانديداتتاردىڭ وزدەرىنىڭ دەرەكتەرىن دۇرىس بەرمەۋى نەمەسە قاتەلەسۋى، تاعى باسقالارى ول كىسىنى تىركەۋدەن قايتادان الىپ تاستاۋعا قۇقىق بەرەدى.
سوندىقتان ءبىز انىقتامادان باسقا ەشتەڭە كورە المايمىز»، - دەدى اسىلبەك سماعۇلوۆ.
سونداي- اق، و س ك اتالمىش تەلەۆيزيالىق پىكىرسايىسقا قاتىسۋشىلاردىڭ ءتىزىمىن ماقۇلدادى.
اۆتور
ەسىمجان ناقتىباي