كەيدە ءوزىمنىڭ ۇلتىم باسقا ەكەنىن ۇمىتىپ كەتەمىن - قىتاي قىزى

قاراعاندى. قازاقپارات - ەلىمىزدە قازاق تىلىندە ەركىن سويلەپ، قازاق ۇلتىنىڭ سالت-ءداستۇرىن بەرىك ۇستاناتىن جاندار از ەمەس.

سولاردىڭ ءبىرى - قاراعاندى قالاسىنىڭ تۇرعىنى ولگا وسيپچۋك. ول دومبىرا شەرتىپ، پوەزيا الەمىن جانىنا سەرىك ەتىپ كەلەدى.

ولگا وسيپچۋك ءۇشىن جۇما كۇنى باۋىرساق، شەلپەك ءپىسىرۋ جاستايىنان قالىپتاسقان داعدى. 32 جاستاعى كەلىنشەكتىڭ اكەسى - قىتاي، اناسى ۋكراين ۇلتىنان. «ال، مەن بولسام قازاقپىن دەيدى»، - ەكى بالانىڭ اناسى.

اباي، مۇقاعالي ماقاتايەۆ سىندى ءبىرتۋار تۇلعالاردىڭ ولەڭدەرىن جاتقا وقيدى. ءتىپتى، «كوزىمنىڭ قاراسى» ءانىن شىرقاپ، بەينەكليپ تە تۇسىرگەن.

«ورتامىز قازاق بولدى. ساباق وقىعاندا اجەمىزدەن ورىس تىلىندە عانا كومەك الاتىنبىز. ول كىسى قازاقشا بىلمەدى. ءتىلىم شىققالى قازاقشا سويلەيمىن. كەيدە، ءتىپتى باسقا ۇلت وكىلى قازاقشا سويلەپ جاتسا، مىنا كىسى قازاقشا سويلەدى عوي دەپ تاڭعالىپ قاراپ قالاتىنىم بار. ءوزىمنىڭ ۇلتىم باسقا ەكەنىن ۇمىتىپ كەتەمىن كەيدە»، - دەيدى ولگا.

جاستايىنان قازاق تىلىندە سويلەپ وسكەن ولگا شاحتينسك قالاسىندا تۋعان. قارقارالى اۋدانىنا قاراستى قوياندى اۋىلىنىڭ مەكتەبىن ءتامامداعان. سوڭعى جىلدارى استانا قالاسى اكىمدىگىندە جۇمىس ىستەگەن. ءتۇرلى بايقاۋلاردا جەڭىسكە جەتكەن. بوس ۋاقىتىن مونولوگ وقىپ، پوەزيا الەمىمەن وتكىزۋدى قالايتىنىن ايتادى.

تاعى ءبىر قىرى - قازاقتىڭ كيەلى دومبىراسىن دا مەڭگەرىپ العان. قازىرگى تاڭدا شەرتپە كۇيدىڭ شەبەرلەرى قالدىرعان مول مۇرانى ساناسىنا ءسىڭىرىپ ءجۇر. جاقىن كۇندەردە ونعا جۋىق كۇيدى ۇيرەنىپ، ورىنداماق نيەتتە.

«بالبىراۋىن» كۇيىن ورىنداعىم كەلەدى. قازىرگى تاڭدا «جاستار ءبيى» كۇيىن ۇيرەنىپ ءجۇرمىن. جاستايىمنان دومبىرا تارتۋعا قۇشتارلىعىم بار»، - دەيدى ولگا وسيپچۋك.

كەيىپكەرىمىز بۇگىنگى تاڭدا كوممۋنالدىق مەكەمەلەردىڭ بىرىندە ەڭبەك ەتەدى. قازاقى سالت- ءداستۇردى بەرىك ۇستانعان اكەسى قىتاي، شەشەسى ۋكراين قىزدىڭ ەندىگى ماقساتى - الەۋمەتتىك جەلى ارقىلى الاش زيالىلارى قالدىرعان مۇرانى جاس ۇرپاققا ناسيحاتتاۋ.

اۆتور

اگاتا مۋحامەدجانوۆا