تۇركياداعى ءزىلزالا ايماعىندا تەحنيكا مەن جىلاعان ادامداردىڭ داۋىسى قاتار شىعىپ جاتتى - دارىگەر

استانا. قازاقپارات - بۇگىن تۇركياعا كومەككە بارعان ەل قۇتقارۋشىلارى ماراپاتتالدى. ەڭبەگى جوعارى باعالانىپ، قۇرمەت كورسەتىلگەن مامانداردىڭ اراسىندا توتەنشە جاعدايلار مينيسترلىگى اپاتتار مەديتسينا ورتالىعىنىڭ دارىگەرى قۋات ىبىرايەۆ تا بار.

ول ماراپاتتاۋ راسىمىنەن كەيىن تۇركياداعى توتەنشە جاعداي ايماعىندا اتقارعان قىزمەتى تۋرالى ايتىپ بەردى، دەپ حابارلايدى قازاقپارات ءتىلشىسى.

قۋات ىبىرايەۆ ارىپتەستەرىمەن بىرگە تۇركيادا 12 كۇن بولىپ، جەدەل كومەكتى قاجەت ەتكەن جەرگىلىكتى حالىققا جاردەم كورسەتكەن.

«وندا بارعاندا ءبىز ءوزىمىزدىڭ مەديتسينالىق ءمودۋلدىڭ قۇرىلىسىن ۇلعايتتىق. سونىمەن قاتار بىزبەن بىرگە بارعان قۇتقارۋشىلاردىڭ جۇمىسىنا كومەكتەسىپ، جەدەل مەديتسينالىق كومەككە مۇقتاج جەرگىلىكتى حالىققا دا جاردەم جاسادىق.

تۇرىك حالقىنىڭ باسىنا تۇسكەن ءزىلزالانى ەشكىمىنىڭ باسىنا بەرمەسىن. وتە قيىن جاعداي بولدى. جەر سىلكىنىسى ايماقتارىندا جۇمىس ىستەگەن تەحنيكانىڭ داۋىستارى مەن جىلاعان ادامداردىڭ داۋىستارى قاتارلاسا شىعىپ جاتتى. اسىرەسە، بۇل پسيحولوگيالىق تۇرعىدان قيىن ءسات بولدى»، - دەپ ەسكە ادى ماراپات يەگەرى.

قۋات ىبىرايەۆ 30 جىلدىق تاجىريبەسى بار دارىگەر. توتەنشە جاعدايلار مينيسترلىگىنە قاراستى اپتتار مەديتسيناسى ورتالىعىندا قىزمەت ەتىپ كەلە جاتقانىنا 8 جىلدان اسقان.

«ءبىز تەك مەديتسينالىق ەمەس، سونىمەن بىرگە پسيحولوگيالىق كومەك كورسەتتىك. اتاپ ايتسام، 300 گە تارتا ادامعا پسيحولوگيالىق كومەك شارالارىن جاسادىق. ونىڭ ىشىندە 14 جاسقا دەيىنگى 19 بالا بولدى. ءبىزدىڭ قۇرامدا بۇكىل مەديتسينالىق اپپاراتتار بولدى. ول جەردە ءبىزدىڭ شاعىن وپەراتسيالار جاساۋعا مۇمكىندىگىمىز بولدى»، - دەپ تۇيىندەدى قۋات ىبىرايەۆ.

بۇگىن قۋات ىبىرايەۆ توتەنشە جاعادايلار ءمينيسترى يۋري يليننىڭ قولىنان «قۇتقارۋ وپەراتسيالارىنا بەلسەندى قاتىسقانى ءۇشىن» ۆەدومستۆولىق ناگراداسىن الدى.

«ءبىزدىڭ ەڭبەگىمىزدى ەلەپ- ەسكەرىلگەنى ءۇشىن كەۋدەمدى قۋانىش سەزىمى كەرنەپ تۇر. بىزگە قولداۋ كورسەتكەن ەلمىزگە، حالقىمىزعا راحمەت!»، - دەپ العىسىن ءبىلدىردى دارىگەر.

ايتا كەتەيىك، مەملەكەت باسشىسى قاسىم- جومارت توقايەۆ م. عابدۋللين اتىنداعى ازاماتتىق قورعاۋ اكادەمياسىندا سويلەگەن سوزىندە تۇركيادان امان- ەسەن ورالعان سوڭ قۇتقارۋشىلار مىندەتتى تۇردە ماراپاتتالاتىنىن ايتقان بولاتىن.