اتىراۋداعى «سارايشىق» ساپار ورتالىعىندا قاسىم حاننىڭ بەينەسى العاش رەت كورسەتىلەدى
بۇل نىساندى ءساۋىر ايىندا اشۋ جوسپارلانىپ وتىر، دەپ حابارلايدى قازاقپارات ءتىلشىسى.
اتىراۋ وبلىستىق قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ ايتۋىنشا، بۇل جوبانى جۇزەگە اسىرۋ بىلتىر باستالىپ، جىل سوڭىنا دەيىن اياقتاۋ كوزدەلگەن.
«الايدا، وبلىس اكىمدىگى قازاقستاننىڭ وزگە وڭىرلەرىندەگى وسىنداي نىسانداردان وزگەشە بولۋى ءۇشىن ساپار ورتالىعىنىڭ سىرتقى كەلبەتىنە وزگەرىس ەنگىزۋ جونىندە ۇسىنىس جاسادى. سول سەبەپتەن، قۇرىلىس جۇمىسىنىڭ مەرزىمى ۇزارتىلدى. قازىر ساپار ورتالىعىنىڭ قۇرىلىسى اياقتالدى دەپ ايتۋعا بولادى. ەندى جاڭا نىساننىڭ ىرگەلەس اۋماعىن اباتتاندىرۋ ءۇشىن تاس توسەۋ، كوشەت ەگۋ، سىرتقى جارىقتاندىرۋ، ورىندىقتاردى ورناتۋ سەكىلدى جۇمىستار اتقارىلىپ جاتىر. ءبىز قۇرىلىس نىسانىنا قاداعالاۋ جۇرگىزىپ، الدىمەن ساپاسىنا نازار اۋدارىپ وتىرمىز. مەردىگەرگە قۇرىلىس بويىنشا ەسكەرتۋلەر جاسالىپ، ناتيجەسىندە قاتەلىكتەر تۇزەتىلدى»، - دەپ حابارلادى نۇربەرگەن قۇسايىنوۆ.
ونىڭ ايتۋىنشا، ساپار ورتالىعىنىڭ قۇرىلىسىنا 780 ميلليون تەڭگە بولىنگەن. وسى كەزگە قارجىنىڭ %90 يگەرىلگەن. ەندى %10 قارجى نىسان تولىق تاپسىرىلعاننان كەيىن مەردىگەرگە اۋدارىلادى.
ساپار ورتالىعىنداعى مۋزەي ەكسپوزيتسيالارىن ورناتۋ جۇمىستارىن «قازاق ماتەريالدىق مادەنيەت عىلىمي-زەرتتەۋ جانە جوبالاۋ ينستيتۋتى» ج ش س جۇرگىزەدى. سەرىكتەستىكتىڭ دامۋ جونىندەگى ديرەكتورى رينات كۋتدۋسوۆتىڭ ايتۋىنشا، «سارايشىق» ساپار ورتالىعى - التىن وردا كەزەڭىنە ارنالعان ەلىمىزدەگى بىرەگەي نىسان.
«سارايشىق - ۇلى جىبەك جولى بويىنداعى ورتاعاسىرلىق قالا. ساپار ورتالىعىندا موڭعولعا دەيىنگى كەزەڭ، موڭعول كەزەڭى، سونداي-اق، نوعاي ورداسى مەن قازاق حاندىعى كەزەڭدەرىنە ارنالعان بىرنەشە ەكسپوزيتسيالىق ايماق بولادى. بۇل ەكسپوزيتسيالارعا ءبىرقاتار قۇندى دۇنيەلەر، ونىڭ ىشىندە سارايشىق قالاشىعىنىڭ ماتەريالدىق مۇرالارى، ءدال وسى جەردەن ءار كەزەڭدە تابىلعان جادىگەرلەر، التىن وردا تۋى نەمەسە بۇگىندە كەيبىر ەلدەردىڭ مەملەكەتتىك ەلتاڭبالارىندا بار قوس باستى بۇركىت بەلگىسى قويىلادى. بۇل بەلگى سارايشىقتان تابىلدى. قاسىم حان مەن باتۋ حاننىڭ بەينەلەرى العاش رەت وسىندا كورسەتىلەدى. بۇل تۇلعالاردىڭ بەينەلەرىن جاساۋ ءۇشىن عالىمدارمەن بىرلەسكەن جۇمىس اتقارىلدى»، - دەيدى رينات كۋتدۋسوۆ.
ونىڭ پىكىرىنە سۇيەنسەك، ورتالىقتا عىلىمي نەگىزدە قايتا جاسالعان سارايشىقتىڭ بىرەگەي ماكەتى ۇسىنىلادى. التىن وردا كەزەڭىندەگى سارايشىقتىڭ بەينەسىن جاساۋعا عالىمدار كومەكتەسكەن.
«بارلىق ەكسپوزيتسيانىڭ مۋلتيمەديالىق نۇسقاسى جاسالدى. بۇل ساپار ورتالىعىنىڭ قوناقتارىنا قازاق، ورىس جانە اعىلشىن تىلدەرىندە اقپارات الۋعا مۇمكىندىك بەرەدى. مۇندا التى ەكسپوزيتسيالىق زال مەن كورمە پاۆيلونى بار»، - دەپ ءمالىم ەتتى رينات كۋتدۋسوۆ.
ەسكە سالا كەتەلىك، بۇعان دەيىن اتىراۋداعى «سارايشىق» مۋزەي-قورىعىندا قوناق ءۇيى بار ۆيزيت-ورتالىق سالىنىپ جاتقانىن جازعان ەدىك.