قوعامدىق ورىندا ايتىلعان بالاعات ءسوز ءۇشىن سالىناتىن ايىپپۇل كولەمى ءوستى
قوعامدىق ورىندا بالاعات ءسوز ايتۋ اكىمشىلىك قۇقىق بۇزۋشىلىقتار كودەكسىندە «ۇساق بۇزاقىلىق» ساناتىنا جاتادى.
سونداي- اق، ۇساق بۇزاقىلىق قاتارىنا جەكە تۇلعالاردى قورلاۋ جانە ولارعا قىسىم كورسەتۋ، عيماراتتارعا، قۇرىلىستارعا، تۇرعىن ءۇي- جايلارعا، ورتاق پايدالانۋ ورىندارىنا، كولىكتەگى جانە قوعامدىق ورىندارداعى مۇلىككە نۇقسان كەلتىرۋ، اينالاعا قۇرمەتسىزدىك بىلدىرەتىن، قوعامدىق ءتارتىپ پەن جەكە تۇلعالاردىڭ تىنىشتىعىن بۇزاتىن جايتتار جاتادى.
سونىمەن ىشكى ىستەر مينيسترلىگىنىڭ مالىمەتىنشە، بۇعان دەيىن سوت ۇساق بۇزاقىلىق جاساعانى ءۇشىن 5 ا ە ك (17250 تەڭگە) مولشەرىندە ايىپپۇل سالاتىن نەمەسە 15 تاۋلىككە دەيىن قاماۋعا الاتىن ەدى. ال بۇگىننەن باستاپ ايىپپۇل 20 ا ە ك (69000 تەڭگە) قۇرايدى، قاماۋعا الۋ 5-تەن 30 تاۋلىككە دەيىن ۇزارادى.
«سوڭعى جىلدارى بوتەننىڭ مۇلكىنە، ونىڭ ىشىندە ازاماتتار ورتاق پايدالاناتىن زاتتارعا قاساقانا زاقىم كەلتىرۋ فاكتىلەرى جيىلەدى. سىزدەر ومىردە كىرەبەرىستەردەگى زاقىمدالعان ليفتتەر، اينالاسى سىنعان، تۇيمەلەرى ورتەنگەن، ءتۇرلى جازۋمەن بۇلدىرگەن فاكتىلەرگە تاپ بولعان شىعارسىزدار. كوبىنە مۇنداي ارەكەتتى ادامدار قاساقانا جاسايدى. ياعني، ولار سانالى تۇردە باسقانىڭ مۇلكىن بۇلدىرەدى»، - دەگەن ەدى ءى ءى م اكىمشىلىك پوليتسيا كوميتەتى باسقارما باستىعىنىڭ مىندەتىن اتقارۋشى ازامات قۇرىمبايەۆ مينيسترلىكتىڭ اپتالىق بريفينگىندە.
ونىڭ ايتۋىنشا، زالال مولشەرى وعان جەتپەگەن جاعدايدا ازاماتتار وزدەرى دالەل جيناۋ، ولاردىڭ جۇرگەن جەرىن ءبىلۋ سياقتى ماسەلەلەرمەن اينالىسادى. ويتكەنى زالالدى وتەۋ ازاماتتىق- قۇقىقتىق الاڭدا شەشىلەدى.
ەسكە سالساق، بيىل 3- قاڭتاردا مەملەكەت باسشىسى قاسىم- جومارت توقايەۆ «ق ر قىلمىستىق جانە قىلمىستىق ءىس جۇرگىزۋ كودەكستەرىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا تولىقتىرۋلار ەنگىزۋ تۋرالى» جانە «ق ر اكىمشىلىك قۇقىق بۇزۋشىلىق تۋرالى كودەكسىنە ەكولوگيالىق قۇقىقبۇزۋشىلىقتار مەن ۆانداليزم كورىنىستەرى ءۇشىن جاۋاپكەرشىلىكتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
اۆتور
داۋلەت ىزتىلەۋ