تۇركيا مەن سيرياعا گۋمانيتارلىق جۇك جەتكىزگەن ۇشقىشتار ماراپاتتالدى

None
استانا. قازاقپارات - تۇركيا مەن سيرياعا گۋمانيتارلىق جۇكتەردى جەتكىزۋگە قاتىسقان ۇلتتىق ۇلاننىڭ اسكەري قىزمەتشىلەرى پرەزيدەنت جارلىعىمەن مەملەكەتتىك ناگرادالارمەن ماراپاتتالدى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

«اسا اۋىر كۇندەردە تۇركيا مەن سيرياعا كومەك كورسەتۋدە ەلىمىزدىڭ ۇلتتىق ۇلانى سىرت قالمادى. ءاردايىم تولىق جاۋىنگەرلىك دايىندىقتا بولاتىن ۇشۋ قۇرامى زارداپ شەككەن مەملەكەتتەرگە گۋمانيتارلىق جۇكتەردى جەتكىزۋگە بەلسەندى قاتىستى. ولار بارلىعى التى رەيس جاسادى: سيرياعا - ءتورت، تۇركياعا - ەكى. بۇل ناگرادالار مەملەكەت باسشىسىنىڭ اتىنان جانە ونىڭ تاپسىرماسىمەن بەرىلۋدە»، - دەپ اتاپ ءوتتى ىشكى ىستەر ءمينيسترى مارات احمەتجانوۆ.

ۇلتتىق ۇلاننىڭ 3656 اسكەري ءبولىمىنىڭ ليتەرلىك اۆياتسيا وتريادىنىڭ كەمە كومانديرى حابيبوللا بەرىكبول ۇلىنىڭ ايتۋىنشا، سيرياعا ساپار كوپتەگەن قيىندىقتارمەن ءوتتى.

«ءبىز سيرياعا كومەك كورسەتكەن العاشقى ەلدەردىڭ ءبىرى بولدىق. بەلگىلى ءبىر قيىندىقتار بولدى، ماسەلەن، ەلدە GPS سيگنالدارى جۇمىس ىستەمەدى. وسىعان بايلانىستى بىزگە ناۆيگاتسياداعى بۇرىنعى، ەسكى ادىستەردى قولدانۋعا تۋرا كەلدى. راديوبايلانىس وتە ناشار بولدى. ءبىراق سيريادا ءبىزدى جىلى ءارى قۋانىشپەن قارسى الدى. قازاقستان تۇرعىندارىنان گۋمانيتارلىق كومەك راسىمەن دە، دەر ۋاقىتىندا جەتتى. ءدال سول كەزدە بىزدەن باسقا ەلدەردەن قۇتقارۋشى ارىپتەستەرىمىز ءالى بارماعان ەدى»، - دەدى اۋە كەمەسىنىڭ كومانديرى.

ۇلتتىق ۇلاننىڭ باس قولباسشىسى ەركىن بوتاقانوۆ اتاپ وتكەندەي، جەتكىزىلگەن گۋمانيتارلىق جۇكتەردىڭ جالپى كولەمى 55 توننانى قۇرادى. سونىمەن قاتار اپات ايماعىنان 8 جولاۋشى شىعارىلدى.

ايتا كەتەيىك، پرەزيدەنت قاسىم- جومارت توقايەۆتىڭ جارلىعىمەن تۇركيادا ىزدەستىرۋ- قۇتقارۋ جۇمىستارىن جۇرگىزگەن ماماندار دا مەملەكەتتىك ناگرادالارمەن ماراپاتتالدى.

ەسكە سالايىق، 6- اقپاندا تۇركيانىڭ وڭتۇستىك- شىعىسىندا جانە سيريانىڭ سولتۇستىگىندە جويقىن جەر سىلكىنىسى بولدى. ەپيتسەنترى تۇركيانىڭ كاحرامانماراش پروۆينتسياسىنداعى پازاردجيك اۋدانىندا ورنالاستى. اتالعان ەلدە سوڭعى مالىمەت بويىنشا، 46,1 مىڭنان استام ادام قازا تاپتى، 26 مىڭنان استام عيمارات قيرادى. قۇلاعان نىساندارعا قاتىستى ءىس بويىنشا 247 ادام قاماۋعا الىندى.

رەداكتور

گۇلميرا الياكپاروۆا

سوڭعى جاڭالىقتار