جىبەك جولى ارناسىندا مەرەكە قارساڭىندا «تورلەتىڭىز» باعدارلاماسى ەفيرگە شىعادى
كوكتەم مەرەكەسى قارساڭىندا ەفيرىن باستايتىن جاڭا جوبا ويىن-ساۋىق، اقپاراتتى-سازدى كوڭىل-كۇي ارقىلى كورەرمەندەردى ەل ىشىندەگى تالانتتارمەن، دارىندى جاندارمەن جاقىنىراق تانىستىرادى. حالىق ەرەن تۇلعالاردىڭ ونەرىن تاماشالاۋعا مۇمكىندىك السا، ەكىنشى جاعىنان باعدارلاما قوناقتارى ءبىر ۇستەل باسىندا وتىرىپ، قوعامداعى وزەكتى تاقىرىپتاردى تالقىلاپ، وزدەرىنىڭ باسىنان وتكەن قىزىقتى وقيعالارىمەن، قۇپيالارىمەن بولىسەدى.
«بۇنى جانعا جىلۋ سىيلايتىن باعدارلاما دەپ اتاسا دا بولادى. وندا ءبىزدىڭ ءسۇيىپ تىڭدايتىن اندەرىمىز، ۇلتتىق سالت-ءداستۇرىمىز، تاريحىمىز تۋرالى ايتىلادى. ال، كەيىپكەرلەر نەگىزىنەن بۇگىنگى كۇننىڭ باتىرلارى مەن تالانتتى ونەرپازدارى، دارىندى تۇلعالار بولماق. باعدارلاماعا تانىمال ادامدار عانا ەمەس، سونىمەن بىرگە رەسپۋبليكانىڭ ءار تۇكپىرىنەن تۋما تالانتتار، دارىندىلار شاقىرىلادى. ولار ءسان، سپورت، ەسترادا، تەاتر سياقتى سان الۋان سالانىڭ كورنەكتى وكىلدەرى. ءبىز بۇل جەردە ەل ىشىنە كەڭ تاراعان اندەر تۋرالى كوبىرەك ءسوز قوزعايمىز. سەبەبى، ەلىمىزدە «ءاۋ دەمەيتىن قازاق جوق» دەپ تەگىن ايتپايدى. ءبىزدىڭ اتا-بابالارىمىز ونەر دەسە ىشكەن اسىن جەرگە قويعان، ءان ءبىزدىڭ قانىمىزدا بار، ادەت-عۇرىپىمىز بەن ءداستۇرىمىز قانداي دا ءبىر انمەن بايلانىستى. بۇنى حالقىمىزدىڭ بىرەگەي كودى دەسەك تە بولادى»، - دەيدى جوبا ديرەكتورى عاليا بايبوسىنوۆا.
باعدارلامادان ايتۋلى داتالار مەن ۇلتتىق جانە حالىقارالىق ماڭىزعا يە مەرەكەلەر دە تىس قالمايدى. «تورلەتىڭىز» باعدارلاماسى 8- ناۋرىز كۇنى ەفيرگە شىعادى. بۇنى ءبىز ادەيى حالىقارالىق ايەلدەر كۇنىنە ارنادىق. وعان ەلگە تانىمال تۇلعالار شاقىرىلدى. ساحنادا وتاندىق ەسترادادا حيت بولعان اندەر شىرقالادى. جالپى باعدارلاما تۋرالى تولىق اشىپ، ايتقىمىز كەلمەيدى. ازىرگە بۇل قۇپيا بولسىن. انىعى - كورەرمەندەرگە كەرەمەت توسىنسىي ازىرلەپ جاتىرمىز»، - دەپ اتاپ ءوتتى رەجيسسەر.
ال جوبانىڭ العاشقى ارناۋلى شىعارىلىمىن ارنا ەفيرىنەن 8- ناۋرىزدا، كەشكى ساعات 21:15 تە تاماشالاۋعا بولادى.
«تورلەتىڭىز» ءسوزىنىڭ ءوزى قازاق حالقى ءۇشىن قاستەرلى ۇعىم. ءبىز قادىرلى قوناعىمىزدى تورگە شىعارىپ، قۇرمەت تانىتامىز. ماعان وسى باعدارلامانى جۇرگىزۋ ۇسىنىلعاندا قۋانا كەلىستىم. سەبەبى جوبانىڭ يدەياسى تاماشا. وسى حابار ارقىلى كورەرمەندەرگە ۇمىت بولا باستاعان داستۇرلەرىمىز بەن ادەت-عۇرىپتارىمىزدى ەسكە سالعىمىز كەلەدى. وعان قوسا، تانىمال تاريحي تۇلعالار جايىندا وي بولىسەمىز. وسىلايشا كورەرمەنمەن بىرگە وتكەن كۇندەردى ساعىنىشپەن ەسكە الامىز»، - دەيدى ءلايلا سۇلتان قىزى.
ايتا كەتۋ كەرەك، باعدارلاما قوناقتارى اكتەرلەر، انشىلەر، اقىندار، سۋرەتشىلەر، كاسىپكەرلەر، بلوگەرلەر، مودەلدەر جانە بۇقارالىق اقپارات قۇرالىنىڭ وكىلدەرى. ولار كورەرمەندەرگە سۇيىكتى ءىسى مەن كاسىبى تۋرالى ايتىپ، جوسپارلارىمەن بولىسەدى. ومىرىندە بولىپ جاتقان جاڭالىقتارىن دا ايتىپ بەرمەك. حابار بارىسىندا قوناقتاردىڭ جەكە مۇراعاتتارىنان فوتوسۋرەتتەر مەن بەينەتۇسىرىلىمدەر كورسەتىلەدى. باعدارلاما مەيماندارى تەلەجۇرگىزۋشىلەرمەن قاتار، ءوز جانكۇيەرلەرىنىڭ سۇراقتارىنا دا جاۋاپ بەرەدى. ال جوبانىڭ باستى ەرەكشەلىكتەرىنىڭ ءبىرى باعدارلاماداعى قوناقتار تەك ايتۋلى تۇلعالار عانا ەمەس، ەلىمىزدىڭ قاراپايىم ازاماتتارى، ولار ءبىر ۇستەل باسىندا تانىمال ادامدارمەن بىرگە وتىرىپ، اڭگىمەلەسەدى.
«تورلەتىڭىز» جوباسى Jibek Joly تەلەارناسىنان كەشكە قازاق جانە ورىس تىلدەرىندە كورسەتىلەدى. باعدارلامانى ءار سەنبى سايىن Jibek Joly ارناسىنان كەشكى ساعات 21:00 دە تاماشالاي الاسىزدار.
