مينيسترلىك اتا-انامەن جۇمىستىڭ جاڭا فورماتىن ازىرلەپ جاتىر

استانا. قازاقپارات - وقۋ-اعارتۋ مينيسترلىگى اتا-انالار قاۋىمداستىعىمەن جۇمىستىڭ جاڭا فورماتىن ايقىندايتىن تۇجىرىمداما ازىرلەپ جاتىر.

بۇل تۋرالى پرەمەر-ءمينيستردىڭ ورىنباسارى التاي كولگىنوۆ سەنات دەپۋتاتتارىنىڭ ساۋالىنا جولداعان جاۋابىندا ايتتى، دەپ حابارلايدى قازاقپارات ءتىلشىسى.

سەنات دەپۋتاتتارىنىڭ جاس تۋعان سابيلەردىڭ اراسىندا كورۋ جانە ەستۋ قابىلەتى ناشار بالالاردىڭ كوبەيىپ، اۋتيزمنىڭ جاپپاي تارالۋى، لوگونيەۆروز، «تۋرەت» سيندرومى سياقتى دەرتتەردىڭ ۇلت ساۋلىعىنا قاۋىپ ءتوندىرىپ تۇرعانى تۋرالى ساۋالىنا بەرگەن جاۋابىندا سيفرلىق اۋتيزممەن كۇرەس قالاي ءجۇرىپ جاتقانى ايتىلعان.

«ءبىلىم بەرۋ ۇيىمدارى وتباسىلىق كىتاپ وقۋ جۇمىستارىن كۇشەيتۋدە، مەكتەپ كىتاپحانالارىنىڭ قورى 2022-2023 وقۋ جىلى 1,5 ميلليون دانا جاڭا كوركەم ادەبيەتكە جاڭارتىلدى»، - دەيدى التاي كولگىنوۆ.

ونىڭ ايتۋىنشا، وقۋشىنى جان-جاقتى دامىتۋعا باعىتتالعان «وقۋعا قۇشتار مەكتەپ» جوباسى جۇمىس ىستەپ تۇر.

«كيبەرمانيانىڭ زيانى تۋرالى مەكتەپتەردە، مەكتەپكە دەيىنگى دايىندىق مەكەمەلەرىندە اتا-انالار كوميتەتى، اتا-انالارمەن جۇمىس ىستەيتىن ءتۇرلى قوعامدىق ۇيىمدار قىزمەتىن جۇيەلى تۇردە ۇيىمداستىرۋعا قاتىستى قازىرگى ۋاقىتتا وقۋ-اعارتۋ مينيسترلىگى اتا-انالار قاۋىمداستىعىمەن جۇمىستىڭ جاڭا فورماتى تۇجىرىمداماسىنىڭ جوباسىن ازىرلەۋدە»، - دەپ جازىلعان جاۋاپتا.