اتا-انا مەكتەپتەگى بالاسىنىڭ قاۋىپسىزدىگى ءۇشىن الاڭداماۋى قاجەت - سمايىلوۆ

None
استانا. قازاقپارات - اتا-انا مەكتەپتەگى بالاسىنىڭ جاعدايى مەن قاۋىپسىزدىگى ءۇشىن الاڭداماۋى قاجەت. بۇل تۋرالى پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«بالالاردىڭ قاۋىپسىزدىگىن قامتاماسىز ەتۋ ماسەلەسى - مەملەكەتتىڭ اسا ماڭىزدى مىندەتتەرىنىڭ ءبىرى. اتا- انا مەكتەپتەگى بالاسىنىڭ جاعدايى مەن قاۋىپسىزدىگى ءۇشىن الاڭداماۋى قاجەت. بۇل باعىتتا نورماتيۆتىك تە، ۇيىمداستىرۋ جاعىنان دا بارلىق دەڭگەيدە جۇيەلى شارالار قابىلدانۋدا. مەملەكەت باسشىسىنىڭ تاپسىرماسىنا سايكەس بالالاردى قورعاۋ جونىندەگى كەشەندى جوسپاردىڭ جوباسى ازىرلەندى. ءبىلىم بەرۋ ۇيىمدارىن دابىل كنوپكالارىمەن جانە بەينەباقىلاۋ جۇيەلەرىمەن جابدىقتاۋعا، ولاردى پوليتسيا بولىمشەلەرىنە قوسۋعا، ليتسەنزيالانعان كۇزەتپەن قامتاماسىز ەتۋگە قويىلاتىن تالاپتار كۇشەيتىلدى»، - دەدى ءاليحان سمايىلوۆ ۇكىمەت وتىرىسىندا.

ونىڭ اتاپ وتۋىنشە، ءبىلىم بەرۋ ۇيىمدارىندا قاۋىپسىزدىك تالاپتارىنىڭ ساقتالۋىنا تۇراقتى تۇردە مونيتورينگ جۇرگىزىلۋى ءتيىس.

«اتقارىلعان شارالارعا قاراماستان، وڭىرلەردە پروبلەمالار ءالى دە جەتكىلىكتى. بەينەباقىلاۋ ورناتىلعان مەكتەپتەردىڭ اراسىندا كامەرالارى ستاندارتتار مەن تەحنيكالىق تالاپتارعا سايكەس كەلمەيتىن مەكتەپتەر دە بار. ەلىمىزدەگى 1100 گە جۋىق مەكتەپ پوليتسيانىڭ جەدەل باسقارۋ ورتالىقتارىنا قوسىلماعان. باقىلاۋ رەجيمى قاتاڭ ساقتالمايدى»، - دەدى ول.

ۇكىمەت باسشىسىنىڭ دەرەگىنشە، تۇركىستان جانە سولتۇستىك قازاقستان وبلىستارىنداعى مەكتەپتەردە ليتسەنزيالانعان كۇزەت قىزمەتتەرىمەن كەلىسىمدەر جاسالماعان.

«كۇزەتكە كوبىنەسە ارنايى دايارلىقتان وتپەگەن ادامدار تارتىلادى. وسى ماسەلەلەردىڭ بارلىعىن شەشۋ كەرەك. ويتكەنى بۇل - بالالارىمىزدىڭ قاۋىپسىزدىگى»، - دەدى ءاليحان سمايىلوۆ.


سوڭعى جاڭالىقتار